Software Engineer Suicide :୧୫ ଲକ୍ଷ ଟଙ୍କା ନଗଦ, ୧୫୦ ଗ୍ରାମ ସୁନାର ଅଳଙ୍କାର..ତଥାପି ବଞ୍ଚିଲାନି ଜୀବନ

ମଙ୍ଗଳବାର ରାତିରେ ଘରେ ଜଣେ ୨୭ ବର୍ଷୀୟ ସଫ୍ଟୱେୟାର ଇଞ୍ଜିନିୟରଙ୍କ ଶବ ଝୁଲୁଥିବା ଅବସ୍ଥାରେ ମିଳିଥିଲା। ତାଙ୍କ ପିତାମାତା ପୁଲିସରେ ଅଭିଯୋଗ କରିଛନ୍ତି ଯେ ଯୌତୁକ ପାଇଁ ନିରନ୍ତର ହଇରାଣ କରାଯିବା କାରଣରୁ ତାଙ୍କ ଝିଅ ଆତ୍ମହତ୍ୟା କରିଛନ୍ତି।

କହିବାକୁ ଗଲେ ଏବେ ପୁଅ ଓ ଝିଅ ମଧ୍ୟରେ କୌଣସି ପାର୍ଥକ୍ୟ ନାହିଁ । ଲାଗୁଛି ଯଦି ଝିଅ ପାଠପଢ଼ି ଯୋଗ୍ୟ ହୋଇପାରେ, ତେବେ ସେ ପୁରୁଣା ବନ୍ଧନରୁ ମୁକ୍ତି ପାଇପାରିବ। ସେ ଏକ ସ୍ୱାଧୀନ ଜୀବନ ବଞ୍ଚିପାରିବ । କିନ୍ତୁ ଏସବୁ କେବଳ ଏକ ଭାବନା ମାତ୍ର । ସମାଜରେ ଆଜି ମଧ୍ୟ ଏପରି ଘଟଣା ଘଟୁଛି ଯାହା ହୃଦୟକୁ ଥରାଇ ଦେଉଛି। ଏପରି ଏକ ଘଟଣା ଦକ୍ଷିଣ ବେଙ୍ଗାଲୁରୁର ସୁଡ୍ଡାଗୁଣ୍ଟେପାଲ୍ୟାରେ ଘଟିଛି।

ମଙ୍ଗଳବାର ରାତିରେ ଘରେ ଜଣେ ୨୭ ବର୍ଷୀୟ ସଫ୍ଟୱେୟାର ଇଞ୍ଜିନିୟରଙ୍କ ଶବ ଝୁଲୁଥିବା ଅବସ୍ଥାରେ ମିଳିଥିଲା। ତାଙ୍କ ପିତାମାତା ପୁଲିସରେ ଅଭିଯୋଗ କରିଛନ୍ତି ଯେ ଯୌତୁକ ପାଇଁ ନିରନ୍ତର ହଇରାଣ କରାଯିବା କାରଣରୁ ତାଙ୍କ ଝିଅ ଆତ୍ମହତ୍ୟା କରିଛନ୍ତି।

ଫୁଡ୍ ବିଜନେସ ଆରମ୍ଭ କରିଥିଲେ

ଶିଳ୍ପାଙ୍କ ବିବାହ ପ୍ରାୟ ଦୁଇ ବର୍ଷ ଛଅ ମାସ ପୂର୍ବେ ପ୍ରବୀଣଙ୍କ ସହ ହୋଇଥିଲା। ସେ ମଧ୍ୟ ପୂର୍ବରୁ ସଫ୍ଟୱେୟାର ଇଞ୍ଜିନିୟର ଥିଲେ, ଏବଂ ସେମାନଙ୍କର ଗୋଟିଏ ପିଲା ଅଛି, ଯାହାର ବୟସ ଏକ ବର୍ଷ ଛଅ ମାସ। ଶିଳ୍ପା ଇଞ୍ଜିନିୟରିଂରେ ଗ୍ରାଜୁଏସନ ଶେଷ କରିଥିଲେ ଏବଂ ବିବାହ ପୂର୍ବରୁ ଇନଫୋସିସରେ ସଫ୍ଟୱେୟାର ଇଞ୍ଜିନିୟର ଭାବେ କାମ କରୁଥିଲେ। ପ୍ରବୀଣ ମଧ୍ୟ ଜଣେ ସଫ୍ଟୱେୟାର ଇଞ୍ଜିନିୟର ଥିଲେ ଏବଂ ଓରାକଲରେ କାମ କରୁଥିଲେ, କିନ୍ତୁ ବିବାହର ଏକ ବର୍ଷ ପରେ ସେ ଚାକିରି ଛାଡ଼ି ଫୁଡ୍ ବିଜନେସ ଆରମ୍ଭ କରିଥିଲେ।

