Trump ally Charlie Kirk: ଟ୍ରମ୍ପଙ୍କ ଘନିଷ୍ଠ ସହଯୋଗୀଙ୍କୁ ଗୁଳି କରି ହତ୍ୟା

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ସହଯୋଗୀ ଚାର୍ଲି କିର୍କ ୟୁଟା ଭ୍ୟାଲି ୟୁନିଭର୍ସିଟି ପରିସରରେ ଭାଷଣ ଦେବା ବେଳେ ତାଙ୍କୁ ଗୁଳି କରି ହତ୍ୟା କରାଯାଇଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ସହଯୋଗୀ ତଥା କଞ୍ଜରଭେଟିଭ ଆକ୍ଟିଭିଷ୍ଟ ଚାର୍ଲି କିର୍କଙ୍କୁ ଗୁଳି କରି ହତ୍ୟା କରାଯାଇଛି। ଏହା ଆମେରିକୀୟ ରାଷ୍ଟ୍ରପତିଙ୍କୁ ଏକ ବଡ଼ ଆଘାତ ଦେଇଛି। ଏହି ଘଟଣାରେ ଟ୍ରମ୍ପ ସୋସିଆଲ ମିଡିଆରେ ତାଙ୍କ ଦୁଃଖ ଜାହିର୍ କରିଛନ୍ତି। ଚାର୍ଲି ୟୁଟା ଭ୍ୟାଲି ୟୁନିଭର୍ସିଟି ପରିସରରେ ଏକ କାର୍ଯ୍ୟକ୍ରମରେ ଯୋଗ ଦେଇ ଭାଷଣ ଦେବା ସମୟରେ ତାଙ୍କୁ ଗୁଳିମାଡ କରାଯାଇଥିଲା।

ଏହି ଜଘନ୍ୟ ହତ୍ୟାକାଣ୍ଡର ଏକ ହୃଦୟବିଦାରକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ଚାର୍ଲି କିର୍କଙ୍କ ଗଳାରେ ଗୁଳି ମାରିବା ଦେଖାଯାଇଛି। ଏପର୍ଯ୍ୟନ୍ତ ଆକ୍ରମଣକାରୀଙ୍କୁ ଧରାଯାଇ ନାହିଁ। ଦୁଇଜଣ ସନ୍ଦିଗ୍ଧଙ୍କୁ ହେପାଜତରେ ନିଆଯାଇଥିଲା, କିନ୍ତୁ ପରେ ସେମାନଙ୍କୁ ଛଡ଼ାଯାଇଥିଲା।

ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ଲେଖିଛନ୍ତି, "ମହାନ ଚାର୍ଲି କିର୍କ ଏବେ ଏହି ଦୁନିଆରେ ନାହାଁନ୍ତି। ଆମେରିକାର ଯୁବକମାନଙ୍କୁ ଚାର୍ଲିଙ୍କ ଠାରୁ କେହି ଅଧିକ ଭଲ ଭାବେ ବୁଝି ନଥିଲେ, କିମ୍ବା ତାଙ୍କ ଭଳି ହୃଦୟ କାହା ପାଖରେ ନଥିଲା। ସେ ସମସ୍ତଙ୍କର ପ୍ରିୟ ଥିଲେ। ସମସ୍ତେ ତାଙ୍କୁ ପ୍ରଶଂସା କରୁଥିଲେ। ଏବେ ସେ ଆମ ମଧ୍ୟରେ ନାହାଁନ୍ତି। ମେଲାନିଆ ଏବଂ ମୋର ସମବେଦନା ତାଙ୍କର ସୁନ୍ଦର ପତ୍ନୀ ଏରିକା ଏବଂ ତାଙ୍କ ପରିବାର ସହିତ ଅଛି। ଚାର୍ଲି, ଆମେ ତୁମକୁ ଭଲ ପାଉଛୁ!" ଏହା ସହିତ ସେ କହିଛନ୍ତି ଯେ ଚାର୍ଲିଙ୍କ ସମ୍ମାନରେ ମୁଁ ସାରା ଆମେରିକାରେ ରବିବାର ସନ୍ଧ୍ୟା ୬ଟା ପର୍ଯ୍ୟନ୍ତ ଦେଶର ଜାତୀୟ ପତାକାକୁ ଅର୍ଦ୍ଧନମିତ କରିବାକୁ ନିର୍ଦ୍ଦେଶ ଦେଇଛି।

ଚାର୍ଲି କିର୍କ ଆମେରିକାର ପ୍ରମୁଖ ଦକ୍ଷିଣପନ୍ଥୀ ଯୁବ କାର୍ଯ୍ୟକର୍ତ୍ତା ସଂଗଠନର ସ୍ଥାପକ ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିକଟତମ ବୋଲି ବିବେଚନା କରାଯାଉଥିଲେ। ବୁଧବାର ଦିନ ୟୁଟା ଭ୍ୟାଲି ୟୁନିଭର୍ସିଟି କ୍ୟାମ୍ପସରେ ଭାଷଣ ଦେଉଥିବା ସମୟରେ ତାଙ୍କୁ ଗୁଳି ମାରି ହତ୍ୟା କରାଯାଇଥିଲା। ରାଜ୍ୟର ଗଭର୍ଣ୍ଣର ଏହାକୁ "ରାଜନୈତିକ ହତ୍ୟା" ବୋଲି ଅଭିହିତ କରିଛନ୍ତି। ସେ ମାତ୍ର ୩୧ ବର୍ଷ ବୟସରେ ଥିଲେ। ବୁଧବାର ବିଳମ୍ବିତ ସନ୍ଧ୍ୟା ସୁଦ୍ଧା ଅଧିକାରୀମାନେ ତଦନ୍ତ ଅଧୀନରେ ଦୁଇଜଣଙ୍କୁ ହେପାଜତରେ ନେଇଥିଲେ, କିନ୍ତୁ ଉଭୟଙ୍କୁ କୌଣସି ଅଭିଯୋଗ ବିନା ମୁକ୍ତ କରାଯାଇଥିଲା। ଏଫବିଆଇ ନିର୍ଦ୍ଦେଶକ କାଶ ପଟେଲ କହିଛନ୍ତି ଯେ ପଚରାଉଚରା ପରେ ଜଣେ ସନ୍ଦିଗ୍ଧଙ୍କୁ ମୁକ୍ତ କରାଯାଇଛି। ତଦନ୍ତ ଜାରି ରହିଛି।