ସାଙ୍ଗମାନଙ୍କ ସହ ଶୋଇଥିଲେ, ସାପ କାମୁଡ଼ାରେ ଦଶମ ଶ୍ରେଣୀ ଛାତ୍ରୀଙ୍କ ମୃତ୍ୟୁ, ଅଞ୍ଚଳରେ…
ଥୁଆମୂଳ ରାମପୁର, ୩୧।୭(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଅନ୍ତର୍ଗତ ସିନ୍ଧିପଦର ଗ୍ରାମପଞ୍ଚାୟତର ବାର୍ଷିକୋଣା ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ସାପ କାମୁଡ଼ାରେ ଜଣେ ଦଶମ ଶ୍ରେଣୀ ନାବାଳିକା ଛାତ୍ରୀଙ୍କ ମୃତ୍ୟୁ ଘଟିଛି। ମୃତ ଛାତ୍ରୀଜଣକ ହେଲେ ବାର୍ଷିକୋଣା ଗ୍ରାମର କାଲୁଆ ମାଝୀଙ୍କ ୧୫ ବର୍ଷୀୟା ଝିଅ ମାଧୁରୀ ମାଝୀ।
ମିଳିଥିବା ସୂଚନା ଅନୁଯାୟୀ, ଗୁରୁବାର ରାତି ପ୍ରାୟ ୭ଟା ସମୟରେ ମାଧୁରୀ ପାଖ ଘରେ ଅନ୍ୟ ସାଙ୍ଗମାନଙ୍କ ସହ ଶୋଇଥିବା ବେଳେ କୌଣସି ଏକ ବିଷାକ୍ତ ସାପ ତାଙ୍କର ବାମ ହାତ ଆଙ୍ଗୁଠିକୁ କାମୁଡ଼ି ଦେଇଥିଲା। ସାପ କାମୁଡ଼ିବା ଅନୁଭବ ହେବା ପରେ ଝିଅଟି ଚିତ୍କାର କରିଥିଲା ଏବଂ ପରିବାର ଲୋକେ ତଥା ଝିଅଟି ମିଶି ଖୋଜାଖୋଜି କରିଥିଲେ ମଧ୍ୟ ସାପକୁ ପାଇନଥିଲେ। ଏହା ପରେ ସେମାନେ ପୁଣି ଶୋଇପଡ଼ିଥିଲେ।
ତେବେ ଶୁକ୍ରବାର ଦିନ ଦ୍ୱିପ୍ରହର ପ୍ରାୟ ୧୨ଟା ବେଳେ ଗାଧୋଇ ସାରି ଫେରିବା ପରେ ମାଧୁରୀଙ୍କ ବାମ ହାତରେ ଅସହ୍ୟ ଯନ୍ତ୍ରଣା ହେବା ସହ ସେ ଗୁରୁତର ଅସୁସ୍ଥ ହୋଇ ଚେତା ହରାଇ ପଡ଼ିଥିଲେ। ପରିବାର ଲୋକେ ତୁରନ୍ତ ତାଙ୍କୁ ଚିକିତ୍ସା ନିମନ୍ତେ କଲମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ, ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଏହି ଘଟଣା ନେଇ ମୃତକଙ୍କ ବାପା କାଲୁଆ ମାଝୀ ଥୁଆମୂଳ ରାମପୁର ଥାନାରେ ଏକ ଅପମୃତ୍ୟୁ ମାମଲା ଦାୟର କରିଛନ୍ତି। ପୋଲିସ କଲମପୁର ମେଡିକାଲରୁ ମୃତଦେହ ଜବତ କରି ଥୁଆମୂଳ ରାମପୁର ମେଡିକାଲରେ ଶବ ବ୍ୟବଚ୍ଛେଦ (ପୋଷ୍ଟମର୍ଟମ) କରାଇବା ପରେ ପରିବାରବର୍ଗଙ୍କୁ ହସ୍ତାନ୍ତର କରିବା ସହ ଘଟଣାର ଅଧିକ ତଦନ୍ତ ଜାରି ରଖିଛି। ଜଣେମେଧାବୀ ଛାତ୍ରୀଙ୍କ ଏପରି ଅକାଳ ବିୟୋଗରେ ସମଗ୍ର ସ୍ଥାନୀୟ ଅଞ୍ଚଳରେ ଶୋକର କାଳାୟ ଛାୟା ଖେଳିଯାଇଛି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
