ପେଟ୍ରୋଲ ପରେ ଡିଜେଲର ପାଳି! ଆରମ୍ଭ ହେବ ବାୟୋ ଡିଜେଲ, ଜାଣନ୍ତୁ କେତେ ପରିମାଣରେ ମିଶିବ…

ନୂଆଦିଲ୍ଲୀ,୨୨।୭: ପେଟ୍ରୋଲରେ ଇଥାନଲ ମିଶ୍ରଣ (Ethnaol Blending) କୁ ନେଇ ସାରା ଦେଶରେ ବେଶ୍ ହଙ୍ଗାମା ଚାଲିଛି। ଏହି ପେଟ୍ରୋଲ ଯୋଗୁଁ ସେମାନଙ୍କ ଗାଡ଼ି ଖରାପ ହେଉଥିବା ନେଇ ଅନେକ ଲୋକ ଅଭିଯୋଗ କରିଛନ୍ତି। ହେଲେ ସରକାର ଏହାକୁ ପ୍ରତ୍ୟାହାର କରିବା ନେଇ କୌଣସି ନିଷ୍ପତ୍ତି ନେଇନାହାନ୍ତି। ଏସବୁ ବିରୋଧ ଏବଂ ଅଭିଯୋଗ ମଧ୍ୟରେ ଏବେ ସରକାର ପେଟ୍ରୋଲ ପରେ ମିଶ୍ରିତ ଡିଜେଲ ଆଣିବାକୁ ମଧ୍ୟ ପ୍ରସ୍ତୁତି କରୁଛନ୍ତି। ଯେପରି ବଜାରକୁ E20 ଆସିସାରିଛି, ସେହିପରି ଏବେ B5 ମଧ୍ୟ ଆସିବାକୁ ଯାଉଛି।

ବାସ୍ତବରେ E-20 ପରେ ଏବେ ସରକାର ଖୁବ୍ ଶୀଘ୍ର B-5 ଫ୍ୟୁଏଲ୍ ଆଣିବାକୁ ପ୍ରସ୍ତୁତି କରୁଛନ୍ତି। ଏହା ଏକ ମିଶ୍ରିତ ଡିଜେଲ ହେବ, ଯେପରି ପେଟ୍ରୋଲରେ ୨୦ ପ୍ରତିଶତ ଏଥାନୋଲ ମିଶାଇ E-20 ପେଟ୍ରୋଲ ତିଆରି କରାଯାଇଛି, ସେହିପରି ୯୫ ପ୍ରତିଶତ ଡିଜେଲରେ ୫ ପ୍ରତିଶତ ଜୈବ ସାମଗ୍ରୀ (ବ୍ରାନ୍/ଜୈବିକ ତେଲ) ମିଶାଇ ଏହି B-5 ଡିଜେଲ ପ୍ରସ୍ତୁତ କରାଯିବ। ଇଞ୍ଜିନରେ କୌଣସି ପ୍ରକାରର ପରିବର୍ତ୍ତନ ନକରି ଏହାକୁ ବ୍ୟବହାର କରାଯାଇପାରିବ ବୋଲି ସରକାର କହିଛନ୍ତି।

କିପରି ତିଆରି ହେବ ବାୟୋଡିଜେଲ?

ଇଣ୍ଡିଆନ ଅଏଲ୍ (Indian Oil) ତରଫରୁ ମିଳିଥିବା ସୂଚନା ଅନୁଯାୟୀ, ଏହି ଡିଜେଲ ଜଟ୍ରୋଫା (Jatropha) ଏବଂ କରଞ୍ଜରୁ ତିଆରି କରାଯିବ। ଏହି ଦୁଇଟି ଯାକ ଉଦ୍ଭିଦ ଜାତୀୟ ତେଲ, ଯାହାକୁ ଖାଦ୍ୟ ପ୍ରସ୍ତୁତିରେ ବ୍ୟବହାର କରାଯାଇପାରିବ ନାହିଁ। ଏଭଳି ପରିସ୍ଥିତିରେ ଏଗୁଡ଼ିକର ସାହାଯ୍ୟରେ ଭଲ ଗୁଣବତ୍ତା ବିଶିଷ୍ଟ ବାୟୋଡିଜେଲ ତିଆରି ହୋଇପାରିବ। ସରକାରଙ୍କ ଦ୍ୱାରା ପୂର୍ବରୁ ମଧ୍ୟ ବାୟୋଡିଜେଲ ତିଆରି କରି ଏହାର ପରୀକ୍ଷଣ କରାଯାଇସାରିଛି, ଯାହା ସଫଳ ହୋଇଥିଲା। ହରିୟାଣା ରୋଡୱେଜ୍, ରେଳବାଇ ଏବଂ ଟାଟାର ସାହାଯ୍ୟରେ ୫ ରୁ ୧୦ ପ୍ରତିଶତ ପର୍ଯ୍ୟନ୍ତ ମିଶ୍ରଣ କରି ବ୍ୟାପକ ପରୀକ୍ଷଣ କରାଯାଇସାରିଛି।

ଏହି ବାୟୋଡିଜେଲ ତିଆରି କରିବାର ଉଦ୍ଦେଶ୍ୟ ସେହିଆ, ଯାହା E-20 କୁ ନେଇ ସରକାରଙ୍କ ଲକ୍ଷ୍ୟ ରହିଛି। ସରକାର ଚାହୁଁଛନ୍ତି ଯେ ତେଲ ପାଇଁ ଅନ୍ୟ ଦେଶ ଉପରେ ନିର୍ଭରଶୀଳ ହେବା ଉଚିତ୍ ନୁହେଁ। ଏଭଳି ପରିସ୍ଥିତିରେ ଘରୋଇ ଉତ୍ପାଦନ ହିଁ ଅଧିକ ଉପଯୁକ୍ତ ହେବ। ଏହା ବ୍ୟତୀତ ଏହି ଇନ୍ଧନ ସାହାଯ୍ୟରେ ପ୍ରଦୂଷଣ ମଧ୍ୟ ନିୟନ୍ତ୍ରିତ ହେବ। E-20 ର ଲକ୍ଷ୍ୟ ନିର୍ଦ୍ଧାରିତ ସମୟ ପୂର୍ବରୁ ହିଁ ହାସଲ ହୋଇସାରିଛି। ଏଭଳି ସ୍ଥିତିରେ ବାୟୋଡିଜେଲ ଆଣିବା ପାଇଁ ମଧ୍ୟ ସରକାରଙ୍କର ଯୋଜନା ରହିଛି।