ଇରାନ୍ ଯୁଦ୍ଧରେ ଆମେରିକାର ଖର୍ଚ୍ଚ ହୋଇଛି ଏତେ ଡଲାର, ଜାଣିଲେ ହୋଇଯିବେ ତାଜୁବ
ୱାଶିଂଟନ, ୨୩ା୭: ଇରାନ୍ ବିରୋଧରେ ଚାଲିଥିବା ଯୁଦ୍ଧରେ ଆମେରିକାର ଏପର୍ଯ୍ୟନ୍ତ ପ୍ରାୟ ୩୭.୫ ବିଲିୟନ ଡଲାର (ପ୍ରାୟ ୩.୧ ଲକ୍ଷ କୋଟି ଟଙ୍କା) ଖର୍ଚ୍ଚ ହୋଇସାରିଛି। ଆମେରିକା ପ୍ରତିରକ୍ଷା ସଚିବ ପିଟ୍ ହେଗ୍ସେଥ କଂଗ୍ରେସ (ସଂସଦ)ର ସାଂସଦମାନଙ୍କ ଆଗରେ ଏହି ତଥ୍ୟ ରଖିବା ସହ ଯୁଦ୍ଧ ପରିଚାଳନା ପାଇଁ ଅଧିକ ବଜେଟ ମଞ୍ଜୁର କରିବାକୁ ଅନୁରୋଧ କରିଛନ୍ତି। ଆସନ୍ତା ନଭେମ୍ବରରେ ଆମେରିକାରେ ମଧ୍ୟବର୍ତ୍ତିକାଳୀନ ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ଏହି ଯୁଦ୍ଧ ଓ ଏହାର ବର୍ଦ୍ଧିତ ଆର୍ଥିକ ବୋଝକୁ ନେଇ ଆମେରିକା ସାଂସଦମାନେ ଅସନ୍ତୋଷ ପ୍ରକାଶ କରିଛନ୍ତି।
ସଂସଦୀୟ ଶୁଣାଣି ସମୟରେ ହେଗ୍ସେଥ୍ ଜଣାଇଛନ୍ତି ଯେ, ଏହି ୩୭.୫ ବିଲିୟନ ଡଲାର ମଧ୍ୟରେ ଯୁଦ୍ଧର ବର୍ତ୍ତମାନର ଖର୍ଚ୍ଚ ସହ ଆସନ୍ତା ସେପ୍ଟେମ୍ବର ୩୦ ପର୍ଯ୍ୟନ୍ତ ହେବାକୁ ଥିବା ଆନୁମାନିକ ବ୍ୟୟ ମଧ୍ୟ ସାମିଲ ରହିଛି। ଗତ ମାସରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଇରାନ୍ ସଂଘର୍ଷ ପାଇଁ ଅତିରିକ୍ତ ୯୦ ବିଲିୟନ ଡଲାରର ବଜେଟ ଦାବି କରିଥିଲେ। ଅନ୍ୟପକ୍ଷରେ ୨୦୨୭ ପାଇଁ ପେଣ୍ଟାଗନ ମୋଟ ୧.୫ ଟ୍ରିଲିୟନ ଡଲାର ବଜେଟ ମଞ୍ଜୁର କରିବାକୁ ସଂସଦକୁ ନିବେଦନ କରିଛି।
ଗତ ଫେବୃଆରୀ ୨୮ରୁ ଆମେରିକା ଓ ଇସ୍ରାଏଲ ଦ୍ୱାରା ଇରାନ୍ ଉପରେ ବୋମାବର୍ଷଣ ଆରମ୍ଭ ହେବା ଦିନଠାରୁ ଟ୍ରମ୍ପ୍ ସରକାର ଯୁଦ୍ଧ ନୀତି ସମ୍ପର୍କରେ ସଂସଦକୁ ଅବଗତ କରାଉନାହାନ୍ତି ବୋଲି ଉଭୟ ରିପବ୍ଲିକାନ ଓ ଡେମୋକ୍ରାଟିକ ସାଂସଦମାନେ ଅଭିଯୋଗ କରିଛନ୍ତି। ଆପ୍ରୋପ୍ରିଏସନ୍ସ କମିଟିର ବରିଷ୍ଠ ଡେମୋକ୍ରାଟ୍ ସାଂସଦ ପାଟି ମୁରେ ପ୍ରଶ୍ନ ଉଠାଇଛନ୍ତି ଯେ, ରାଷ୍ଟ୍ରପତି ଟ୍ରମ୍ପ୍ କ୍ରମାଗତ ଭାବେ ଯୁଦ୍ଧକୁ ଆହୁରି ଭୟାନକ ରୂପ ଦେବା ସହ ସାଧାରଣ ନାଗରିକଙ୍କ ଆବଶ୍ୟକ ଭିତ୍ତିଭୂମି ଉପରେ ଆକ୍ରମଣର ଧମକ ଦେଉଛନ୍ତି, ଯାହା ଏକ ଯୁଦ୍ଧ ଅପରାଧ ସହ ସମାନ।
କଂଗ୍ରେସର ପ୍ରତିନିଧି ସଭା (ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ) ଏବଂ ସିନେଟ୍ରେ ରିପବ୍ଲିକାନ ପାର୍ଟିର ସାମାନ୍ୟ ବହୁମତ ଥିବାରୁ ଏହି ନୂତନ ବଜେଟ ବିଲ୍ ପାସ୍ କରିବା ପାଇଁ ସରକାରଙ୍କୁ ଡେମୋକ୍ରାଟିକ୍ ସାଂସଦମାନଙ୍କ ସମର୍ଥନ ଆବଶ୍ୟକ। ସାଂସଦ କିର୍ଷ୍ଟେନ ଗିଲିବ୍ରାଣ୍ଡ ପ୍ରଶ୍ନ କରିଛନ୍ତି ଯେ, ଯୁଦ୍ଧ ଶେଷ ହେବା ନେଇ ପ୍ରଶାସନ ପକ୍ଷରୁ ଦିଆଯାଉଥିବା ବକ୍ତବ୍ୟ ଓ ବାସ୍ତବ ସ୍ଥିତି ମଧ୍ୟରେ କୌଣସି ତାଳମେଳ ରହୁନାହିଁ, ଯାହା ନାଗରିକଙ୍କ ମଧ୍ୟରେ ବ୍ୟାପକ ଅସନ୍ତୋଷ ସୃଷ୍ଟି କରୁଛି।
Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
