Odisha Flood Crisis: ବନ୍ୟା ଯେଗୁ ୨ ଲକ୍ଷ ୬୮ ହଜାର ଜଳବନ୍ଦୀ, ଉତ୍ତର ଓଡ଼ିଶାରେ ପାଣି ଖସୁଛି, ଦୁର୍ଦ୍ଦଶା ବଢ଼ୁଛି...

ଭୁବନେଶ୍ୱର/ସମ୍ବଲପୁର,୧/୦୮:  ଦୁଇଦିନ ହେବ ତଳମୁଣ୍ଡରେ ମହାନଦୀ ଦ୍ରୁତ  ଗତିରେ ଫୁଲୁଥିଲା । ଶୁକ୍ରବାର ସକାଳଠାରୁ  ଜଳସ୍ତର ଖସୁଛି । ସନ୍ଧ୍ୟା ୬ଟାବେଳେ  ମୁଣ୍ଡୁଳିରେ ସେକେଣ୍ଡ ପିଛା ୮ ଲକ୍ଷ ୨୦ ହଜାର  ଘନଫୁଟ ପାଣି ଚାଲିଥିଲା । ଖଇରମାଳରେ ୩  ଲକ୍ଷ ୩୦ ହଜାର ଘନଫୁଟ ଓ ବରମୂଳରେ ୬  ଲକ୍ଷ ୨ ହଜାର ଘନଫୁଟ ଥିଲା । ପଥରଲାରେ  ତେଲରୁ ଆସୁଥିବା ପାଣି ବି କମିଛି । ଆସୁଥିଲା  ୨ ଲକ୍ଷ ୬ ହଜାର ଘନଫୁଟ ।

ଅନୁମାନ କରାଯାଉଛି, ମହାନଦୀ  ଜଳସ୍ତର ସକାଳ ସୁଦ୍ଧା ଢେର କମିଯାଇପାରେ ।  କିନ୍ତୁ, ହୀରାକୁଦରୁ ଆସୁଥିବା ପାଣିକୁ ନେଇ  ଚିନ୍ତା ବଢ଼ିଛି । ହୀରାକୁଦ ଜଳଭଣ୍ଡାର ଜଳସ୍ତର  ବଢ଼ୁଥିବାରୁ ଶୁକ୍ରବାର ପର୍ଯ୍ୟାୟ କ୍ରମେ ଆଉ  ୨୦ଟି ଗେଟ୍‌ ଖୋଲାଯାଇଛି । ଯଦିଓ ଏହି  ପାଣି ମୁଣ୍ଡୁଳିରେ ପହଞ୍ଚିଲାବେଳକୁ ଶନିବାର  ବିଳମ୍ବିତ ରାତି ହୋଇଯିବ । ସେତେବେଳକୁ  ତଳମୁଣ୍ଡରେ ମହାନଦୀ ଜଳସ୍ତର ବହୁ  ମାତ୍ରାରେ କମିଯାଇଥିବ । ତେଣୁ ଯେଉଁ ପାଣି  ଆସି ନଦୀରେ ନଦୀରେ ଚାଲିଯିବ । ସନ୍ଧ୍ୟା ୬ଟା ବେଳର ରିପୋର୍ଟ ଅନୁସାରେ  ହୀରାକୁଦ ଜଳସ୍ତର ୬୨୫ ଫୁଟ ଉପରେ ଥିଲା । ୨୨ଟି ଗେଟ ଦେଇ ପାଣି ଛଡ଼ାଯାଉଛି । ପ୍ରତି  ସେକେଣ୍ଡରେ ଜଳଭଣ୍ଡାରକୁ ୪ ଲକ୍ଷ ୨୨ ହଜରାର  ୯୬୮ ଘନଫୁଟ ପାଣି ପ୍ରବେଶ କରୁଛି । ନିଷ୍କାସିତ  ହେଉଛି ୩ ଲକ୍ଷ ୫୬ ହଜାର ଘନଫୁଟ ।

