'ତୁମ୍ବାଡ୍ ୨'ରେ ଆଲିଆ ଭଟ୍ଟଙ୍କ ଏଣ୍ଟ୍ରି; ସୋହୁମ ଶାହ କହିଲେ- 'ଏକ ନୂଆ ଅଧ୍ୟାୟର ଆରମ୍ଭ'
ବଲିଉଡର ଅନ୍ୟତମ ଲୋକପ୍ରିୟ ଅଭିନେତ୍ରୀ ଆଲିଆ ଭଟ୍ଟ ଏବେ ବହୁ ପ୍ରତୀକ୍ଷିତ ହରର୍ ଫିଲ୍ମ 'ତୁମ୍ବାଡ୍ ୨' (Tumbbad 2) ରେ ନଜର ଆସିବାକୁ ଯାଉଛନ୍ତି। ମଙ୍ଗଳବାର ଦିନ ନିର୍ମାତାମାନେ ଏହି ବିଷୟରେ ଔପଚାରିକ ଘୋଷଣା କରିଛନ୍ତି। ଏହି ଫିଲ୍ମରେ ସେ ମୁଖ୍ୟ ଅଭିନେତା ସୋହୁମ ଶାହ ଏବଂ ଲୋକପ୍ରିୟ ଅଭିନେତା ନୱାଜୁଦ୍ଦିନ ସିଦ୍ଦିକିଙ୍କ ସହ ସ୍କ୍ରିନ୍ ସେୟାର କରିବେ।
ଏହି ଖବରକୁ ସ୍ପଷ୍ଟ କରି ସୋହୁମ ଶାହ ନିଜ ଇନଷ୍ଟାଗ୍ରାମରେ ଲେଖିଛନ୍ତି ଯେ, "ଏକ ନୂଆ ଅଧ୍ୟାୟର ଆରମ୍ଭ ହେଉଛି। ତୁମ୍ବାଡ୍ ୨ କୁ ସ୍ୱାଗତ।" ଅନ୍ୟପକ୍ଷରେ ଆଲିଆ ଏହି ଅଫରକୁ ସ୍ୱୀକାର କରି କହିଛନ୍ତି ଯେ ୨୦୧୮ ମସିହାରେ 'ତୁମ୍ବାଡ୍' ଦେଖିବା ଦିନଠାରୁ ଏହା ତାଙ୍କ ମନରେ ଘର କରି ରହିଥିଲା। ଏହି ନୂଆ ଦୁନିଆର ଅଂଶବିଶେଷ ହେବା ତାଙ୍କ ପାଇଁ ବହୁତ ଖାସ୍। ସୂଚନାଯୋଗ୍ୟ ଯେ, ହରର୍-ଫାଣ୍ଟାସି ଜଗତରେ ଏହା ଆଲିଆ ଭଟ୍ଟଙ୍କର ପ୍ରଥମ ପୂର୍ଣ୍ଣାଙ୍ଗ ଫିଲ୍ମ ହେବ ଏବଂ ତାଙ୍କ ଚରିତ୍ର ଏହି ସିକ୍ୱେଲରେ ଏକ ବଡ଼ ମୋଡ଼ ଆଣିବ ବୋଲି ଆଶା କରାଯାଉଛି।
ବିଗ୍ ବଜେଟ୍ ଏବଂ ରିଲିଜ୍ ତାରିଖ
ସୂଚନା ଅନୁଯାୟୀ, ଆଦେଶ ପ୍ରସାଦଙ୍କ ନିର୍ଦ୍ଦେଶନାରେ ନିର୍ମିତ ହେଉଥିବା 'ତୁମ୍ବାଡ୍ ୨' ପୂର୍ବ ଫିଲ୍ମ ତୁଳନାରେ ଅଧିକ ବଡ଼ ସ୍ତରରେ ନିର୍ମାଣ ହେଉଛି। ଏହାର ବଜେଟ୍ ପ୍ରାୟ ୧୦୦ କୋଟି ଟଙ୍କା ବୋଲି ଜଣାପଡିଛି, ଯାହା ଏହାକୁ ବଲିଉଡର ସବୁଠାରୁ ବଡ଼ ହରର୍ ଫିଲ୍ମ ମଧ୍ୟରୁ ଗୋଟିଏରେ ପରିଣତ କରିବ। ମୁମ୍ବାଇରେ ୭ ରୁ ୮ ଏକର ପରିମିତ ଏକ ବିଶାଳ ସେଟ୍ ପ୍ରସ୍ତୁତ କରାଯାଇଛି। ଆସନ୍ତା ୩ ଡିସେମ୍ବର ୨୦୨୭ ରେ ଏହି ଫିଲ୍ମଟି ସିନେମାଘରକୁ ଆସିବ।
୨୦୧୮ରେ ରିଲିଜ୍ ହୋଇଥିବା ପ୍ରଥମ 'ତୁମ୍ବାଡ୍' ଫିଲ୍ମ ଏହାର ଭିଜୁଆଲ୍ସ ଏବଂ ମାଇଥୋଲୋଜି ପାଇଁ ଦର୍ଶକଙ୍କ ମଧ୍ୟରେ ଏକ ସ୍ୱତନ୍ତ୍ର ସ୍ଥାନ ବଜାୟ ରଖିପାରିଥିଲା। ଏବେ ସିକ୍ୱେଲର ଟ୍ୟାଗଲାଇନ୍ ରହିଛି "ପ୍ରଳୟ ଆସିବ" (Pralay Aayega)। ଆଲିଆଙ୍କ ଏଣ୍ଟ୍ରି ପରେ ଏହି ଫିଲ୍ମକୁ ନେଇ ଦର୍ଶକଙ୍କ ଉତ୍ସାହ ଏବଂ ଉତ୍କଣ୍ଠା ଆହୁରି ବଢିଯାଇଛି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ SAKALA - ସକାଳ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
