Whatsapp: ହ୍ୱାଟସଆପର ନୂଆ ''ୟୁଜରନେମ୍'' ଫିଚର ଉପରେ କେନ୍ଦ୍ରର ନଜର: ମେଟାକୁ ମିଳିପାରେ ନୋଟିସ୍

"ନୂଆଦିଲ୍ଲୀ: ହ୍ୱାଟସଆପ୍ ଆଣିବାକୁ ଥିବା ନୂଆ ''ୟୁଜରନେମ୍'' ଫିଚରକୁ ନେଇ କେନ୍ଦ୍ର ସରକାର ସତର୍କ ହୋଇପଡ଼ିଛନ୍ତି।

ଏହି ନୂଆ ବ୍ୟବସ୍ଥା ଦ୍ୱାରା ଅନଲାଇନ୍ ଠକେଇ, ଜାଲିଆତି ଓ ଅନ୍ୟ କାହାର ନାଁରେ ନକଲି ଆକାଉଣ୍ଟ ଖୋଲିବା ଭଳି ଅପରାଧ ବୃଦ୍ଧି ପାଇବାର ଆଶଙ୍କା ରହିଥିବାରୁ ସରକାର ଏହାର ସମୀକ୍ଷା କରିବେ।

ସୂଚନା ଓ ପ୍ରଯୁକ୍ତିବିଦ୍ୟା ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ସୂଚନା ଦେଇଛନ୍ତି ଯେ, ଆବଶ୍ୟକ ପଡ଼ିଲେ ଏହି ସୁରକ୍ଷା ଓ ଗୋପନୀୟତା ଯାଞ୍ଚ ପାଇଁ ହ୍ୱାଟସଆପର ମାଲିକାନା ସଂସ୍ଥା ''ମେଟା''କୁ ନୋଟିସ୍ ଜାରି କରାଯାଇପାରେ।

ନିକଟରେ ନୀଟ୍ ପରୀକ୍ଷା ବିବାଦ ସମୟରେ ଟେଲିଗ୍ରାମ ବିରୋଧରେ ନିଆଯାଇଥିବା କଡ଼ା ଆଇନଗତ ଆଭିମୁଖ୍ୟ ଭଳି ହ୍ୱାଟସଆପ୍ ବିରୋଧରେ ମଧ୍ୟ ଦୃଢ଼ ପଦକ୍ଷେପ ନିଆଯାଇପାରେ ବୋଲି ପ୍ରଶାସନ ଚେତାବନୀ ଦେଇଛି।Advertisment ସରକାରୀ ସୂତ୍ର ଅନୁଯାୟୀ, ମେସେଜିଂ ପ୍ଲାଟଫର୍ମଗୁଡ଼ିକ ନିଜ ବ୍ୟବସ୍ଥାର ଯେପରି ଅପବ୍ୟବହାର ନହୁଏ, ତାହା ସୁନିଶ୍ଚିତ କରିବା ଆବଶ୍ୟକ।

ଯଦି କୌଣସି ଫିଚର ଦ୍ୱାରା ଠକେଇ, ମିଥ୍ୟା ଗୁଜବ ବା ଜାଲିଆତି ବଢ଼େ, ତେବେ ସେଥିପାଇଁ ପ୍ଲାଟଫର୍ମ ନିଜେ ଦାୟୀ ରହିବେ।

ଅନ୍ୟପଟେ ହ୍ୱାଟସଆପ ପକ୍ଷରୁ କୁହାଯାଇଛି ଯେ, ଗ୍ରୁପ୍ ଚାଟ୍ କିମ୍ବା ଅଜଣା ବ୍ୟକ୍ତିଙ୍କ ସହ ପ୍ରଥମ ଥର କଥା ହେବା ବେଳେ ଅନେକ ଲୋକ ନିଜର ଫୋନ ନମ୍ବର ଦେବାକୁ ସହଜ ମନେ କରନ୍ତି ନାହିଁ।

ଏହି ସମସ୍ୟାର ସମାଧାନ ପାଇଁ ୩୫ଟି ଅକ୍ଷର ବିଶିଷ୍ଟ ୟୁଜରନେମ୍ ବ୍ୟବସ୍ଥା ଅଣାଯାଉଛି, ଯାହା ସମ୍ପୂର୍ଣ୍ଣ ଇଚ୍ଛାଧିନ ରହିବ ଏବଂ ଏହାକୁ ବ୍ୟବହାରକାରୀ ଚାହିଁଲେ ଯେକୌଣସି ସମୟରେ ବଦଳାଇ ବା ହଟାଇ ପାରିବେ।

ଜନସାଧାରଣ ଓ ସେଲିବ୍ରିଟିମାନଙ୍କ ସୁରକ୍ଷା ପାଇଁ କିଛି ହାଇ-ପ୍ରୋଫାଇଲ୍ ନାମକୁ ସୁରକ୍ଷିତ ରଖାଯିବ, ଯେପରି ଅନ୍ୟ କେହି ତାହାର ଅପବ୍ୟବହାର କରିପାରିବେ ନାହିଁ।

ବ୍ୟବସାୟୀ ଓ କ୍ରିଏଟରମାନେ ସେମାନଙ୍କର ଫେସବୁକ୍ ବା ଇନଷ୍ଟାଗ୍ରାମ ଆଇଡି ସହ ସମାନ ୟୁଜରନେମ୍ ରଖିବା ପାଇଁ ମେଟା ଆକାଉଣ୍ଟ ସେଣ୍ଟରର ସାହାଯ୍ୟ ନେଇପାରିବେ।

ପ୍ରାରମ୍ଭିକ ପର୍ଯ୍ୟାୟରେ ଏହି ୟୁଜରନେମ୍ ବୁକିଂ କେବଳ ମୋବାଇଲ୍ ଆପରେ ଉପଲବ୍ଧ ହେବ, ହ୍ୱାଟସ୍ଆପ୍ ୱେବ୍ କିମ୍ବା ଡେସ୍କଟପ୍ ଆପରେ ନୁହେଁ।

ଆହୁରି ପଢନ୍ତୁ: Sachin Ahir: ମହାରାଷ୍ଟ୍ର ବିଧାନ ପରିଷଦ ଉପାଧ୍ୟକ୍ଷ ନିର୍ବାଚିତ ହେଲେ ସଚିନ ଅହିର୍‌ ଅନ୍ୟପଟେ, ସାଇବର ବିଶେଷଜ୍ଞ ଏବଂ ସରକାରୀ ଅଧିକାରୀମାନେ ଆଶଙ୍କା ପ୍ରକାଶ କରିଛନ୍ତି ଯେ ଫୋନ ନମ୍ବର ଲୁଚି ରହିବା ଫଳରେ ଜାଲିଆତି କରୁଥିବା ବ୍ୟକ୍ତିମାନେ ନିଜର ପରିଚୟ ଗୋପନ ରଖି ଅନ୍ୟ ନାମରେ ଲୋକଙ୍କୁ ଠକିବାର ସୁଯୋଗ ପାଇପାରନ୍ତି।

ଏହାର ଜବାବରେ ହ୍ୱାଟସ୍ଆପ୍ ସ୍ପଷ୍ଟ କରିଛି ଯେ ସେମାନଙ୍କ ପାଖରେ ସୁରକ୍ଷାର ଅନେକ ସ୍ତର ରହିଛି ଏବଂ ନକଲି ପରିଚୟ ରୋକିବା ପାଇଁ ଏକ ସ୍ୱତନ୍ତ୍ର "ୟୁଜରନେମ୍ କି" ମଧ୍ୟ ପ୍ରଦାନ କରାଯିବ।

କମ୍ପାନି ପୁନର୍ବାର ଦୋହରାଇଛି ଯେ ଏହି ନୂଆ ବ୍ୟବସ୍ଥା ପରେ ମଧ୍ୟ ଉପଭୋକ୍ତାଙ୍କ ବ୍ୟକ୍ତିଗତ ମେସେଜ୍ ଗୁଡ଼ିକ ପୂର୍ବପରି ସମ୍ପୂର୍ଣ୍ଣ ସୁରକ୍ଷିତ ରହିବ।

"