ଥାନାରେ ପଶି ପୋଲିସକୁ ମାଡ଼ ମାରିଲା ଆର୍ମି, କମାଣ୍ଡିଂ ଅଫିସରଙ୍କ ସମେତ ୪୦ ସୈନିକଙ୍କ ବିରୋଧରେ ଏଫଆଇଆର
କିସ୍ତୱାର,୨୫।୬: ଥାନା ଭିତରେ ପଶି ପୋଲିସ କର୍ମଚାରୀଙ୍କୁ ଆକ୍ରମଣ କରିବା ଏବଂ ସରକାରୀ ସମ୍ପତ୍ତିକୁ କ୍ଷତି ପହଞ୍ଚାଇବା ଅଭିଯୋଗରେ ଜମ୍ମୁ -କାଶ୍ମୀର ପୋଲିସ ଜଣେ ସେନା କମାଣ୍ଡିଂ ଅଫିସରଙ୍କ ସମେତ ୪୦ ସେନା କର୍ମଚାରୀଙ୍କ ବିରୋଧରେ ମାମଲା ରୁଜୁ କରିଛି। ଘଟଣାଟି କିସ୍ତୱାର ଜିଲ୍ଲାର ଏକ ପୋଲିସ ଷ୍ଟେସନରେ ଘଟିଛି। ସେନା ପକ୍ଷରୁ କୁହାଯାଇଛି ଏହି ଘଟଣାର ତଦନ୍ତ କରାଯାଉଛି ଏବଂ ମିଳିତ ତଦନ୍ତ ଆଧାରରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଅଧିକାରୀଙ୍କ ଅନୁଯାୟୀ, ଟ୍ରାଫିକ୍ ନିୟମ ଉଲ୍ଲଂଘନ ଅଭିଯୋଗରେ ଜଣେ ସେନା ଅଧିକାରୀଙ୍କ ବ୍ୟକ୍ତିଗତ ଗାଡ଼ିକୁ ପୋଲିସ ଦଳ ଅଟକାଇ ଜବତ କରିବା ସମୟରେ ଏହି ଘଟଣା ଘଟିଥିଲା। ଆଥୋଲି ଥାନାରେ ରୁଜୁ ହୋଇଥିବା ଏଫଆଇଆରରେ କୁହାଯାଇଛି ଯେ ଜୁନ୍ ୨୪ ତାରିଖରେ ଷ୍ଟେସନ ହାଉସ୍ ଅଫିସର (ଏସଏଚଓ), ଇନ୍ସପେକ୍ଟର ଅମୃତ କୋଟାଚ ଡେପୁଟି କମିଶନରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ବୈଠକରେ ଯୋଗଦେବାକୁ ପଡ୍ଡର ବ୍ଲକ ଉନ୍ନୟନ ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିବା ସମୟରେ ଏହି ଘଟଣା ଘଟିଥିଲା।
କୋଟାଚ୍ ତାଙ୍କ ଅଭିଯୋଗରେ କହିଛନ୍ତି ଯେ ତାଙ୍କୁ ଏକ ଫୋନ୍ ଆସିଥିଲା ଯେଉଁଥିରେ ତାଙ୍କୁ ସୂଚନା ଦିଆଯାଇଥିଲା ଯେ ଏକ ଅପରାଧିକ ଷଡ଼ଯନ୍ତ୍ରର ଅଂଶ ସ୍ୱରୂପ ପୋଲିସ ଷ୍ଟେସନ ପରିସରରେ ଏକ ହିଂସାତ୍ମକ ଆକ୍ରମଣ ହୋଇଛି ଏବଂ ଏହି ଘଟଣା ୧୭ ରାଷ୍ଟ୍ରୀୟ ରାଇଫଲ୍ସ (ଆରଆର)ର କମାଣ୍ଡିଂ ଅଫିସର ଏନ ଅରୁଣ ଗାନ୍ଧୀଙ୍କ ପ୍ରତ୍ୟକ୍ଷ ନିର୍ଦ୍ଦେଶରେ କରାଯାଇଛି। ଷ୍ଟେସନ ହାଉସ୍ ଅଫିସର କହିଛନ୍ତି ଯେ ମେଜର ବିକାଶ ଶର୍ମା ଏବଂ ନାଏବ ସୁବେଦାର ଶଙ୍କର ଗୁରଖେଙ୍କ ନେତୃତ୍ୱରେ ୧୭ ଆରଆରର କ୍ୟାମ୍ପ କିଜାଇର ପ୍ରାୟ ୩୦ ରୁ ୪୦ ଜଣ କର୍ମଚାରୀ ପୋଲିସ ଷ୍ଟେସନ ଉପରେ ଏକ ପୂର୍ବ ଯୋଜନାବଦ୍ଧ ଆକ୍ରମଣ କରିଥିଲେ।