​​​​​​​ଅଧିକ ପଢ଼ନ୍ତୁ :- Weather Forecast: ଜୁଲାଇ ନିର୍ଧୁମ ଢାଳିଲା, ଅଗଷ୍ଟ ଓ ସେପ୍ଟେମ୍ବରରେ ଓଡ଼ିଶାରେ କମ ବର୍ଷା ସମ୍ଭାବନା, ଆଜି ୨୦ ଜିଲ୍ଲାକୁ ୟେଲୋ ୱାର୍ଣ୍ଣିଂ​​​​​​​

ହୀରାକୁଦ ଜଳଭଣ୍ଡାର ମୁଖ୍ୟଯନ୍ତ୍ରୀ ଇଂ.  ପ୍ରତାପ ଚନ୍ଦ୍ର ଚୌଧୁରୀ କହିଛନ୍ତି, ତଳମୁଣ୍ଡରେ  ଏବେ ବନ୍ୟା ସ୍ଥିତି ନାହିଁ । ବହୁ ପରିମାଣରେ  ଜଳସ୍ତର ଖସିବାରେ ଲାଗିଛି । ହୀରାକୁଦର  ଆଉ ଅଧିକ ଗେଟ ଖୋଲିବ କି ନାହିଁ, ଶନିବାର  ନିଷ୍ପତ୍ତି ନିଆଯିବ । ଉପରମୁଣ୍ଡରେ ଏବେ ବର୍ଷା  ନାହିଁ । ଆଗକୁ ଛତିଶଗଡ ଅଞ୍ଚଳରେ ବିଶେଷ ବର୍ଷା ସମ୍ଭାବନା ନଥିବାରୁ ବନ୍ୟା ଜଳ ନିଷ୍କାସନରେ କୌଣସି ଅସୁବିଧା ହେବ ନାହିଁ ।  ଆସନ୍ତା ୪ତାରିଖ ବେଳରୁ ପୁଣି ବର୍ଷା ସମ୍ଭାବନା  ଅଛି । ଏହି ସମୟ ସୁଦ୍ଧା ହୀରାକୁଦର ବନ୍ୟା ଜଳ  ନିଷ୍କାସନ ସରିଥିବ ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବନ୍ୟା ସ୍ଥିତି  ଉପରେ ନଜର ରଖିଛନ୍ତି । ଶନିବାର ମୁଖ୍ୟମନ୍ତ୍ରୀ  ଶ୍ରୀ ମାଝୀ ଆକାଶ ମାର୍ଗରୁ ଯାଜପୁର, ଭଦ୍ରକ,  ବାଲେଶ୍ୱର, କେନ୍ଦୁଝର ବନ୍ୟା ସ୍ଥିତି ଅନୁଧ୍ୟାନ କରିବେ । ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଏବଂ  ଏସଆରସି ରାଜେଶ ପ୍ରଭାକର ପାଟିଲ ମଧ୍ୟ  ତାଙ୍କ ସହ ରହିବେ । ବନ୍ୟା ଜଳ ଛାଡ଼ିବାର ୭୨  ଘଣ୍ଟା ମଧ୍ୟରେ କ୍ଷତିଗ୍ରସ୍ତ ଚାଷଜମିର କ୍ଷୟକ୍ଷତି  ଆକଳନ କରି ରିପୋର୍ଟ ଦେବାକୁ ଜିଲ୍ଲାପାଳଙ୍କୁ  ନିର୍ଦ୍ଦେଶ ଦିଆଯାଇଛି ।  

