ରାଜରାସ୍ତାରେ କଂଗ୍ରେସ-ଭାଜପାକର୍ମୀଙ୍କ ମଧ୍ୟରେ ସଂଘର୍ଷ; ମୁଣ୍ଡ ଫାଟିଲା, ଗାଡ଼ିର କାଚ…

ପାଟନା,୨୨।୭: ପ୍ରଧାନମନ୍ତ୍ରୀଙ୍କ ବାସଭବନ ବାହାରେ ରାହୁଲ ଗାନ୍ଧୀଙ୍କ ସମେତ ବିରୋଧୀ ନେତାମାନେ ଧାରଣାରେ ବସିଥିଲେ । ଏହାପରେ ବୁଧବାର ଭାଜପା ପକ୍ଷରୁ ପାଟନାରେ ଏକ ପ୍ରତିବାଦ ଶୋଭାଯାତ୍ରା କରିଥିଲା। ଏହି ପଦଯାତ୍ରା କୁର୍ଜି ହସ୍ପିଟାଲରୁ କଂଗ୍ରେସ କାର୍ଯ୍ୟାଳୟ ପର୍ଯ୍ୟନ୍ତ ଯିବାର କାର୍ଯ୍ୟକ୍ରମ ଥିଲା। ଏହି କାର୍ଯ୍ୟକ୍ରମ ସମୟରେ, ଭାଜପା ଏବଂ କଂଗ୍ରେସ କର୍ମୀଙ୍କ ମଧ୍ୟରେ ସଂଘର୍ଷ ଦେଖିବାକୁ ମିଳିଛି।ଏଛିରେ ଅନେକ ବ୍ୟକ୍ତି ଆହତ ହୋଇଥିବା ବେଳେ କେତେକଙ୍କ ମୁଣ୍ଡରେ ଆଘାତ ଲାଗିଛି । ପରବର୍ତ୍ତୀ ବିଶୃଙ୍ଖଳା ମଧ୍ୟରେ, ଉତ୍ତେଜିତ କର୍ମୀମାନେ ଅନେକ ଗାଡ଼ିର ଝରକା ଭାଙ୍ଗି ଦେଇଥିଲେ ।

କଂଗ୍ରେସ ରାଜ୍ୟ କାର୍ଯ୍ୟାଳୟ ନିକଟରେ ଏହି ସଂଘର୍ଷ ଘଟିଥିଲା। କଂଗ୍ରେସ ଏବଂ ଭାଜପାକର୍ମୀଙ୍କ ମଧ୍ୟରେ ବିବାଦ ସମୟରେ ଉଭୟ ପକ୍ଷରୁ ଲାଠି ଏବଂ ପଥର ଫିଙ୍ଗାଯାଇଥିଲା । ଅନେକ କର୍ମୀ ଲାଠି ଧରିଥିବାର ଦେଖାଯାଇଥିଲା। କଂଗ୍ରେସ ଏବଂ ଭାଜପା ଉଭୟ ଦଳର ଅନେକ କର୍ମୀ ଆହତ ହୋଇଥିଲେ।

କଂଗ୍ରେସ ପ୍ରଦେଶ ଅଧ୍ୟକ୍ଷ ରାଜେଶ ରାମ ଅଭିଯୋଗ କରିଛନ୍ତି ଯେ ପୋଲିସର ସହଯୋଗରେ ଏହି ଘଟଣା ଘଟିଛି । ପୋଲିସ ପକ୍ଷପାତିତାପୂର୍ଣ୍ଣ ଭାବରେ କାର୍ଯ୍ୟ କରୁଛି ବୋଲି ଦାବି କରିଛନ୍ତି । ଏହି ସମୟରେ, କିଛି ଭାଜପାକର୍ମୀ କହିଛନ୍ତି ଯେ ସେମାନେ ରାସ୍ତାରେ ପ୍ରତିବାଦ କରିବାକୁ ଆସିଥିଲେ କିନ୍ତୁ କଂଗ୍ରେସ କର୍ମୀମାନେ ସେମାନଙ୍କ ଉପରେ ଆକ୍ରମଣ କରିଥିଲେ। ଆହତମାନଙ୍କ ମଧ୍ୟରୁ ବହୁ ସଂଖ୍ୟକ ଭାଜପା କର୍ମୀ ଥିବା ଜଣାପଡ଼ିଛି। ସମସ୍ତ ଆହତଙ୍କୁ ତୁରନ୍ତ କୁର୍ଜି ହସ୍ପିଟାଲକୁ ପଠାଯାଇଥିଲା, ଯେଉଁଠାରେ ସେମାନଙ୍କୁ ପ୍ରାଥମିକ ଚିକିତ୍ସା କରାଯାଇଥିଲା। ସେମାନଙ୍କ ଅବସ୍ଥା ଉପରେ ନିର୍ଭର କରି ସେମାନଙ୍କୁ ଅନ୍ୟତ୍ର ପଠାଯାଇପାରେ।