ଦେଶର ପ୍ରଥମ ହାଇଡ୍ରୋଜେନ୍ ଟ୍ରେନକୁ ସବୁଜ ପତାକା ଦେଖାଇବେ ପିଏମ ମୋଦି; ଏହି ସବୁ ରୁଟ୍ରେ ଚାଲିବ…
ନୂଆଦିଲ୍ଲୀ,୧୭।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ହରିୟାଣାର ଜିନ୍ଦଠାରୁ ଦେଶର ପ୍ରଥମ ହାଇଡ୍ରୋଜେନ୍ ଟ୍ରେନର ଶୁଭାରମ୍ଭ କରିବେ। ଏହାସହ ଭାରତ ବିଶ୍ୱର ସେହି କେତେକ ସୀମିତ ଦେଶଙ୍କ ମଧ୍ୟରେ ସାମିଲ ହେବ, ଯେଉଁଠାରେ ହାଇଡ୍ରୋଜେନ୍ ଟ୍ରେନ ଚାଲିଥାଏ। ଏହି ଟ୍ରେନ ଜିନ୍ଦ-ସୋନିପତ ମଧ୍ୟରେ ୮୯ କିଲୋମିଟରର ରୁଟ୍ରେ ଚାଲିବ। ୧୦ଟି କୋଚ ବିଶିଷ୍ଟ ଏହି ଟ୍ରେନ ବିଶ୍ୱର ସବୁଠାରୁ ଲମ୍ବା ଏବଂ ଶକ୍ତିଶାଳୀ ହାଇଡ୍ରୋଜେନ୍ ଟ୍ରେନଗୁଡ଼ିକ ମଧ୍ୟରୁ ଅନ୍ୟତମ। ଚାଇନା, ଜର୍ମାନୀ, ଫ୍ରାନ୍ସ ଭଳି ଦେଶମାନେ ହାଇଡ୍ରୋଜେନ୍ ଟ୍ରେନର ପରୀକ୍ଷଣ କରୁଥିଲେ ମଧ୍ୟ ସେମାନଙ୍କ ପାଖରେ ମାତ୍ର ଦୁଇ-ତିନି କୋଚ ବିଶିଷ୍ଟ ଟ୍ରେନ ରହିଛି।
ରେଳବାଇର ଯୋଜନା ଅନୁଯାୟୀ, କାଲକା-ଶିମଲା ଭଳି ହେରିଟେଜ ରୁଟ୍ରେ ମଧ୍ୟ ହାଇଡ୍ରୋଜେନ୍ ଟ୍ରେନ ଚଲାଯିବ। ଏହି ଟ୍ରେନର ସର୍ବାଧିକ ୧୧୦ କିଲୋମିଟର/ଘଣ୍ଟା ବେଗରେ ଚାଲିବା ପାଇଁ ପ୍ରସ୍ତୁତ କରାଯାଇଛି, କିନ୍ତୁ ଜିନ୍ଦ-ସୋନିପତ ରୁଟ୍ରେ ଏହା ୭୫ କିଲୋମିଟର/ଘଣ୍ଟା ବେଗରେ ଦୌଡ଼ିବ। କୋଚ ମଝିରେ ଯାତାୟାତ ପାଇଁ ଜାଗା ରଖାଯାଇ ଦୁଇ ପାର୍ଶ୍ୱରେ ତିନି-ତିନି ଜଣ ଯାତ୍ରୀ ବସିବା ପାଇଁ ସିଟ୍ ଲଗାଯାଇଛି। ୨,୬୦୦ ଯାତ୍ରୀ କ୍ଷମତା ବିଶିଷ୍ଟ ଏହି ଟ୍ରେନ ସମ୍ପୂର୍ଣ୍ଣ ସ୍ବଦେଶୀ ଜ୍ଞାନକୌଶଳ ଉପରେ ଆଧାରିତ। ଏହାକୁ ଭାରତରେ ହିଁ ଡିଜାଇନ ଏବଂ ନିର୍ମାଣ କରାଯାଇଛି।
ଏହି ଟ୍ରେନରେ ୨ଟି ହାଇଡ୍ରୋଜେନ୍ ଡ୍ରାଇଭିଂ ପାୱାର କାର୍ (DPC) ଏବଂ ୮ଟି ଟ୍ରେଲର କୋଚ ଲାଗିଛି। ଏହି ପଦକ୍ଷେପ ଭାରତୀୟ ରେଳବାଇକୁ ‘ନେଟ ଜିରୋ’ ନିର୍ଗମନ ଲକ୍ଷ୍ୟ ପଥରେ ଆଗେଇ ନେବ। ରେଳବାଇର ଦାବି ଅନୁଯାୟୀ, ସୁରକ୍ଷା ମାମଲାରେ ଏହାକୁ ଜର୍ମାନୀର ପ୍ରସିଦ୍ଧ ଏଜେନ୍ସି TV SD ଏବଂ ପେସୋ (PESO – ପେଟ୍ରୋଲିୟମ ଏବଂ ବିସ୍ଫୋରକ ସୁରକ୍ଷା ସଂଗଠନ) ପକ୍ଷରୁ ଏନଓସି (NOC) ପ୍ରଦାନ କରାଯାଇଛି।
ଏହି ଟ୍ରେନ ପାଇଁ ରେଳବାଇ ପକ୍ଷରୁ ଜିନ୍ଦଠାରେ ଭାରତର ସବୁଠାରୁ ବଡ଼ ହାଇଡ୍ରୋଜେନ୍ ରିଫ୍ୟୁଲିଂ ସେଣ୍ଟର ସ୍ଥାପନ କରାଯାଇଛି। ଏହା ୩ଟି ପର୍ଯ୍ୟାୟରେ କାର୍ଯ୍ୟ କରିଥାଏ। ଏଥିରେ, ଇଲେକ୍ଟ୍ରୋଲିସିସ ପ୍ରକ୍ରିୟା ମାଧ୍ୟମରେ ପାଣିରୁ ହାଇଡ୍ରୋଜେନ ପ୍ରସ୍ତୁତ କରାଯାଏ। ଏହାପରେ ହାଇଡ୍ରୋଜେନ ଗ୍ୟାସକୁ ୫୦୦ ବାରରେ ଅତ୍ୟଧିକ ଚାପ ପ୍ରୟୋଗ କରି କମ୍ପ୍ରେସ କରାଯାଏ। ଶେଷରେ ଦୁଇଟି ଡିସପେନସର ସାହାଯ୍ୟରେ ଟ୍ରେନରେ ଗ୍ୟାସ ଭର୍ତ୍ତି କରାଯାଇଥାଏ।
Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