ବନ୍ୟା ସ୍ଥିତି ନେଇ ଲୋକସେବା ଭବନଠାରେ  ରାଜସ୍ୱ ମନ୍ତ୍ରୀ ଶ୍ରୀ ପୂଜାରୀ ବରିଷ୍ଠ ଅଧିକାରୀ ଏବଂ  ଜିଲ୍ଲାପାଳମାନଙ୍କ ସହିତ ଆଲୋଚନା କରି ସ୍ଥିତି  ସମୀକ୍ଷା କରିଥିଲେ । ସମୀକ୍ଷାରୁ ଜଣାଯାଇଛି,  ଚଳିତ ବନ୍ୟାରେ ୧୪ ଜିଲ୍ଲା ଅନ୍ତର୍ଗତ ୬୫ଟି  ବ୍ଲକ ଅଧୀନସ୍ଥ ୪୯୨ଟି ପଞ୍ଚାୟତର ୧୪୪୬ଟି  ଗାଁ ଓ ୧୩ଟି ସହରାଞ୍ଚଳର ୨୦୧ଟି ୱାର୍ଡ ପ୍ରଭାବିତ  ହୋଇଛି । ରାଜ୍ୟର ପ୍ରାୟ ୮ ଲକ୍ଷ ୩୪ ହଜାର  ୭୪୧ ଲୋକେ ପ୍ରଭାବିତ ହୋଇଛନ୍ତି । ପାଣି  ଘେରରେ ୨ ଲକ୍ଷ ୬୮ ହଜାର ୯୪୩ ଲୋକେ  ଅଛନ୍ତି । ୨ ଲକ୍ଷ ୬୭ ହଜାର ୩୦୧ ଲୋକଙ୍କୁ  ସ୍ଥାନାନ୍ତର କରାଯାଇଛି । ବର୍ତ୍ତମାନ ସୁଦ୍ଧା ହସ୍ତଗତ  ରିପୋର୍ଟ ଅନୁସାରେ ବନ୍ୟାରେ ୧୦୮୨ ଘର ନଷ୍ଟ  ହେବା ସହ ୨୧ ହଜାର ୩୮୦ ହେକ୍ଟର ଚାଷ ଜମି  କ୍ଷତିଗ୍ରସ୍ତ ହୋଇଛି ।  

ମହାନଦୀ ବନ୍ୟା ଯୋଗୁ କଟକ, କେନ୍ଦ୍ରାପଡ଼ା,  ଜଗତସିଂହପୁର, ଖୋର୍ଦ୍ଧା, ପୁରୀ, ନୟାଗଡ଼ ଆଦି  ଜିଲ୍ଲାର ତଳି ଅଞ୍ଚଳବାସୀ ଭୟଭୀତ ଅଛନ୍ତି ।  ହୀରାକୁଦର ୨୨ଟି ଗେଟ ଖୋଲାଯିବା ପରେ  ପଛୁଆ ଠେଲା ପାଣିରେ ସମ୍ବଲପୁର-ସୋନପୁରୀ  ଯୋଗାଯୋଗ ବିଚ୍ଛିନ୍ନ ହୋଇଛି । ସମ୍ବଲପୁର  ସହର ଉପକଣ୍ଠ ମାଳତୀଗୁଣ୍ଡେରପୁରରେ ରାଜ୍ୟ  ରାଜପଥରେ ପାଣି ଚାଲିଥିବାରୁ ଗାଡ଼ିମୋଟର  ଚଳାଚଳ ବନ୍ଦ ହୋଇଛି ।  

କଟକର ଆଠଗଡ଼,  ବାଙ୍କୀ, ତିଗିରିଆର  ପ୍ରାୟ ୪୦ ଗାଁ ପାଣି ଘେରରେ ଅଛି । ବିଭିନ୍ନ ରାସ୍ତା  ବୁଡ଼ି ଯାଇଥିବାରୁ ଯୋଗାଯୋଗ ବିଚ୍ଛିନ୍ନ ରହିଛି ।  ଧାନ, ପନିପରିବା ସମେତ ବ୍ୟାପକ ଫସଲ  ନଷ୍ଟ ହୋଇଛି ।ନୟାଗଡ଼ର ଗଣିଆ ବ୍ଲକର ରାସଙ୍ଗ ପଞ୍ଚାୟତର ରାସଙ୍ଗ-କାଦୁଆ ରାସ୍ତାରେ ୫ ଫୁଟ ଉଚ୍ଚର ପାଣି ଚାଲିଥିବାବେଳେ ମଣିଭଦ୍ରା ବେଣ୍ଟପଡ଼ା ରାସ୍ତା ବୁଡ଼ିଯାଇଛି । ୩ଟି ପଞ୍ଚାୟତର  ପ୍ରାୟ ୪୧ ଗାଁ ବାହ୍ୟଜଗତରୁ ବିଚ୍ଛିନ୍ନ ରହିଛି ।

