ହାଟଡିହୀରେ ମିଳୁନି ସାର: ସମବାୟ ସମିତି ଓ ବିକ୍ରୟ କେନ୍ଦ୍ର ପରିଦର୍ଶନ କଲେ ବିଧାୟକ
ହାଟଡିହୀ/ଛେନାପଦୀ, ୪।୮(ଶୁଭକାନ୍ତ ନାୟକ/ନିରାକାର ପରିଡ଼ା): କେନ୍ଦୁଝର ଜିଲା ହାଟଡିହୀ ବ୍ଲକରେ ବର୍ତ୍ତମାନ ପ୍ରବଳ ସାର ସଙ୍କଟ ଦେଖାଦେଇଛି। ସମବାୟ ସମିତିରେ ଆବଶ୍ୟକୀୟ ସାର ନ ଥିବାବେଳେ ଖୋଲା ବଜାରରେ ଚଢ଼ା ଦରରେ ସାର ବିକ୍ରୟ ହେଉଥିବା ଅଭିଯୋଗ ହୋଇଛି। ଏହି ସମସ୍ୟାକୁ ନେଇ ବଡ଼ରମ୍ପାସ ସମବାୟ ସମିତି ଅଧୀନରେ ଥିବା ଚାଷୀମାନେ ମଙ୍ଗଳବାର ତୀବ୍ର ପ୍ରତିବାଦ କରିଛନ୍ତି।
ଚାଷୀମାନଙ୍କ ଅଭିଯୋଗ ଅନୁଯାୟୀ, କ୍ଷେତରେ ଡି.ଏ.ପି. (DAP) ଏବଂ ଗ୍ରୋମର ଭଳି ଗୁରୁତ୍ୱପୂର୍ଣ୍ଣ ସାରର ଆବଶ୍ୟକତା ଥିବାବେଳେ ସମବାୟ ସମିତିକୁ କେବଳ ୟୁରିଆ ସାର ଆସିଛି। ବଜାରରେ ମଧ୍ୟ ଆବଶ୍ୟକତା ମୁତାବକ ଡି.ଏ.ପି. ୧୮-୪୬ ସାର ମିଳୁନାହିଁ। ସରକାରୀ ଦର ୧୩୫୦ ଟଙ୍କା ଥିବାବେଳେ କେଉଁଠି ୨ ହଜାର ତ ଆଉ କେଉଁଠି ୨୨ଶହ ଟଙ୍କା ପର୍ଯ୍ୟନ୍ତ ଚଢ଼ା ଦରରେ ସାର ବିକ୍ରି ହେଉଛି। ସାର ଅଭାବରୁ ଚାଷୀମାନଙ୍କର ଚାଷ କାର୍ଯ୍ୟ ଗଭିର ଭାବେ ବାଧାପ୍ରାପ୍ତ ହେଉଛି। ଏହାକୁ ନେଇ ମିନହରୀ ସେନାପତି, ମନୋଜ ସେନାପତି, କାମ ସେନାପତି, ରଞ୍ଜନ ପଣ୍ଡା, ମହେଶ୍ୱର ସୁତାର, ହରିହର ପାତ୍ର, ଭଗବାନ ବେହେରା, ନବଘନ ଜେନା, କଳାକାର ଜେନାଙ୍କ ସମେତ ବହୁ ଚାଷୀ ସମବାୟ ସମିତି ସମ୍ମୁଖରେ ପ୍ରତିବାଦ କରି ତୁରନ୍ତ ସାର ଯୋଗାଇଦେବାକୁ ଦାବି କରିଥିଲେ।
ସାରର ଅଭାବ ଓ ଚାଷୀଙ୍କ ପ୍ରତିବାଦ ଖବର ପାଇ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ଏବଂ ବ୍ଲକ ସହକୃଷି ଅଧିକାରୀ ଭାମାଞ୍ଜରୀ ମହାନ୍ତ ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ବଡ଼ରମ୍ପାସ ସମବାୟ ସମିତିର ସମ୍ପାଦକଙ୍କ ସହ ମହଜୁଦ ସାର ସମ୍ପର୍କରେ ଆଲୋଚନା କରିଥିଲେ। ପରେ ବିଧାୟକ ସେଠୀ ବଡ଼ରମ୍ପାସର ‘ସ୍ୱାଇଁ ଟ୍ରେଡର୍ସ’ ଏବଂ ଛେନାପଦୀର ‘ଜୟଲକ୍ଷ୍ମୀ ଭେରାଇଟି ଷ୍ଟୋର’ ସାର ବିକ୍ରୟ କେନ୍ଦ୍ର ପରିଦର୍ଶନ କରି ଡିଲରମାନଙ୍କ ସହ ଆଲୋଚନା କରିଥିଲେ ଏବଂ ଅଭାବୀ ବିକ୍ର୍ରିର କାରଣ ପଚାରି ବୁଝିଥିଲେ।
ଡିଲରମାନେ ବିଧାୟକଙ୍କୁ ଜଣାଇଥିଲେ ଯେ କେତେକ ସାରର ମୂଲ୍ୟବୃଦ୍ଧି ହୋଇଥିବା ବେଳେ ଗୋଟିଏ ସାର ସହିତ ଅନ୍ୟ କିଛି ସାର ବାଧ୍ୟତାମୂଳକ ଭାବେ (ଟେଗିଂ ସିଷ୍ଟମ୍) ଦିଆଯାଉଥିବାରୁ ଏପରି ସମସ୍ୟା ଉପୁଜୁଛି। ଏହି ସମସ୍ୟା ସମ୍ପର୍କରେ ବିଧାୟକ ଅଭିମନ୍ୟୁ ସେଠୀ ଜିଲା ସ୍ତରୀୟ ଅଧିକାରୀମାନଙ୍କୁ ଅବଗତ କରାଇବା ସହିତ ଟେଗିଂ ବ୍ୟବସ୍ଥାକୁ ଉଠାଇବା ପାଇଁ ସରକାର ଦୃଢ଼ ପଦକ୍ଷେପ ନେବା ଜରୁରୀ ବୋଲି ମତ ଦେଇଛନ୍ତି। ଏହାଛଡ଼ା ଏ ସମ୍ପର୍କରେ ସେ ବିଭାଗୀୟ ମନ୍ତ୍ରୀଙ୍କୁ ଚିଠି ଲେଖି ଜଣାଇବା ସହ ଆଗାମୀ ବିଧାନସଭାରେ ମଧ୍ୟ ଏହି ପ୍ରଶ୍ନ ଉଠାଇବେ ବୋଲି ପ୍ରକାଶ କରିଛନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
