ବଣ ବିଲୁଆ ଆତଙ୍କ: ଲୋକଙ୍କୁ ଗୋଡ଼ାଇ ଗୋଡ଼ାଇ କାମୁଡୁଛି
ନୂଆପଡ଼ା,୧୭ା୭ (ମକାରୁ ବେମାଲ):ନୂଆପଡ଼ା ସଦର ବ୍ଲକ୍ ବେଲଟୁକୁରି ଥାନା ଅନ୍ତର୍ଗତ ଭାଲେଶ୍ୱର ପଞ୍ଚାୟତ ଅଞ୍ଚଳରେ ବଣ ବିଲୁଆ ଆତଙ୍କ ଦେଖାଦେଇଛି। ସପ୍ତାହକ ମଧ୍ୟରେ ବିଲୁଆ କାମୁଡ଼ାରେ ୪ଜଣ ଗୁରୁତର ହୋଇ ଚିକିତ୍ସିତ ହେଉଛନ୍ତି। ସେମାନେ ହେଲେ ଭାଲେଶ୍ୱର ଗଁା ହରିଜନ ପଡାର କମଳା ହରିଜନ (୫୨), ଫିରତ ହରିଜନ (୫୦), ତୁଳସୀରନ ସତ୍ନାମୀ(୪୮) ଓ ମନ୍ଦିରପଡ଼ାର ଦିପେଶ ଚନ୍ଦ୍ରକାର (୧୯)। ସୂଚନା ଅନୁଯାୟୀ, ବୁଧବାର ଅପରାହ୍ନରେ ଦୀପେଶ ଗଁା ପାଖ ଏକ ପୋଲ ବାଡ ଉପରେ ବସିଥିବା ବେଳେ ବଣ ବିଲୁଆ ହଠାତ୍ ତାଙ୍କ ଆଡକୁ ମାଡିଆସିଥିଲା। ଦୀପେଶ ଦୌଡି ପଳାଇବାକୁ ଚେଷ୍ଟା କରିଥିଲେ ମଧ୍ୟ ବିଲୁଆ ତାଙ୍କୁ ଗୋଡେଇ କାମୁଡିଥିଲା। ସ୍ଥାନୀୟ ଲୋକେ ଠେଙ୍ଗାବାଡି ଧରି ବିଲୁଆକୁ ପାଖ ଜଙ୍ଗଲକୁ ଘଉଡାଇବା ସହ ଦୀପେଶଙ୍କୁ ଗୁରୁତର ଅବସ୍ଥାରେ ଉଦ୍ଧାରକରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି। ସେହିପରି ଗୁରୁବାର ପୂର୍ବାହ୍ନରେ ଭାଲେଶ୍ୱର ହରିଜନପଡ଼ାର କେତେଜଣ ଡୁମେରମୁଡା ବନ୍ଧକୁ ଗାଧୋଇବା ପାଇଁ ଯାଉଥିଲେ। ସେହି ସମୟରେ ହଠାତ୍ ଜଙ୍ଗଲ ପଟୁ ବିଲୁଆ ଆସି ଫିରତ, ତୁଳସୀରନ ଓ କମଳାଙ୍କୁ ଆକ୍ରମଣକରି ଲହୁଲୁହାଣ କରି ଦେଇଥିଲା। ଆହତମାନେ ଚିତ୍କାର କରିବାରୁ ବିଲୁଆ ସ୍ଥାନ ଛାଡି ଜଙ୍ଗଲକୁ ଚାଲିଯାଇଥିଲା। ପରିବାର ଲୋକେ ଆହତମାନଙ୍କୁ ଉଦ୍ଧାରକରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସମସ୍ତେ ଚିକିତ୍ସାଧୀନ ଥିବାବେଳେ ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ସୂଚନା ମିଳିଛି। ଏଣେତେଣେ ଘୂରିବୁଲୁଥିବା ବିଲୁଆ ଯାହାକୁ ଦେଖିଲେ ଆକ୍ରମଣ କରୁଥିବାରୁ ପାଗଳ ହୋଇଯାଇଥିବା ଲୋକେ ସନ୍ଦେହ କରୁଛନ୍ତି ା ବନ ବିଭାଗ କର୍ମଚାରୀ ଏହାକୁ ଧରି ଅନ୍ୟତ୍ର ଛାଡିବା ସହ ଆହତଙ୍କ ଚିକିତ୍ସା ଖର୍ଚ୍ଚ ବହନ କରିବାକୁ ଅଞ୍ଚଳବାସୀ ଦାବି କରିଛନ୍ତି ା
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