ସେହିପରି ଜଗତସିଂହପୁରର ତିର୍ତ୍ତୋଲ  ଓ କୁଜଙ୍ଗ ବ୍ଲକର ତଳି ଅଞ୍ଚଳରେ ବନ୍ୟା ପାଣି  ମାଡ଼ିଯାଇଛି । ଅନେକ ଗାଁ ପାଣି ଘେରରେ  ରହିଛି । କେନ୍ଦ୍ରାପଡ଼ାର କେନ୍ଦ୍ରାପଡ଼ା, ମାର୍ଶାଘାଇ, ଗରଦପୁର, ପଟ୍ଟାମୁଣ୍ଡାଇ, ଆଳି, ରାଜକନିକା,  ରାଜନଗର, ମହାକାଳପଡ଼ା ବ୍ଲକର ୧୩୫ ଗାଁ  ପାଣି ଘେରରେ  ଥିବା ସରକାରୀ ସୂଚନା ରହିଛି ।  ସ୍ଥାନୀୟ ସୂଚନାନୁସାରେ ମହାନଦୀ ଓ ବ୍ରାହ୍ମଣୀ ବନ୍ୟା ଯୋଗୁ ଜିଲ୍ଲାରେ ପ୍ରାୟ ଦେଢ଼ ଲକ୍ଷ ଲୋକେ  ପ୍ରଭାବିତ ହୋଇଛନ୍ତି ।  

ପୁରୀ ଜିଲ୍ଲାର ନିମାପଡ଼ା, ଗୋପ, ଅସ୍ତରଙ୍ଗ,  କଣାସର ତଳିଆ ଅଞ୍ଚଳରେ ପାଣି ପଶିଛି । ପିପିଲି  ବ୍ଲକ କଣ୍ଟି ପଞ୍ଚାୟତର ମୁଣ୍ଡା ଗାଁରେ ଦୟା ନଦୀ ପାଣି  ପ୍ରବେଶ କରିଛି । ଲୋକଙ୍କୁ ନିକଟସ୍ଥ ବହୁମୁଖୀ  ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି । ଦୟା  ଓ ରାଜୁଆ ନଦୀର ମଧ୍ୟ୍ୟବର୍ତ୍ତୀ ଅଞ୍ଚଳ ଦୋକନ୍ଦା, ବଡ଼ାସ, ଗଡ଼ ବଳଭଦ୍ରପୁର, ପାଣ୍ଡିଆକେରା ଗ୍ରାମ  ପଞ୍ଚାୟତର ଗ୍ରାମଗୁଡିକ ତିନିଦିନ ହେଲା ଜଳବନ୍ଦୀ  ରହିଛନ୍ତି । ବଗିପଡ଼ାଠାରୁ ଜଙ୍କିଆ ବଜାର ମଧ୍ୟରେ   କିଛି ଲୋକଙ୍କ ଘରେ ବନ୍ୟା ପାଣି ପଶିଛି । ଦୟା ଓ  ରାଜୁଆ ନଦୀର ବନ୍ୟା ଜଳ ବଢ଼ିବାରୁ ଖୋର୍ଦ୍ଧା ଜିଲ୍ଲା  ଜଟଣୀ ବ୍ଲକ ବେଣାପଞ୍ଜରୀ ପଞ୍ଚାୟତର ପାଣ୍ଡିଆବିଲି  ଓ ବୁଢ଼ାଙ୍ଗରା ଗାଁ ଏକପ୍ରକାର ବାହ୍ୟଜଗତରୁ ବିଚ୍ଛିନ୍ନ  ହୋଇଛି ।  

