ଅନେକ ଥର ପୋଡି ଦେଇଥିଲେ କୋରାନ, ରାୟ ଆସିବା ଦିନ ଆସିଲା ମୃତ୍ୟୁ

ଷ୍ଟକହୋମ,୩୦।୧: ସ୍ବିଡେନରେ ଅନେକ ଥର କୋରାନ ଜାଳିଥିବା ଇରାକୀ ବ୍ୟକ୍ତି ସଲୱାନ ମୋମିକାଙ୍କ ମୃତ୍ୟୁ ହୋଇଛି ବୋଲି ଗୁରୁବାର ଷ୍ଟକହୋମର ଏକ କୋର୍ଟ ପ୍ରକାଶ କରିଛି। ଗୁରୁବାର ଏକ କୋରାନ ଜାଳିବା ମାମଲାରେ କୋର୍ଟ ଏହାର ରାୟ ଘୋଷଣା କରିବାର ଥିଲା।
୩୮ ବର୍ଷୀୟ ସଲୱାନ ମୋମିକା ସ୍ବିଡେନରେ ଇସଲାମର ପବିତ୍ର ପୁସ୍ତକ ପୋଡ଼ିବା ଏବଂ ଅପମାନିତ କରିବାର ଅନେକ ଘଟଣା ଘଟାଇଥିଲେ। ତାଙ୍କର କୋରାନ ଜାଳିବାର ଭିଡିଓ ସୋସିଆଲ ମିଡିଆ ମାଧ୍ୟମରେ ସାରା ବିଶ୍ୱରେ ଭାଇରାଲ ହୋଇଥିଲା। ତାଙ୍କ କାର୍ଯ୍ୟ ଉପରେ ସାରା ବିଶ୍ୱରୁ ପ୍ରତିକ୍ରିୟା ଆସିଥିଲା। ଅନେକ ମୁସଲିମ ଦେଶରେ ତାଙ୍କୁ ସମାଲୋଚନା କରାଯାଇଥିଲା ଏବଂ ଲୋକମାନେ ତାଙ୍କ ଉପରେ କ୍ରୋଧ ପ୍ରକାଶ କରିଥିଲେ। ଅନେକ ସ୍ଥାନରେ ଦଙ୍ଗା ଏବଂ ଅଶାନ୍ତି ମଧ୍ୟ ବ୍ୟାପିଥିଲା। ଏହି ମାମଲାରେ ସ୍ବିଡେନରେ ତାଙ୍କ ବିରୁଦ୍ଧରେ ତଦନ୍ତ ମଧ୍ୟ ଚାଲିଥିଲା।

ଆସୋସିଏଟେଡ ପ୍ରେସ ଅନୁଯାୟୀ, ଷ୍ଟକହୋମ ଜିଲା କୋର୍ଟ କହିଛି ଯେ ଗୁରୁବାର ଏକ ମାମଲାର ରାୟ ପ୍ରକାଶ ପାଇବାକୁ ସ୍ଥିର କରାଯାଇଥିଲା, କିନ୍ତୁ ଜଣେ ଅଭିଯୁକ୍ତଙ୍କ ମୃତ୍ୟୁ ହୋଇଥିଲା। ଏହି କାରଣରୁ ନିଷ୍ପତ୍ତିକୁ ସ୍ଥଗିତ ରଖାଯାଇଛି। ପରେ, ସ୍ବିଡିସ ଖବର ସଂସ୍ଥା ‘ଟିଟି’ ରିପୋର୍ଟ କରିଥିଲା ଯେ କୋର୍ଟ ଯାହାଙ୍କ ମୃତ୍ୟୁ ବୋଲି କହିଛନ୍ତି, ଅଭିଯୁକ୍ତ ଜଣକ ମୋମିକା। କୋର୍ଟର କାଗଜପତ୍ର ଏବଂ ମାମଲାର ବିଚାରପତି ଗୋରାନ ଲୁଣ୍ଡାହଲଙ୍କ ନିଶ୍ଚିତକରଣ ଆଧାରରେ ଏଜେନ୍ସି ମୃତକଙ୍କୁ ମୋମିକା ଭାବରେ ଚିହ୍ନଟ କରିଛି।
ଯେତେବେଳେ ଷ୍ଟକହୋମ ପୋଲିସକୁ ଏ ବିଷୟରେ ପଚରାଗଲା, ସେମାନେ କହିଲେ ଯେ ବୁଧବାର ରାତିରେ ଷ୍ଟକହୋମ ନିକଟସ୍ଥ ସୋଡରଟାଲଜେରେ ଗୁଳିଚାଳନା ହୋଇଥିବାର ରିପୋର୍ଟ ମିଳିଛି। ଏଥିରେ ଗୁଳି ବାଜିବାରୁ ଜଣେ ଆହତ ହୋଇଥିଲେ, ଯାହାଙ୍କର ପରେ ମୃତ୍ୟୁ ହୋଇଥିଲା। ପୋଲିସ ମଧ୍ୟ ହତ୍ୟାକାଣ୍ଡର ତଦନ୍ତ ଆରମ୍ଭ କରିଛି।
ସ୍ବିଡିସ ଗଣମାଧ୍ୟମ ଅନୁସାରେ, ମୋମିକାଙ୍କୁ ତାଙ୍କ ଘର ଭିତରେ ଗୁଳି କରାଯାଇଥିଲା। ଯେତେବେଳେ ତାଙ୍କୁ ଗୁଳି କରାଯାଇଥିଲା, ସେତେବେଳେ ସେ TikTok ରେ ଲାଇଭ ଥିଲେ।

The post ଅନେକ ଥର ପୋଡି ଦେଇଥିଲେ କୋରାନ, ରାୟ ଆସିବା ଦିନ ଆସିଲା ମୃତ୍ୟୁ appeared first on Dharitri Odia News.