ଗଞ୍ଜାମରେ ରଥଯାତ୍ରା; ମାଉସୀ ମା’ ମନ୍ଦିରରେ ପହଞ୍ଚି ଦର୍ଶନ ଦେଲେ ତିନି ଠାକୁର, କୁନି ଭକ୍ତ କଲେ….

ଗଞ୍ଜାମ,୧୬।୭(ବିଦ୍ୟାଧର ସାହୁ ): ଗଞ୍ଜାମ ସହରରେ ଚଳିତ ବର୍ଷ ରଥଯାତ୍ରା ମହା ଆଡମ୍ବରରେ ପାଳିତ ହୋଇଛି । ବଡ଼ ବଜାର ସ୍ଥିତ ଜଗନ୍ନାଥ ମନ୍ଦିର ପରିଚାଳନା କମିଟି ପକ୍ଷରୁ ଯଥା ରୀତିନୀତି ଅନୁସାରେ ପୂଜାର୍ଚ୍ଚନା ପରେ ତିନି ଠାକୁରଙ୍କୁ ପହଣ୍ଡି ବିଜେ କରାଯାଇଥିଲା । ଅପରାହ୍ନରେ ରଥଟଣା କାର୍ଯ୍ୟ ଆରମ୍ଭ ହୋଇଥିଲା ।

ରଥ ମାଉସୀ ମା’ଙ୍କ ମନ୍ଦିରରେ ପହଞ୍ଚିବା ପରେ ଭକ୍ତଙ୍କୁ ଦର୍ଶନ ଦେଇଥିଲେ ତିନି ଠାକୁର । ଚଳିତ ବର୍ଷ ବଡ଼, ଛୋଟ ଓ କୁନି ରଥ ଏହିଭଳି ତିନୋଟି ରଥ ଟଣା ଯାଉଥିବା ଦେଖିବାକୁ ମିଳିଥିଲା । କୁନି ରଥକୁ ସାନ ପିଲାମାନେ ଟାଣି ଟାଣି ମାଉସୀ ମା’ ମନ୍ଦିର ଠାରେ ପହଞ୍ଚାଇଥିଲେ । ବିଶିଷ୍ଟ ବ୍ୟବସାୟୀ ତଥା ଜଗନ୍ନାଥ ମନ୍ଦିର ପରିଚାଳନା ମୁଖ୍ୟ କାଙ୍ଗା ପଲାଇଙ୍କ ବର୍ଷକୁ ଥରେ ଅନୁଷ୍ଠିତ ଏହି ଗୁଣ୍ଡିଚା ଯାତ୍ରା ପାଇଁ ଗଞ୍ଜାମ ସହର ଚଲଚଞ୍ଚଳ ହୋଇ ଉଠିଥିଲା । ଜଗନ୍ନାଥଙ୍କ ପୂଜକ କାଳୁଚରଣ ଶତପଥୀ, ବରିଷ୍ଠ ସେବାୟତ ପ୍ରଭାକର ପାଣିଗ୍ରାହୀ, ବିଜୟ ପାଣିଗ୍ରାହୀ, ପ୍ରକାଶ ପାରିଛା,ବାଡ଼ଗ୍ରାହୀ ଦୀପକ ପଣ୍ଡା, ଯୁବ ସେବାୟତ ଅସ୍ମିତ ପଣ୍ଡା, ପପୁ ପଣ୍ଡା, ରବୀନ୍ଦ୍ର ମହାପାତ୍ର ପ୍ରମୁଖ ସେବାୟତ ସହଯୋଗ କରୁଛନ୍ତି ।

ସେହିପରି ପୁରୁଣା ଜଗନ୍ନାଥ ମନ୍ଦିର ପୂଜକ କନ୍ଧ ଶତପଥୀଙ୍କ ନେତୃତ୍ୱରେ ରଥଯାତ୍ରା ପାଳିତ ହେଉଅଛି । ରଥଟଣା ବେଳେ ତହସିଲଦାର ସୁକାନ୍ତ ଚନ୍ଦ୍ର ମିଶ୍ର ଏବଂ ଆଇନ ଶୃଙ୍ଖଳା ନିମନ୍ତେ ଗଞ୍ଜାମ ଥାନା ପୋଲିସ ପକ୍ଷରୁ ବ୍ୟାପକ ପୋଲିସ ବନ୍ଦୋବସ୍ତ କରାଯାଇଥିଲା ।