ଉତ୍ତର ଓଡ଼ିଶାରେ ନଦୀ ପାଣି  ଖସିଥିବାବେଳେ ବନ୍ୟା ପରର ଦୁର୍ଦ୍ଦଶା ବଢ଼ିଛି ।  ଭଦ୍ରକ ଜିଲ୍ଲାରେ ଶୁକ୍ରବାର ସନ୍ଧ୍ୟା ସୁଦ୍ଧା ୩ ଲକ୍ଷ  ୯୫ ହଜାର ୪୪୮ ଜଣ ପାଣି ଘେରରେ ରହିଛନ୍ତି । ସେମାନଙ୍କ ମଧ୍ୟରୁ ୧ ଲକ୍ଷ ୭୮ ହଜାର ୩୫୫  ଜଣଙ୍କୁ ସ୍ଥାନାନ୍ତର କରାଯାଇଛି । ଧାମନଗ ଓ  ତିହିଡ଼ିର ବନ୍ୟା ଜଳ ହ୍ରାସ ପାଇଛି । ହେଲେ ସମୁଦ୍ର  ତଟବର୍ତ୍ତୀ ଚାନ୍ଦବାଲିରେ ବନ୍ୟା ଜଳ ବଢ଼ିବାରେ  ଲାଗିଛି । ଧାମନଗର ବ୍ଲକ୍‌ ଫତେପୁର ଗାଁରେ  ପାଣିରେ ବୁଡ଼ି ୭ ବର୍ଷର ଶିଶୁ କନ୍ୟାଙ୍କ ମୃତ୍ୟୁ  ହୋଇଥିବା ଅଭିଯୋଗ ହୋଇଛି ।    

ବାଲେଶ୍ୱର ଜିଲ୍ଲାର ୧୨ଟି ବ୍ଲକର ୧୪୬ଟି  ପଞ୍ଚାୟତ ଅନ୍ତର୍ଗତ ୪୬୩ଟି ଗ୍ରାମ ଓ ୫ଟି  ସହରାଞ୍ଚଳର ୧୩୫ଟି ୱାର୍ଡର ପ୍ରାୟ ୧ ଲକ୍ଷ  ୪୭ ହଜାର ୬୫ ଜଣ ଲୋକ ବନ୍ୟା ଓ ଲଗାଣ  ବର୍ଷାରେ ପ୍ରଭାବିତ ହୋଇଛନ୍ତି । ଏପର୍ଯ୍ୟନ୍ତ ଜିଲ୍ଲାର  ବିଭିନ୍ନ ବ୍ଲକରେ ୧୩ଟି ଗାଁ ବାହ୍ୟ ଜଗତରୁ ବିଚ୍ଛିନ୍ନ   ରହିଛନ୍ତି । ଯାଜପୁର ଜିଲ୍ଲାରେ ବୈତରଣୀ, ବ୍ରାହ୍ମଣୀ  ଓ ଖରସ୍ରୋତାରେ ପାଣି ଖସିବାରେ ଲାଗିଛି । ଜିଲ୍ଲାର ୧୧୧ ପଞ୍ଚାୟତର ୩୨୮ ଗାଁର ୧ ଲକ୍ଷ  ୯୩ ହଜାର ଲୋକେ ପ୍ରଭାବିତ ହୋଇଛନ୍ତି । ୨୫  ହଜାର ହେକ୍ଟର ଚାଷ ଜମି ପାଣିରେ ବୁଡ଼ି ରହିଛି ।  କେନ୍ଦୁଝର ଓ ମୟୂରଭଞ୍ଜରେ ସ୍ଥିତି ସୁଧାର ଆସିଛି ।