Sujata’s Entry Draws Attention: ଶଙ୍ଖ ଶିବିରରେ ସୁଜାତାଙ୍କ ଏଣ୍ଟ୍ରି, ଚର୍ଚ୍ଚା ବଢ଼ାଇଲା ଆଜି ବବିଙ୍କ ଅନୁପସ୍ଥିତି
ସସପେନ୍ସ ଉଠିଲା। ବାଦ ବିବାଦର ଅନ୍ତ ଘଟାଇ ଶେଷରେ ବିଜେଡିରେ ସାମିଲ ହେଲେ ସୁଜାତା କାର୍ତ୍ତିକେୟନ। ଆଜି ବିଧିବଦ୍ଧ ଭାବେ ଶଙ୍ଖ ଭବନରେ ବରିଷ୍ଠ ନେତା, ବିଧାୟକ ଓ ସାଂସଦଙ୍କ ଉପସ୍ଥିତିରେ ସୁଜାତାଙ୍କୁ ଦଳରେ ସାମିଲ କରାଇଛନ୍ତି ସୁପ୍ରିମୋ ନବୀନ ପଟ୍ଟନାୟକ। ସ୍ବାମୀ ଭିକେ ପାଣ୍ଡିଆନ୍ ରାଜନୀତିରେ ବିଫଳ ହୋଇ ସନ୍ନ୍ୟାସ ନେବା ପରେ, ଏବେ ଧର୍ମପତ୍ନୀ ତଥା ଆଇଏଏସ୍ ଚାକିରିରୁ ସ୍ବେଚ୍ଛାକୃତ ଅବସର ନେଇଥିବା ସୁଜାତା ବିଜେଡିରେ ରାଜନୈତିକ କ୍ୟାରିୟର ଆରମ୍ଭ କରିଛନ୍ତି।
ଏଥର କିନ୍ତୁ ନବୀନଙ୍କ ନୂଆ ଷ୍ଟ୍ରାଟେଜି। ସୁଜାତାଙ୍କ ଠାରୁ ହଟିଲା କାର୍ତ୍ତିକେୟନ ଟ୍ୟାଗ୍। ଆଣ୍ଟି ପାଣ୍ଡିଆନ୍ ଅସନ୍ତୋଷରୁ ବର୍ତ୍ତିବା ପାଇଁ ନବୀନ ଆଜି ସୁଜାତା ରାଉତ କାର୍ତ୍ତିକେୟନ ବଦଳରେ ସୁଜାତା ରାଉତ କହି ସମ୍ବୋଧନ କରିଛନ୍ତି। ସ୍ବାମୀ ଭି. କାର୍ତ୍ତିକେୟନ ପାଣ୍ଡିଆନଙ୍କ ନାଁ ଅନୁସାରେ ସୁଜାତାଙ୍କ ପ୍ରକୃତ ନାଁ ସୁଜାତା ରାଉତ କାର୍ତ୍ତିକେୟନ। କିନ୍ତୁ ନବୀନ ଆଜି କାର୍ତ୍ତିକେୟନକୁ କାଟି ସୁଜାତା ରାଉତ କହିଛନ୍ତି। ଅର୍ଥାତ ତାମିଲ୍ ବୋହୂ ବଦଳରେ ଓଡ଼ିଆ ଝିଅ ଭାବେ ତାଙ୍କୁ ପରିଚିତ କରାଇବାକୁ ନବୀନ ଏଭଳି ଚାଲ୍ ଆପଣାଇ ଓଡ଼ିଆ ଅସ୍ମିତା କାର୍ଡ ଖେଳିଥିବା ଚର୍ଚ୍ଚା ହେଉଛି। ଏହାସହ ସୁଜାତା ତାଙ୍କ ଉତ୍ତରାଧିକାରୀ ନୁହଁନ୍ତି ବୋଲି ମଧ୍ୟ ସ୍ପଷ୍ଟ କରିଛନ୍ତି। କହିଛନ୍ତି ବିଜେଡି ଆସନ୍ତା ନିର୍ବାଚନ ମୋ ନେତୃତ୍ବରେ ହିଁ ଲଢ଼ିବ।
