Tariff War: ଟ୍ରମ୍ପଙ୍କ ସହଯୋଗୀ କହିଲେ, ଚୀନ୍ ଭାରତର ମିତ୍ର ନୁହେଁ, ତା ସହ ନ ମିଶୁ

ହ୍ୱାଇଟ ହାଉସ୍‌ର ପରାମର୍ଶଦାତା ପିଟର ନାଭାରୋ କହିଛନ୍ତି ଯେ ୟୁକ୍ରେନରେ ଶାନ୍ତିର ପଥ ଭାରତ ଦେଇ ଯାଇଛି। ସେ ଏକ ଯୁକ୍ତି ଦେଇ କହିଛନ୍ତି ଯେ ଭାରତ ଆମେରିକାରେ ଜିନିଷ ବିକ୍ରି କରି ଟଙ୍କା ରୋଜଗାର କରୁଛି। ସେହି ଟଙ୍କାରେ ସେ ରୁଷିଆରୁ ତୈଳ କିଣୁଛି ଏବଂ ସେହି ଟଙ୍କା ଦେଇ ରୁଷିଆ ୟୁକ୍ରେନ ଉପରେ ଆକ୍ରମଣ କରୁଛି।

ରୁଷିଆ-ୟୁକ୍ରେନ ଯୁଦ୍ଧ ମାମଲାରେ ଆମେରିକା ଭାରତକୁ ଟାଣୁଛି । ଡୋନାଲ୍ଡ ଟ୍ରମ୍ପ ପୂର୍ବରୁ ଅଭିଯୋଗ କରିଥିଲେ ଯେ ରୁଷିଆରୁ ତୈଳ କିଣି ଭାରତ ରୁଷିଆକୁ ଆର୍ଥିକ ସହାୟତା ଦେଉଛି। ଏହି କାରଣରୁ ସେ ଭାରତ ଉପରେ ୨୫ ପ୍ରତିଶତ ଅତିରିକ୍ତ ଟାରିଫ (ଟ୍ରମ୍ପ ଟାରିଫ) ଲଗାଇଛନ୍ତି। ଏବେ ତାଙ୍କ ଘନିଷ୍ଠ ସହଯୋଗୀ ତଥା ହ୍ୱାଇଟ ହାଉସ୍‌ର ପରାମର୍ଶଦାତା ପିଟର ନାଭାରୋ ରୁଷିଆ-ୟୁକ୍ରେନ ଯୁଦ୍ଧକୁ 'ମୋଦୀଙ୍କ ଯୁଦ୍ଧ' (Modi's War) ବୋଲି କହିଛନ୍ତି। ଟ୍ରମ୍ପଙ୍କ ୫୦ ପ୍ରତିଶତ ଟାରିଫକୁ ସମର୍ଥନ କରିବା ଏବଂ ରୁଷିଆରୁ ତୈଳ ନ କିଣିବା ପାଇଁ ଚାପ ସୃଷ୍ଟି କରିବା ପାଇଁ ଆମେରିକା ପକ୍ଷରୁ ଲଗାତର ବୟାନବାଜି ଚାଲିଛି। ଏହି କ୍ରମରେ ପିଟର ନାଭାରୋ ଏକ ଅଜବ ଯୁକ୍ତି ଦର୍ଶାଇଛନ୍ତି। ନାଭାରୋ ଅଭିଯୋଗ କରିଛନ୍ତି ଯେ ରୁଷିଆରୁ ତୈଳ କିଣି ଭାରତ ୟୁକ୍ରେନ ଯୁଦ୍ଧକୁ ପ୍ରୋତ୍ସାହନ ଦେଉଛି ଏବଂ ଏହାକୁ 'ମୋଦିଙ୍କ ଯୁଦ୍ଧ' ବୋଲି ସେ କହିଛନ୍ତି। ବ୍ଲୁମବର୍ଗକୁ ଦେଇଥିବା ଏକ ସାକ୍ଷାତକାରରେ ସେ କହିଛନ୍ତି ଯେ ଯଦି ଭାରତ ରୁଷିଆରୁ ତୈଳ କିଣା ବନ୍ଦ କରେ, ତେବେ ତାହାକୁ ଆମେରିକୀୟ ଟାରିଫରେ ସିଧାସଳଖ ୨୫ ପ୍ରତିଶତ ରିହାତି ମିଳିପାରିବ।

ପିଟର ନାଭାରୋ ଆଗକୁ କହିଛନ୍ତି, ଯଦି ଭାରତ ରୁଷିଆରୁ ତୈଳ କିଣା ବନ୍ଦ କରେ ଏବଂ ଯୁଦ୍ଧ ସମାପ୍ତ କରିବାରେ ସହାୟତା କରେ, ତେବେ ତାହାକୁ ୨୫ ପ୍ରତିଶତ ରିହାତି ମିଳିପାରିବ। ଗଣତାନ୍ତ୍ରିକ ଦେଶମାନଙ୍କ ସହ ମିଶିବା ବଦଳରେ ଆପଣ ସ୍ୱେଚ୍ଛାଚାରୀ ଶାସକମାନଙ୍କ ସହ ମିଶୁଛନ୍ତି। ଆପଣ ଦଶନ୍ଧି ଧରି ଚୀନ ସହ ଏକ 'ଶାନ୍ତ ଯୁଦ୍ଧ'ରେ ଅଛନ୍ତି। ଚୀନ ଆପଣଙ୍କ ଅଞ୍ଚଳ ଉପରେ ଆକ୍ରମଣ କରିଛି। ସେମାନେ ଆପଣଙ୍କ ବନ୍ଧୁ ନୁହନ୍ତି ବୋଲି କହିଛନ୍ତି ପିଟର ନାଭାରୋ ।

