Wife and Lover Booked for Alleged Husband’s Murder: ସ୍ତ୍ରୀର ଜଘନ୍ୟ କାଣ୍ଡ, ପ୍ରେମିକ ସହ ମିଶି ଷଡ଼ଯନ୍ତ୍ର କରି ମାରିଲା ସ୍ୱାମୀଙ୍କୁ

ଜଣେ ମହିଳା ଏବଂ ତାଙ୍କ ଅଭିଯୁକ୍ତ ପ୍ରେମିକ ସମେତ ଚାରି ଜଣଙ୍କୁ ତାଙ୍କ ସ୍ୱାମୀଙ୍କ ମୃତ୍ୟୁ ଘଟଣାରେ ଗିରଫ କରାଯାଇଛି । ଏହା ପ୍ରଥମେ ସାପ କାମୁଡ଼ା ମାମଲା ଭାବରେ ରିପୋର୍ଟ କରାଯାଇଥିଲା । ପୋଲିସ କହିଛି ଯେ ମୃତ ଅତୁଲ ପନୱାରଙ୍କୁ ତାଙ୍କ ସ୍ତ୍ରୀ ଦାମିନୀ, ସ୍ତ୍ରୀର ପ୍ରେମିକ ଏବଂ ଅନ୍ୟ ଦୁଇଜଣଙ୍କ ଦ୍ୱାରା ପ୍ରସ୍ତୁତ ଯୋଜନା ଅନୁଯାୟୀ ହତ୍ୟା କରାଯାଇଥିଲା। ସେମାନେ କହିଛନ୍ତି ଯେ ପନୱାରଙ୍କୁ ସମ୍ପର୍କରେ ବାଧା ଭାବରେ ଦେଖାଯାଉଥିଲା ଏବଂ ଅଭିଯୁକ୍ତ ତାଙ୍କ ବୀମା ଟଙ୍କା ମଧ୍ୟ ହାତେଇବାକୁ ଚାହୁଁଥିଲା।

୩୫ ବର୍ଷୀୟ ପାନୱାର ଏବଂ ଦାମିନୀ ୨୦୧୯ ମସିହାରେ ପ୍ରେମ ବିବାହ କରିଥିଲେ ଏବଂ ହସ୍ତିନାପୁରରେ ରହୁଥିଲେ । ସେଠାରେ ସେମାନେ ଏକ ପବ୍ଲିକ୍ ସ୍କୁଲ ଚଳାଉଥିଲେ। ପୋଲିସ ଅଧୀକ୍ଷକ ଅଭିଜିତ କୁମାର କହିଛନ୍ତି ଯେ ଶୁକ୍ରବାର ସକାଳେ ପନୱାରଙ୍କୁ ତାଙ୍କ ଘରେ ଏକ ସାପ କାମୁଡ଼ିଥିଲା ବୋଲି କୁହାଯାଇଥିଲା । ପରେ ତାଙ୍କୁ ନିକଟସ୍ଥ ଏକ କମ୍ୟୁନିଟି ହେଲ୍ଥ ସେଣ୍ଟରକୁ ନିଆଯାଇଥିଲା ଏବଂ ପରେ ତାଙ୍କୁ ମୃତ ଘୋଷଣା କରାଯାଇଥିଲା।

କୁମାର କହିଛନ୍ତି ଯେ ପନୱାରଙ୍କ ବିଛଣାରେ ଏକ ସାପ ମିଳିଥିଲା, କିନ୍ତୁ ତାଙ୍କ ଘର ଲୋକ ସନ୍ଦେହ କରିଥିଲେ ଯେ ଏହା ଏକ ହତ୍ୟାକାଣ୍ଡ । ପରେ ପୋଲିସ ତଦନ୍ତ ଆରମ୍ଭ କରିଥିଲା। ତଦନ୍ତରୁ ଜଣାପଡିଛି ଯେ ଦାମିନୀ ସ୍କୁଲର ଡ୍ରାଇଭର ତୁଷାର ଓରଫ ନିକି ସହ ମୋବାଇଲ୍ ଫୋନ୍ ରେ ବାରମ୍ବାର ଯୋଗାଯୋଗ କରୁଥିଲା। ପଚରାଉଚରା ସମୟରେ ଜଣାପଡିଛି ଯେ, ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା । ଉଭୟ ପନୱାରଙ୍କୁ ହତ୍ୟା କରିବାକୁ ଯୋଜନା କରିଥିଲେ।

କୁମାରଙ୍କ ଅନୁଯାୟୀ, ଘଟଣାର ପୂର୍ବ ରାତିରେ ପନୱାରଙ୍କୁ ପ୍ରଥମେ କ୍ଷୀରରେ ନିଦ ବଟିକାର ମାତ୍ରାଧିକ ଡୋଜ୍ ଦିଆଯାଇଥିଲା। ପୋଲିସ କହିଛି ଯେ ତୁଷାର ଦୁଇ ସହଯୋଗୀ ସୋନୁ ଏବଂ ଉଦୟଙ୍କ ସହାୟତାରେ ଏକ ସାପ ଆଣି ପନୱାରଙ୍କ ଶୋଇବା ସ୍ଥାନରେ ଛାଡ଼ି ଦେଇଥିଲା, ଯାହା ଫଳରେ ତାଙ୍କର ମୃତ୍ୟୁ ହୋଇଥିଲା।

ପୋଲିସ କହିଛି ଯେ ତଦନ୍ତରୁ ଏହା ମଧ୍ୟ ଜଣାପଡିଛି ଯେ ପନୱାରଙ୍କର ପ୍ରାୟ ୨୦ ଲକ୍ଷ ଟଙ୍କାର ଜୀବନ ବୀମା ପଲିସି ଥିଲା। ବୀମା ଟଙ୍କା ପାଇବା ପରେ ସୋନୁ ଏବଂ ଉଦୟଙ୍କୁ ୫ ଲକ୍ଷ ଟଙ୍କା ଦେବାକୁ ପ୍ରତିଶ୍ରୁତି ଦିଆଯାଇଥିଲା ବୋଲି ଅଭିଯୋଗ ହୋଇଛି। ପଚରାଉଚରା ସମୟରେ ପୋଲିସ ଏହା ମଧ୍ୟ ଜାଣିବାକୁ ପାଇଛି ଯେ ପ୍ରାୟ ୨୦ ଦିନ ପୂର୍ବରୁ ତୁଷାର ପନୱାରଙ୍କୁ ଏକ କାର୍ ସହିତ ଧକ୍କା ଦେଇ ହତ୍ୟା କରିବାକୁ ଚେଷ୍ଟା କରିଥିଲା । କିନ୍ତୁ ସେ ହେଲମେଟ୍ ପିନ୍ଧିଥିବାରୁ ବଞ୍ଚି ଯାଇଥିଲେ।

ପୋଲିସ ଦାମିନି, ତୁଷାର, ସୋନୁ ଏବଂ ଉଦୟ କୁମାରଙ୍କୁ ଗିରଫ କରିଛି। ସର୍ପାଘାତ ମୃତ୍ୟୁ ସନ୍ଦେହରୁ ଆରମ୍ଭ ହୋଇଥିବା ଏହି ମାମଲାରେ ଏବେ ଚାରି ଜଣ ଗିରଫ ହୋଇଛନ୍ତି । ଉତ୍ତର ପ୍ରଦେଶର ମିରଟ ଜିଲ୍ଲାରେ ଘଟିଛି ଏହି ଘଟଣା ।