K-9 Squad: ରାଉରକେଲା କେ-୯ ସ୍କ୍ୱାଡ୍ର ଶକ୍ତି ରବି, ୟୁଗ୍ ଓ ସ୍ୟାଣ୍ଡି; ବିଶ୍ୱସ୍ତ ଯେମିତି, ବିଚକ୍ଷଣ ବି ସେମିତି...
ରାଉରକେଲା,୦୪/୦୮(ହିମାଂଶୁ ଗୌଡ଼): ବିଶ୍ୱସ୍ତ ଯେମିତି, ବିଚକ୍ଷଣ ବି ସେମିତି । ବୁଦ୍ଧିରେ ବି କମ୍ ନୁହନ୍ତି । ଅପନ୍ତରା ଇଲାକାରେ ବିସ୍ଫୋରକ ସନ୍ଧାନ ହେଉ କି ମାଦକ ଦ୍ରବ୍ୟ ଅବା ସଙ୍ଗିନ ଅପରାଧରେ ଘଟଣାସ୍ଥଳରେ ପଇଁତରା ମାରି ଦୁର୍ବୃତ୍ତଙ୍କୁ ଧରିବା ସବୁଥିରେ ପାରଙ୍ଗମ । ଯେଉଁ କାମକୁ କରିବାକୁ ପୋଖତ ପ୍ରଶିକ୍ଷିତ ବ୍ୟକ୍ତିଙ୍କ ଅକଲ ଗୁଡୁମ୍ ହୋଇଯାଏ, ତାହାକୁ ବି ଅତି ସହଜରେ କରିପାରନ୍ତି । ନିଜର ଦକ୍ଷତା, ବିଶ୍ୱସନୀୟତା ଏବଂ ଅଦମ୍ୟ ସାହସ ପାଇଁ ରାଉରକେଲା ପୁଲିସ୍ର ‘କେ-୯’ (ଡଗ୍) ସ୍କ୍ୱାଡ୍ର ଅମୂଲ୍ୟ ସମ୍ପଦ ପାଲଟିଛନ୍ତି ରବି, ୟୁଗ୍ ଓ ସ୍ୟାଣ୍ଡି । ରାଉରକେଲା ପୁଲିସ୍ ଜିଲ୍ଲାକୁ ଚିହ୍ନିବା ଆରମ୍ଭ କରିଛି ‘ରବି’ । ବୋମା, ବିସ୍ଫୋରକ ସନ୍ଧାନ ପାଇଁ ପ୍ରଶିକ୍ଷିତ ‘ରବି’କୁ ମାସେ ହେଲା ଏଠାକୁ ଅଣାଯାଇଛି । ‘ବେଲ୍ଜିଆନ୍ ମାଲିନୋଇସ୍’ ପ୍ରଜାତିର ଏହି ବିଦେଶୀ କୁକୁରକୁ ମାତ୍ର ୩ ବର୍ଷ । ପୂର୍ବରୁ ବୋମା ସନ୍ଧାନକାରୀ ସ୍କ୍ୱାଡ୍ରେ ଥିବା ‘ସାଗର’କୁ କଟକ ନିଆଯାଇଛି । କଟକରୁ ଉଚ୍ଚ ପ୍ରଶିକ୍ଷଣ ପରେ ‘ରବି’ ଆସିଛି ରାଉରକେଲା । ‘ସାଗର’ର ଘ୍ରାଣଶକ୍ତି ପ୍ରଖର ଥିଲା ।
ଅଧିକ ପଢ଼ନ୍ତୁ :- President Visit: 'ମହାରାଜା ଏକ୍ସପ୍ରେସ୍'ରେ ବ୍ରହ୍ମପୁର ବାହାରିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ଫଟୋରେ ଦେଖନ୍ତୁ କିପରି ସଜା ହୋଇଛି ଟ୍ରେନ୍
୨୦୨୫ ମେ’ରେ ଓଡ଼ିଶା-ଝାଡ଼ଖଣ୍ଡ ସୀମାରେ ମାଓବାଦୀ ଠୁଳ କରିଥିବା ବିପୁଳ ପରିମାଣର ବିସ୍ଫୋରକ ଠାବ କରିବାରେ ସେ ସହାୟତା କରିଥିଲା । ‘ରବି’ ନିକଟରେ ‘ସାଗର’ର ଅନେକ ଗୁଣ ମେଳ ଖାଉଛି । ଡେମୋ ପ୍ରଶିକ୍ଷଣ ବେଳେ ଲୁଚାଇ ରଖାଯାଇଥିବା ବିସ୍ଫୋରକୁ ଠାବ କରିପାରିଛି । ଶାରୀରିକ ଗଠନ ଦୃଷ୍ଟିରୁ ଶକ୍ତିଶାଳୀ, ଉଚ୍ଚ ଶ୍ରବଣ ଶକ୍ତି ଏବଂ ସୁରକ୍ଷାତ୍ମକ ପ୍ରବୃତ୍ତି ଏହାକୁ ସ୍ୱତନ୍ତ୍ର କରିଛି । ଏହି କାରଣରୁ ନିକଟରେ ଶେଷ ହୋଇଥିବା ମହାପ୍ରଭୁଙ୍କ ରଥଯାତ୍ରାରେ ପୁରୀରେ ମୁତୟନ ହୋଇଥିଲା ‘ରବି’ । ସୋମବାର ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ କଟକ କାର୍ଯ୍ୟକ୍ରମରେ ମଧ୍ୟ ତାକୁ ସୁରକ୍ଷାରେ ନିୟୋଜିତ କରାଯାଇଛି । ମାତ୍ର ମାସେ ମଧ୍ୟରେ ନିଜର ଦକ୍ଷତାର ପ୍ରମାଣ ଦେଇଛି ‘ରବି’ । ଓଡ଼ିଶା-ଝାଡ଼ଖଣ୍ଡ ସୀମାରେ ମାଓବାଦୀ ଗଡ଼ ଭୁଶୁଡ଼ିବାରେ ଲାଗିଛି । ତଥାପି ମାଓବାଦୀଙ୍କ ଦ୍ୱାରା ବିଛାଯାଇଥିବା ଲ୍ୟାଣ୍ଡମାଇନ୍ ଏବଂ ଅନ୍ୟାନ୍ୟ ବିସ୍ଫୋରକ ଏବେ ବଡ଼ ବିପଦ ସାଜିଛି । ଆଗାମୀ ଦିନରେ ହେବାକୁ ଥିବା ଅଭିଯାନରେ ‘ରବି’କୁ ଏଥିରେ ସାମିଲ କରିବାକୁ ଯୋଜନା କରୁଛନ୍ତି ବିଭାଗୀୟ ଅଧିକାରୀ ।
କେ-୯ ସ୍କ୍ୱାଡ୍ର ଅନ୍ୟତମ ସଦସ୍ୟ ‘ୟୁଗ୍’ । ମାତ୍ର ଦୁଇବର୍ଷର ‘ବେଲ୍ଜିଆନ୍ ମାଲିନୋଇସ୍’ ପ୍ରଜାତିର ଏହି କୁକୁର ମାସେ ହେଲା ରାଉରକେଲା ୟୁନିଟ୍କୁ ଆସିଛି । ତାକୁ ମାଦକ ଦ୍ରବ୍ୟ ସନ୍ଧାନରେ ନିୟୋଜିତ କରାଯାଉଛି । ‘ୟୁଗ୍’ ଗ୍ୱାଲିୟର ବିଏସ୍ଏଫ୍ ଏବଂ ଚଣ୍ଡୀଗଡ଼ ସିଆଇଏସ୍ଏଫ୍ରୁ ପ୍ରଶିକ୍ଷଣ ନେଇଛି । ଏଥିପୂର୍ବରୁ ଏହି କାମ କରୁଥିଲା ‘ରେଶ୍ମି’ । ୨୦୨୨ରେ ସମ୍ୱଲପୁର-ବନାରସ ଟ୍ରେନ୍ ଓ ରାଉରକେଲା ରେଳଷ୍ଟେସନରୁ ବିପୁଳ ମାଦକ ଦ୍ରବ୍ୟ ଠାବ କରି ପ୍ରଶଂସା ସାଉଁଟିଥିଲା ‘ରେଶ୍ମି’ ।ହେଲେ ଏହାର କିଛି ଦିନ ପରେ ତାର ମୃତ୍ୟୁ ହୋଇଯାଇଥିଲା । ‘ରେଶ୍ମି’ର ଅଭାବ ପୂରଣ କରିବାକୁ ‘ୟୁଗ୍’କୁ ନିଯୁକ୍ତ କରାଯାଇଛି । ସେ ମଧ୍ୟ ନିରାଶ କରିନାହିଁ । ମାତ୍ର ମାସେ ମଧ୍ୟରେ ପ୍ଲାଣ୍ଟସାଇଟ୍ ଥାନା ଅଞ୍ଚଳରୁ ବ୍ରାଉନ୍ସୁଗର ଏବଂ ଗଞ୍ଜେଇ ଠାବ କରି ଦକ୍ଷତାର ପରିଚୟ ଦେଇଛି । ରାଉରକେଲାକୁ ନିଶାମୁକ୍ତ କରିବାରେ ‘ୟୁଗ୍’ ପ୍ରଭାବୀ ସାବ୍ୟସ୍ତ ହେବ ବୋଲି ପୁଲିସ୍ ଅଧିକାରୀ ଆଶାବ୍ୟକ୍ତ କରିଛନ୍ତି । ରାଉରକେଲା ପୁଲିସ୍ର କେ-୯ ସ୍ୱାଡ୍ର ସବୁଠାରୁ ପୁରୁଣା ସଦସ୍ୟ ‘ସ୍ୟାଣ୍ଡି’ । ଲାବ୍ରାଡର ପ୍ରଜାତିର ଏହି କୁକୁର କଟକରୁ ପ୍ରଶିକ୍ଷିତ । ପ୍ରଶିକ୍ଷଣ ପରଠୁ ଦୀର୍ଘ ୪ ବର୍ଷ ହେଲା ସେ ରାଉରକେଲା ୟୁନିଟ୍ରେ ‘ଟ୍ରାକର’ ଭାବେ ନିୟୋଜିତ ହୋଇଛି । ଏବେ ତା’ବୟସ ପ୍ରାୟ ୮ବର୍ଷ । ଚୋରି, ଡକାୟତି ଭଳି ମାମଲାରେ ଅଭିଯୁକ୍ତଙ୍କୁ ଟ୍ରାକ୍ କରିବାରେ କାମ କରୁଛି ‘ସ୍ୟାଣ୍ଡି’ । ଶତାଧିକ ମାମଲାରେ ଫେରାର୍ ଅଭିଯୁକ୍ତକୁ ଧରିବାରେ ସଫଳ ମଧ୍ୟ ହୋଇଛି ।
ଡଗ୍ ସ୍କ୍ୱାଡ୍ ପରିଚାଳନା ଦାୟିତ୍ୱରେ ଥିବା ଇନ୍ସପେକ୍ଟର ଉମେଶ ବେହେରା କହିଛନ୍ତି, ରାଉରକେଲା ପୁଲିସ୍ ଜିଲ୍ଲା ପାଇଁ ତିନୋଟି ସନ୍ଧାନୀ କୁକୁର ରହିଛନ୍ତି । ବୋମା ଓ ବିସ୍ଫୋରକ ସନ୍ଧାନରେ ରବି, ମାଦକ ଦ୍ରବ୍ୟ ସନ୍ଧାନରେ ‘ୟୁଗ୍’ ଏବଂ ଟ୍ରାକର ଭାବେ ‘ସ୍ୟାଣ୍ଡି’କୁ ବ୍ୟବହାର କରାଯାଉଛି । ପୁଲିସ୍ ବାରାକ୍ରେ ଏମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ରହିଛି । ସେମାନଙ୍କ ଦେଖାଶୁଣା କରିବା ଏବଂ ପ୍ରଶିକ୍ଷଣ ଦେବାକୁ ସ୍ୱତନ୍ତ୍ର ଟ୍ରେନର ରହିଛନ୍ତି । ସାପ୍ତାହିକ ସାରଣୀ ଅନୁଯାୟୀ ସମସ୍ତଙ୍କ ପାଇଁ ଖାଦ୍ୟପେୟ ବ୍ୟବସ୍ଥା କରାଯାଇଛି । ଭାତ, ମାଂସ, କ୍ଷୀର, ଅଣ୍ଡା ଏବଂ ଅନ୍ୟାନ୍ୟ ପୁଷ୍ଟିକର ଖାଦ୍ୟ ଦିଆଯାଉଛି । ସ୍ୱାସ୍ଥ୍ୟ ପ୍ରତ ଗୁରୁତ୍ୱ ଦିଆଯାଉଛି । ପୁଲିସ୍ ଟିମ୍ ପରିବାରର ଏମାନେ ବିଶ୍ୱସ୍ତ ସଦସ୍ୟ । ବର୍ଷ ବର୍ଷ ଧରି କୁକୁର ବିଶ୍ୱସ୍ତପ୍ରାଣୀ ଭାବେ ନିଜକୁ ପ୍ରମାଣିତ କରିଛି । ହେଲେ ଡଗ୍ସ୍କ୍ୱାଡ୍ ୟୁନିଟ୍ରେ ସାମିଲ ହେଲେ ସେମାନଙ୍କୁ ଗୁରୁତ୍ୱ ଆହୁରି ବଢ଼ିଯାଏ । ସେମାନଙ୍କ ସ୍ୱତନ୍ତ୍ର ଯତ୍ନ ନେବାକୁ ପଡ଼େ । ସନ୍ଧାନୀ କୁକୁରମାନଙ୍କ ମନୋଭାବ, ବ୍ୟବହାର ପଢ଼ିବା ସବୁଠାରୁ ଗୁରୁତ୍ୱପୂର୍ଣ୍ଣ କଥା । ସବୁ କୁକୁରଙ୍କ ଭଳି ଏମାନେ ମଧ୍ୟ ଭଲପାଇବା ଖୋଜନ୍ତି । ଭଲ ପାଇବା ଦେଲେ ଭଲ କାମ କରନ୍ତି ବୋଲି ଇନ୍ସପେକ୍ଟର ଶ୍ରୀ ବେହେରା କହିଛନ୍ତି ।
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ PRAMEYA - ପ୍ରମେୟ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