ନାଭାରୋଙ୍କୁ ଏହା ମଧ୍ୟ ପଚରାଯାଇଥିଲା ଯେ ଟାରିଫ ନେଇ ଆମେରିକା ଭାରତ ସହ ଆଲୋଚନା କରୁଛି କି ଏବଂ ଏହି ମାମଲାରେ କୌଣସି ଚୁକ୍ତିର ସମ୍ଭାବନା ଅଛି କି ? ହ୍ୱାଇଟ ହାଉସ୍‌ର ପରାମର୍ଶଦାତା ଭାରତର ଆଭିମୁଖ୍ୟ ଉପରେ ନିରାଶା ପ୍ରକାଶ କରିଛନ୍ତି। ସେ କହିଛନ୍ତି, ମୁଁ ଆଶ୍ଚର୍ଯ୍ୟ ହେଉଛି। କାରଣ ମୋଦୀ ଜଣେ ମହାନ ନେତା। ଏହା ଏକ ପରିପକ୍ୱ ଗଣତନ୍ତ୍ର ଏବଂ ଏହାକୁ ପରିପକ୍ୱ ଲୋକମାନେ ଚଳାଉଛନ୍ତି... ସେମାନେ କହୁଛନ୍ତି ଯେ ଅଧିକ ଟାରିଫ ଦେଇପାରିବେ ନାହିଁ ଏବଂ ଯାହାଠାରୁ ଇଚ୍ଛା ତୈଳ କିଣିବା ତାଙ୍କର ସାର୍ବଭୌମତ୍ୱ... ।

ଭାରତ ରୁଷିଆରୁ କମ ମୂଲ୍ୟରେ ତୈଳ କିଣୁଛି। ରୁଷିଆ ସେଥିରୁ ମିଳୁଥିବା ଟଙ୍କାକୁ ନିଜ ଯୁଦ୍ଧ ଯନ୍ତ୍ରପାତି ଏବଂ ଅଧିକ ୟୁକ୍ରେନୀୟଙ୍କୁ ହତ୍ୟା କରିବାରେ ବ୍ୟବହାର କରୁଛି । ହ୍ୱାଇଟ ହାଉସ୍‌ର ପରାମର୍ଶଦାତା ଯୁକ୍ତି ଦେଇଛନ୍ତି ଯେ ଏହାର ପ୍ରଭାବ ଆମେରିକୀୟ ଅର୍ଥନୀତି ଉପରେ ମଧ୍ୟ ପଡ଼ୁଛି। ସେ କହିଛନ୍ତି, ଏହା ଉପଭୋକ୍ତା, ବ୍ୟବସାୟ ଏବଂ ସବୁକିଛିକୁ କ୍ଷତି ପହଞ୍ଚାଉଛି... କାରଣ ଭାରତର ଭାରି ଟାରିଫ ହେତୁ ଆମେ ଚାକିରୀ, କାରଖାନା, ଆୟ ଏବଂ ମଜୁରୀରେ କ୍ଷତିଗ୍ରସ୍ତ ହେଉଛୁ। ଏବଂ ତା’ପରେ କରଦାତାମାନେ ମଧ୍ୟ କ୍ଷତିଗ୍ରସ୍ତ ହେଉଛନ୍ତି କାରଣ ଆମକୁ 'ମୋଦୀଙ୍କ ଯୁଦ୍ଧ' ପାଇଁ ଅର୍ଥ ଯୋଗାଡ଼ କରିବାକୁ ପଡ଼ୁଛି।

ଗତ ସପ୍ତାହରେ ମଧ୍ୟ ନାଭାରୋ ଭାରତ ଉପରେ ଏହି ପ୍ରକାରର ଅଭିଯୋଗ କରିଥିଲେ। ସେ କହିଥିଲେ, ଭାରତ ଆମକୁ ଜିନିଷ ବିକ୍ରି କରି ଯେଉଁ ଟଙ୍କା ରୋଜଗାର କରୁଛି, ସେଥିରେ ସେ ରୁଷିଆରୁ ତୈଳ କିଣୁଛି, ଯାହାକୁ ରିଫାଇନାରୀମାନେ ପ୍ରକ୍ରିୟାକରଣ କରି ବହୁତ ଟଙ୍କା ରୋଜଗାର କରୁଛନ୍ତି। କିନ୍ତୁ ତା’ପରେ ରୁଷିଆ ଏହି ଟଙ୍କାକୁ ଅସ୍ତ୍ରଶସ୍ତ୍ର ତିଆରି ଏବଂ ୟୁକ୍ରେନୀୟଙ୍କୁ ହତ୍ୟା କରିବାରେ ବ୍ୟବହାର କରୁଛି । ତେଣୁ ଆମେରିକୀୟ କରଦାତାମାନଙ୍କୁ ୟୁକ୍ରେନୀୟଙ୍କୁ ଅଧିକ ସାମରିକ ସହାୟତା ଦେବାକୁ ପଡ଼ୁଛି। ଏହା ପାଗଳାମୀ।

ଉଲ୍ଲେଖଯୋଗ୍ୟ ଯେ ଅଗଷ୍ଟ ୨୭ରୁ ଭାରତ ଉପରେ ୫୦ ପ୍ରତିଶତର ଆମେରିକୀୟ ଟାରିଫ ଲାଗୁ ହୋଇଛି।