ଉଦଳା ମେଡିକାଲର ପ୍ରସୂତି ବିଭାଗରେ ଅଘଟଣ: ନବଜାତକକୁ ଧରି ବସିଥିବା ବେଳେ ପ୍ରସୂତିଙ୍କ ଉପରେ ପଡିଲା ଛାତ ସିଲିଂ
ମୟୂରଭଞ୍ଜ: ମୟୂରଭଞ୍ଜ ଜିଲ୍ଲା ଉଦଳା ମେଡିକାଲରେ ଅଘଟଣ । ଡାକ୍ତରଖାନାର ପ୍ରସୂତି ବିଭାଗ ୱାର୍ଡର ଛାତ ସିଲିଂ ଖସି ପଡ଼ିବାରୁ ଜଣେ ପ୍ରସୂତି ଆହତ ହୋଇଥିବା ବେଳେ ତାଙ୍କ ନବଜାତ ଶିଶୁ ଅଳ୍ପକେ ରକ୍ଷା ପାଇଯାଇଛି। ମିଳିଥିବା ସୂଚନା ଅନୁଯାୟୀ, ପ୍ରସୂତି ସଞ୍ଜୁଲତା ପାତ୍ର ନିଜ ନବଜାତ ଶିଶୁକୁ କୋଳରେ ଧରି ବେଡ୍ ଉପରେ ବସିଥିବା ବେଳେ ହଠାତ୍ ଛାତର ଏକ ଅଂଶ ଖସି ତାଙ୍କ ପିଠିରେ ପଡ଼ିଥିଲା। ଫଳରେ ସେ ଆହତ ହୋଇଛନ୍ତି। ତେବେ ସୌଭାଗ୍ୟବଶତଃ ଶିଶୁଟିର କୌଣସି କ୍ଷତି ହୋଇନାହିଁ। ଏହି ସମୟରେ ୱାର୍ଡ ଭିତରକୁ ପ୍ରବେଶ କରୁଥିବା ଅନ୍ୟ ଜଣେ ମହିଳାଙ୍କ ସ୍ୱାମୀ ମଧ୍ୟ ଖଣ୍ଡବିଖଣ୍ଡିତ ଛାତ ବାଜି ଆହତ ହୋଇଥିବା ଜଣାପଡ଼ିଛି।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଛାତରୁ ଲଗାତାର ପାଣି ଗଳୁଥିବାରୁ ଫଲ୍ସ ସିଲିଂଟି ଦୁର୍ବଳ ହୋଇଯାଇଥିଲା ଏବଂ ଶେଷରେ ତାହା ଖସିପଡ଼ିଥିଲା। ଛାତ ଖସିବା ସହ ୱାର୍ଡ ଭିତରକୁ ପାଣି ମଧ୍ୟ ପଶିଆସିଥିଲା। ଡାକ୍ତରଖାନାର ରକ୍ଷଣାବେକ୍ଷଣ ଅଭାବରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା ସାଧାରଣରେ ଅଭିଯୋଗ ହୋଇଛି। ଏହି ଘଟଣା ପରେ ହସ୍ପିଟାଲ ବିଲ୍ଡିଂର ଅବସ୍ଥା ଏବଂ ପ୍ରସୂତି ବିଭାଗ ୱାର୍ଡରେ ଭର୍ତ୍ତି ହୋଇଥିବା ରୋଗୀଙ୍କ ସୁରକ୍ଷାକୁ ନେଇ ଗମ୍ଭୀର ପ୍ରଶ୍ନବାଚୀ ସୃଷ୍ଟି ହୋଇଛି।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ SAKALA - ସକାଳ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