ସେ କହିଛନ୍ତି , ଆକ୍ରମଣକାରୀମାନେ ମେନ୍ ଗୋଟ୍ ଏବଂ ଚାରି କାନ୍ଥ ଡେଇଁ ପୋଲିସ ଷ୍ଟେସନରେ ପ୍ରବେଶ କରିଥିଲେ ଏବଂ ସେମାନଙ୍କ ପାଖରେ ଲାଠି, ଲୁହା ରଡ୍ ଏବଂ ଅନ୍ୟାନ୍ୟ ଅସ୍ତ୍ରଶସ୍ତ୍ର ଥିଲା। "ସେମାନଙ୍କର ଲକ୍ଷ୍ୟ ଥିଲା କର୍ତ୍ତବ୍ୟରତ ପୋଲିସ କର୍ମଚାରୀଙ୍କୁ ମାରାତ୍ମକ ଆଘାତ ଏବଂ ହତ୍ୟା କରିବା।" ସେ ଏହା ମଧ୍ୟ କହିଛନ୍ତି ଯେ ସେ ତୁରନ୍ତ ପୋଲିସ ଷ୍ଟେସନକୁ ଫେରି ଆସିଥିଲେ, ଯେଉଁଠାରେ ମେଜର ଶର୍ମା ତାଙ୍କୁ ଆକ୍ରମଣ କରିଥିଲେ।
ଏଫଆଇଆର ଅନୁଯାୟୀ, ସେନା କର୍ମଚାରୀମାନେ କୋଟାଚଙ୍କ ୟୁନିଫର୍ମ ଚିରି ଦେଇଥିବା ଅଭିଯୋଗ ହୋଇଛି ଏବଂ ଘଟଣାସ୍ଥଳରେ ପହଞ୍ଚିଥିବା ଏସଡିପିଓ ବିଜୟ କୁମାର ଭଗତଙ୍କୁ ମଧ୍ୟ ଆକ୍ରମଣ କରିଥିଲେ। ଏସଏଚଓ କହିଛନ୍ତି, ଅଭିଯୁକ୍ତ ସେନା କର୍ମଚାରୀମାନେ ଏକ ସାଧାରଣ ଅପରାଧିକ ଉଦ୍ଦେଶ୍ୟ ସହିତ ଘଟଣାସ୍ଥଳରେ ନିୟୋଜିତ ପୋଲିସ କର୍ମଚାରୀମାନଙ୍କୁ ମଧ୍ୟ ନିର୍ମମ ଭାବରେ ଆକ୍ରମଣ କରିଥିଲେ। ସ୍ୱତନ୍ତ୍ର ପୋଲିସ ଅଧିକାରୀ ସୁରେଶ କୁମାରଙ୍କ ବେକରେ ସର୍ଭିସ୍ ରାଇଫଲର ବଟ୍ ବାଜିଥିଲା, ଯାହା ଫଳରେ ଗୁରୁତର ଆହତ ହୋଇଥିଲେ। ସେ କହିଛନ୍ତି ଯେ ଏହି ସଂଘବଦ୍ଧ ଆକ୍ରମଣରେ ଡ୍ୟୁଟିରେ ଥିବା ଅନ୍ୟ ଅନେକ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି।
ଏଫଆଇଆରରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ, ସେନା କର୍ମଚାରୀମାନେ କିସ୍ତୱାରର ସହକାରୀ ଆଞ୍ଚଳିକ ପରିବହନ ଅଧିକାରୀ (ଏଆରଟିଓ) ଏବଂ ତାଙ୍କ ବ୍ୟକ୍ତିଗତ ସୁରକ୍ଷା ଅଧିକାରୀଙ୍କୁ ପୋଲିସ ଷ୍ଟେସନ ଭିତରେ ଆକ୍ରମଣ କରିଥିଲେ। ଆକ୍ରମଣକାରୀମାନେ ସରକାରୀ ଏବଂ ସାର୍ବଜନୀନ ସମ୍ପତ୍ତିକୁ ମଧ୍ୟ ବହୁ କ୍ଷତି ପହଞ୍ଚାଇଥିଲେ, ଯେଉଁଥିରେ ଏଆରଟିଓଙ୍କ ସରକାରୀ ଗାଡ଼ି, ଏସଡିପିଓ ଏବଂ ଏସଏଚ୍ଓଙ୍କ ଗାଡ଼ିକୁ କ୍ଷତି ପହଞ୍ଚାଇବା ଏବଂ ପୋଲିସ ଷ୍ଟେସନର ମୁଖ୍ୟ ଫାଟକ ଭାଙ୍ଗି ଦେଇଥିବାର ଅଭିଯୋଗ ରହିଛି।