ଅପରପକ୍ଷେ ସୁଜାତାଙ୍କ ଏଣ୍ଟ୍ରି ଉତ୍ସବରେ କିନ୍ତୁ ପୂର୍ବତନ ସଂଗଠନ ସମ୍ପାଦକ ତଥା ଦିନ ବିଜେଡିର ଦ୍ବିତୀୟ କ୍ଷମତା କେନ୍ଦ୍ର କୁହାଯାଉଥିବା ବବି ଦାସ ଥିଲେ ଅନୁପସ୍ଥିତ। ବବିଙ୍କ ଅନୁପସ୍ଥିତି ଅନେକ କିଛି ଚର୍ଚ୍ଚାକୁ ଖୋରାକ ଯୋଗାଇଛି। ବିଜେଡି ଶିବିରରେ ଚର୍ଚ୍ଚା ହେଉଛି ଯେ ବବି ଏବେ ଦଳରେ କୋଣଠେସା। କିଛି ଦିନ ତଳେ ନବୀନ ଡାକିଥିବା ହାରୁ ନେତାଙ୍କ ବୈଠକରେ ବି ବବି କେବଳ ହାଜିରା ପକାଇ ଅଧାରୁ ପଳାଇ ଆସିଥିଲେ। କେବଳ ବବି ନୁହଁନ୍ତି, ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ, ରାଜନୈତିକ ବ୍ୟାପାର କମିଟି ସଦସ୍ୟ ବିକ୍ରମ ଆରୁଖ, ବିଧାୟକ ରାଜା ସ୍ବାଇଁ, ବଦ୍ରି ପାତ୍ର, ଲତିକା ପ୍ରଧାନ ଓ ଭୂପିନ୍ଦର ସିଂ ଙ୍କ ଭଳି ବରିଷ୍ଠଙ୍କର ମଧ୍ୟ ଦେଖା ନଥିଲା।
ପୂର୍ବରୁ ବଦ୍ରି ଓ ଭୂପିନ୍ଦର ସୁଜାତାଙ୍କ ଏଣ୍ଟ୍ରିକୁ ଖୋଲାଖୋଲି ବିରୋଧ କରିଥିଲେ। ବିକ୍ରମ ଆରୁଖ ଦଳ କାର୍ଯ୍ୟକ୍ରମରେ ଅଧିକାଂଶ ସମୟରେ ଅନୁପସ୍ଥିତ ରହୁଛନ୍ତି। ଯେଉଁଥିରୁ ସ୍ପଷ୍ଟ ଯେ, ବିଜେଡିର କିଛି ଅସନ୍ତୋଷ ଏବେ ବି ରହିଛି, ଯାହାକି ଆଗକୁ ବିସ୍ଫୋରଣର ରୂପ ନେଇପାରେ। ଦଳ କିନ୍ତୁ ତାଳି ପକାଇ କହିଛି ବ୍ୟକ୍ତିଗତ କାରଣ ପାଇଁ କେହି ଆସିପାରିନଥିବେ। ଅସନ୍ତୁଷ୍ଟଙ୍କୁ ବୁଝାଯିବ।
ବିପର୍ଯ୍ୟୟ ପରେ ବିଜେଡିରୁ ତିନି ସାଂସଦ ବିଜେପିକୁ ଡେଇଁ ସାରିଲେଣି। ପ୍ରତିଦିନ ନେତା ଓ କର୍ମୀ ତୃଣମୂଳ ସ୍ତରରୁ ଛାଡୁଛନ୍ତି। ଏଭଳି ସ୍ଥଳେ ସୁଜାତାଙ୍କ ଦଳରେ ଯୋଗ ଦେବା ଦଳ ଭିତର ବିଦ୍ରୋହକୁ ଆହୁରି ଅଧିକ ଇନ୍ଧନ ଯୋଗାଇବ ବୋଲି ବିଜେଡିର ଅନ୍ଦର ମହଲରେ ଚର୍ଚ୍ଚା ହେଉଛି।...
