Unusual Request: ଆମ ପାଖରେ ଖାଇବାକୁ ଆସନ୍ତୁ ନାହିଁ... ରେଷ୍ଟୁରାଣ୍ଟ ମାଲିକ କାହିଁକି କରୁଛନ୍ତି ଏହି ଅନୁରୋଧ?

ରେଷ୍ଟୁରାଣ୍ଟ ମାଲିକ ଲୋକଙ୍କୁ ଅନୁରୋଧ କରୁଛନ୍ତି ଯେ ଗୁଗଲରେ ଆମ ବିଷୟରେ ପଢ଼ି ଆସନ୍ତୁ ନାହିଁ। ଆମର ଦୈନିକ ସ୍ପେଶାଲ ଖାଦ୍ୟ ବିଷୟରେ ଗୁଗଲ ଉପରେ ନୁହେଁ, ବରଂ ଆମର ୱେବସାଇଟ କିମ୍ବା ଫେସବୁକ ପୋଷ୍ଟ ଉପରେ ଭରସା କରନ୍ତୁ। ଏହାର କାରଣ ହେଉଛି ଏଆଇ।

ଆଜିର ଯୁଗରେ ଯଦି ବ୍ୟବସାୟ କରିବାକୁ ହୁଏ, ତେବେ ପ୍ରଥମେ ଆବଶ୍ୟକ ହେଉଛି ଗୁଗଲରେ ଲିଷ୍ଟ ହେବା। ଯଦି ଆପଣଙ୍କ ବ୍ୟବସାୟ ଗୁଗଲ ସର୍ଚ୍ଚରେ ଶୀର୍ଷରେ ଆସୁଛି, ତେବେ ଆପଣଙ୍କର ସଫଳତା ନିଶ୍ଚିତ। ଗ୍ରାହକ ଗୁଗଲରେ ଆପଣଙ୍କ ନାମ ଶୀର୍ଷରେ ଦେଖିବେ ଓ ନିଶ୍ଚିତ ଭାବେ ଆପଣଙ୍କ ଦୋକାନକୁ ଆସିବେ। ସବୁ କିଛି ଖୁବ୍ ଭଲ ଲାଗୁଛି, କିନ୍ତୁ ଯଦି କୌଣସି ଦୋକାନୀ ଆପଣଙ୍କୁ କହେ ଯେ ଗୁଗଲର କଥା ଶୁଣି ମୋ ପାଖକୁ ଆସନ୍ତୁ ନାହିଁ, ତେବେ ଅଡୁଆ ଲାଗିବ । କିନ୍ତୁ ଏହା ସତରେ ଘଟିଛି। ଏକ ରେଷ୍ଟୁରାଣ୍ଟ ମାଲିକ ଏହା କହୁଛନ୍ତି। କାରଣ ହେଉଛି ଗୁଗଲର ଆର୍ଟିଫିସିଆଲ ଇଣ୍ଟେଲିଜେନ୍ସ।

ଆମେରିକାର ମିଜୋରୀରେ Stefanina’s Wentzville ନାମକ ଏକ ରେଷ୍ଟୁରାଣ୍ଟ ଅଛି, ଯାହା ବିଗତ କିଛି ସମୟ ଧରି ଗ୍ରାହକଙ୍କ ରୋଷର ଶିକାର ହେଉଛି। କାରଣ ହେଉଛି, ଗ୍ରାହକମାନେ ଗୁଗଲରେ ଦେଖାଯାଇଥିବା ସ୍ପେଶାଲ ଡିସ୍‌ ଖାଇବାକୁ ଆସୁଛନ୍ତି, କିନ୍ତୁ ସେହି ଡିସ୍‌ ରେଷ୍ଟୁରାଣ୍ଟରେ ମିଳୁନାହିଁ।