ଯୌତୁକରେ ଦିଆଯାଇଥିଲା ୧୫ ଲକ୍ଷ ଟଙ୍କା

ଶିଳ୍ପାଙ୍କ ପିତାମାତାଙ୍କ ଅଭିଯୋଗ ଅନୁଯାୟୀ, ପ୍ରବୀଣଙ୍କ ପରିବାର ବିବାହ ସମୟରେ ୧୫ ଲକ୍ଷ ଟଙ୍କା ନଗଦ, ୧୫୦ ଗ୍ରାମ ସୁନାର ଅଳଙ୍କାର ଏବଂ ଘରୋଇ ସାମଗ୍ରୀ ଦାବି କରିଥିଲେ। ଏହି ଦାବିଗୁଡ଼ିକ ପୂରଣ କରାଯାଇଥିଲେ ମଧ୍ୟ, ଶିଳ୍ପାଙ୍କ ଶାଶୁଘର ଲୋକେ ବିବାହ ପରେ ଅତିରିକ୍ତ ଟଙ୍କା ଏବଂ ମୂଲ୍ୟବାନ ସାମଗ୍ରୀ ଦାବି କରିଥିଲେ। ପରିବାରର ଦାବି ଅନୁଯାୟୀ, ଯୌତୁକକୁ ନେଇ ବାରମ୍ବାର ତାତି ଓ ମାନସିକ ନିର୍ଯାତନା କାରଣରୁ ଶିଳ୍ପା ଆତ୍ମହତ୍ୟା କରିଥିଲେ।

ଶିଳ୍ପାଙ୍କ ପରିବାର ଆହୁରି ଅଭିଯୋଗ କରିଛନ୍ତି ଯେ ତାଙ୍କୁ ତାଙ୍କ ରଙ୍ଗକୁ ନେଇ ମଧ୍ୟ ଅପମାନିତ କରାଯାଉଥିଲା । ପୁଲିସ ଅଭିଯୋଗ ଅନୁଯାୟୀ, ଶାଶୁ କଥିତ ରୂପେ କହିଥିଲେ, "ତୁମେ କଳା ଓ ମୋ ପୁଅ ପାଇଁ ଉପଯୁକ୍ତ ଯୋଡ଼ି ନୁହେ। ତାକୁ ଛାଡ଼ି ଦିଅ, ଆମେ ତା’ ପାଇଁ କୌଣସି ଭଲ ବଧୂ ଖୋଜି ନେବୁ।

ସ୍ୱାମୀ ହେପାଜତରେ, ପଚରାଉଚୁରା ଚାଲିଛି

ଅଭିଯୋଗରେ ଆହୁରି କୁହାଯାଇଛି ଯେ ଛଅ ମାସ ପୂର୍ବେ, ପ୍ରବୀଣଙ୍କ ପରିବାର ବ୍ୟବସାୟରେ ସାହାଯ୍ୟ ପାଇଁ ୫ ଲକ୍ଷ ଟଙ୍କା ଦାବି କରିଥିଲେ, ଯାହା ଶିଳ୍ପାଙ୍କ ପରିବାର ଦେଇଥିଲେ। ସୁଡ୍ଡାଗୁଣ୍ଟେପାଲ୍ୟା ପୁଲିସ ଯୌତୁକ ନିର୍ଯାତନା ଏବଂ ଅପ୍ରାକୃତିକ ମୃତ୍ୟୁ ମାମଲା ରୁଜୁ କରିଛି ଏବଂ ପ୍ରବୀଣଙ୍କୁ ପଚରାଉଚୁରା ପାଇଁ ହେପାଜତରେ ନେଇଛି । ଜଣେ ସହକାରୀ ପୁଲିସ କମିଶନର ସ୍ତରର ଅଧିକାରୀ ତଦନ୍ତର ନେତୃତ୍ୱ ନେଇଛନ୍ତି ଏବଂ ଶିଳ୍ପାଙ୍କ ଶବ ପୋଷ୍ଟମର୍ଟମ ପରେ ତାଙ୍କ ପିତାମାତାଙ୍କୁ ହସ୍ତାନ୍ତର କରାଯାଇଛି।

ଜଣେ ପୁଲିସ ଅଧିକାରୀ କହିଛନ୍ତି, "ପୀଡ଼ିତାଙ୍କ ପରିବାର ସମସ୍ତ ଅଭିଯୋଗ ଲଗାଇଛନ୍ତି। ଆମେ ପ୍ରୋଟୋକଲ ଅନୁଯାୟୀ ଯୌତୁକ ହତ୍ୟା ମାମଲା ରୁଜୁ କରିଛୁ। ସ୍ୱାମୀଙ୍କୁ ପଚରାଉଚୁରା କରାଯାଉଛି ଏବଂ ଆମେ ଅଭିଯୋଗର ସତ୍ୟତା ଜାଣିବାକୁ ଚେଷ୍ଟା କରୁଛୁ।"