ସ୍ବାମୀ ବେଡ୍‌ରେ ଶୋଇଥିବାବେଳେ ବିଷାକ୍ତ ସାପ ଛାଡ଼ିଦେଲେ ସ୍ତ୍ରୀ: ଆଉ ତା’ପରେ ଘଟିଲା…

ଲକ୍ଷ୍ନୌ,୧୮।୭: ଉତ୍ତର ପ୍ରଦେଶର ମେରଠରେ ପୋଲିସ ଏକ ଆଶ୍ଚର୍ଯ୍ୟଜନକ ଘଟଣାର ପର୍ଦ୍ଦାଫାସ କରିଛି,ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ମେରଠର ଏସଏସପି ଅଭିନାଶ ପାଣ୍ଡେ କହିଛନ୍ତି, ଜୁଲାଇ ୧୭ରେ ସେମାନେ ଅତୁଲ ପାୱାରଙ୍କ ସନ୍ଦେହଜନକ ପରିସ୍ଥିତିରେ ମୃତ ସମ୍ପର୍କରେ ସୂଚନା ପାଇଥିଲେ। ମୃତକଙ୍କ ପତ୍ନୀ ଦାମିନୀ ରିପୋର୍ଟ କରିଥିଲେ ଯେ, ତାଙ୍କ ସ୍ବାମୀଙ୍କୁ ସାପ କାମୁଡ଼ିଛି। ପରେ ଅତୁଲଙ୍କୁ ହସ୍ତିନାପୁର କମ୍ୟୁନିଟି ହେଲ୍ଥ ସେଣ୍ଟରକୁ ନିଆଯାଇଥିଲା। ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ପରିବାର ସଦସ୍ୟମାନେ ମୃତଦେହକୁ ଭାଣ୍ଡୋରା ଗାଁକୁ ନେଇଯାଇଥିଲେ କିନ୍ତୁ ମୃତ୍ୟୁ ସନ୍ଦେହଜନକ ଥିବାରୁ ହସ୍ତିନାପୁର ପୋଲିସକୁ ଖବର ଦିଆଯାଇଥିଲା। ଅତୁଲଙ୍କ ସ୍ତ୍ରୀ ଦାମିନୀଙ୍କର ସ୍କୁଲ ଡ୍ରାଇଭର ତୁଷାରଙ୍କ ସହ ସମ୍ପର୍କ ଥିଲା। ସେମାନଙ୍କ ଫୋନ ଯାଞ୍ଚ କରିବାରୁ ଏକ ପାତ୍ରରେ ରଖାଯାଇଥିବା ଏକ ସାପର ଫଟୋ ମିଳିଥିଲା। ପଚରାଉଚରା ପରେ ଉଭୟେ ଜଣେ ସାପୁଆ କେଳାଙ୍କଠାରୁ ସାପ କିଣି ଅତୁଲଙ୍କୁ ହତ୍ୟା କରିବା ପାଇଁ ଏକାଠି ଷଡ଼ଯନ୍ତ୍ର କରିଥିବା ସ୍ବୀକାର କରିଥିଲେ।

ପୋଲିସ ଅନୁଯାୟୀ, ୩୫ ବର୍ଷୀୟ ଅତୁଲ ପାୱାର ହସ୍ତିନାପୁର ଥାନା ଅଞ୍ଚଳର ରାମଲୀଳା ମଇଦାନ ନିକଟରେ କୃଷ୍ଣ କିଡ୍ସ ପବ୍ଲିକ ସ୍କୁଲ ଚଲାଉଥିଲେ ଏବଂ ସେଠାରେ ତାଙ୍କ ସ୍ତ୍ରୀ ଦାମିନୀଙ୍କ ସହିତ ରହୁଥିଲେ। ଏହି ଦମ୍ପତି ୨୦୧୯ରେ ପ୍ରେମ ବିବାହ କରିଥିଲେ।
ଅଧିକ ତଦନ୍ତରୁ ଜଣାପଡ଼ିଛି ଯେ, ସ୍କୁଲ ଚଳାଇବା ପୂର୍ବରୁ ଅତୁଲ ବିଦ୍ୟା ପ୍ରକାଶନରେ କାମ କରୁଥିଲେ । ସେଠାରେ ସେ ୨୦ ଲକ୍ଷ ଟଙ୍କାର ଏକ ବୀମା ପଲିସି ନେଇଥିଲେ। ତୁଷାର ଏବଂ ଦାମିନୀ ବୀମା ଟଙ୍କା ମିଳିବା ପରେ ବିବାହ କରିବାକୁ ଯୋଜନା କରିଥିଲେ। ତୁଷାର ଦାମିନୀଙ୍କୁ ପ୍ରତିଶ୍ରୁତି ଦେଇଥିଲେ ଯେ, ପାଣ୍ଠି ମିଳିବା ପରେ ସେ ତାଙ୍କ ନିଜ ସ୍ତ୍ରୀଙ୍କୁ ଛାଡପତ୍ର ଦେବେ।
ତୁଷାର ପ୍ରକାଶ କରିଥିଲେ ଯେ. ସେ ଏବଂ ଦାମିନୀ ଦୀର୍ଘ ଦିନ ଧରି ପ୍ରେମ ସମ୍ପର୍କରେ ଥିଲେ। ସେମାନେ ଅତୁଲଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲେ। ଘଟଣାର ପୂର୍ବ ରାତିରେ ତାଙ୍କୁ କ୍ଷୀରରେ ମିଶ୍ରିତ ନିଦ ବଟିକାର ମାତ୍ରାଧିକ ଔଷଧ ଦିଆଯାଇଥିଲା। ପରବର୍ତ୍ତୀ ସମୟରେ, ସାପୁଆ କେଳାଙ୍କ ସହାୟତାରେ, ଏକ ବିଷାକ୍ତ ସାପ ଅଣାଯାଇ ଅତୁଲଙ୍କ କମ୍ବଳରେ ଛାଡି ଦିଆଯାଇଥିଲା, ଯାହା ଫଳରେ ତାଙ୍କର ସାପ କାମୁଡ଼ାରେ ମୃତ୍ୟୁ ହୋଇଥିଲା। ଅଭିଯୁକ୍ତମାନେ ବୀମା ଟଙ୍କା ଦାବି କରିବାକୁ ଯୋଜନା କରିଥିଲେ ଏବଂ ସେମାନଙ୍କ ସହାୟତା ବଦଳରେ ସାପୁଆ କେଳାଙ୍କୁ ୫ ଲକ୍ଷ ଦେବାକୁ ରାଜି ହୋଇଥିଲେ। ପୋଲିସ ସଫଳତାର ସହ ମାମଲାର ସମାଧାନ କରି ଚାରି ଅଭିଯୁକ୍ତଙ୍କୁ ଗିରଫ କରିଥିଲେ। ସେମାନଙ୍କ ବିରୋଧରେ ଅଧିକ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।