ଏହା ଏଇଥିପାଇଁ ହେଉଛି କାରଣ ଗୁଗଲର ଆର୍ଟିଫିସିଆଲ ଇଣ୍ଟେଲିଜେନ୍ସ ପ୍ରତିଦିନ ନିଜେ କିଛି ସ୍ପେଶାଲ ଡିସ୍‌କୁ ରେଷ୍ଟୁରାଣ୍ଟର ମେନୁରେ ଯୋଡ଼ୁଛି। ଆପଣଙ୍କ ଜାଣିବା ପାଇଁ କହୁଛୁ, କିଛି ମାସ ତଳେ ଗୁଗଲ ତା’ର ସର୍ଚ୍ଚ ଇଞ୍ଜିନରେ ଆର୍ଟିଫିସିଆଲ ଇଣ୍ଟେଲିଜେନ୍ସକୁ ସାମିଲ କରିଛି। ସର୍ଚ୍ଚର ଢଙ୍ଗ ବଦଳି ଯାଇଛି।

ଏବେ ଯଦି ଆପଣ କୌଣସି ହୋଟେଲର ଟେଲିଫୋନ ନମ୍ବର ଖୋଜୁଛନ୍ତି, ତେବେ ତା’ ସହିତ ହୋଟେଲରେ ରୁମର ଉପଲବ୍ଧତା ମଧ୍ୟ ଜଣାପଡ଼ିବ। ଏହା ସହିତ ଅନ୍ୟ ହୋଟେଲର ସୁପାରିଶ ମଧ୍ୟ ସ୍କ୍ରିନରେ ଦେଖାଯିବ। ମୋଟାମୋଟି ଭାବେ ଅନେକ ତଥ୍ୟ ସ୍କ୍ରିନରେ ଆସିଯାଏ। କିନ୍ତୁ ଏହି ଆର୍ଟିଫିସିଆଲ ଇଣ୍ଟେଲିଜେନ୍ସ Stefanina’s Wentzville ପାଇଁ ଅଖାଦ୍ୟ ଖାଦ୍ୟ ପରି ସାବ୍ୟସ୍ତ ହେଉଛି। ଯେତେବେଳେ ଗ୍ରାହକ ଏହି ରେଷ୍ଟୁରାଣ୍ଟ ବିଷୟରେ ସର୍ଚ୍ଚ କରନ୍ତି, ଗୁଗଲ ନିଜେ ସେହି ଦିନର ସ୍ପେଶାଲ ଡିସ୍‌ ଦେଖାଇ ଦିଏ। କିନ୍ତୁ ବାସ୍ତବରେ ସେହି ଡିସ୍‌ ଉପଲବ୍ଧ ହୋଇ ନଥାଏ। ଉଦାହରଣ ସ୍ୱରୂପ, ଗୋଟିଏ ଦିନ ଗୁଗଲ କହିଲା ଯେ ଆଜିର ଅଫରରେ ଛୋଟ ପିଜ୍ଜାର ମୂଲ୍ୟରେ ବଡ଼ ପିଜ୍ଜା ମିଳିବ। ଗ୍ରାହକଙ୍କ ଲାଇନ ଲାଗିଗଲା, କିନ୍ତୁ ଏପରି କୌଣସି ଅଫର ନଥିଲା। ଫଳାଫଳ ହେଲା ଭୁଲ ବୁଝାମଣା ଓ ରୋଷ।

ଏହାକୁ ନେଇ ରେଷ୍ଟୁରାଣ୍ଟ ମାଲିକ ଏବେ ଲୋକଙ୍କୁ ଅନୁରୋଧ କରିଛନ୍ତି ଯେ Stefanina’s Wentzville ର ୱେବସାଇଟ କିମ୍ବା ଫେସବୁକ ପୋଷ୍ଟ ପଢ଼ି ରେଷ୍ଟୁରାଣ୍ଟକୁ ଆସନ୍ତୁ। ଗୁଗଲର ଏହି ଭୁଲର ଏହା ପ୍ରଥମ ଉଦାହରଣ ନୁହେଁ। ମିନେସୋଟାର ଏକ ସୋଲାର କମ୍ପାନୀ ତ ଗୁଗଲ ଉପରେ ମାମଲା ମଧ୍ୟ କରିଛି। କାରଣ ଗୁଗଲର ଏଆଇ ଅନୁଯାୟୀ, ତା’ର ବ୍ୟବସାୟ ଅନେକ ଆଇନଗତ ସମସ୍ୟାରେ ଜଡ଼ିତ।