Meta Admits Mistakes: ମେଟା ଭୁଲ ସ୍ୱୀକାର କରି ମାଗିଲା କ୍ଷମା , କଣ୍ଟେଣ୍ଟ ବୁଷ୍ଟିଂ ନେଇ କଲା ବଡ଼ ଖୁଲାସା

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଏକ ଭିଡିଓକୁ ସାମୟିକ ଭାବେ ହଟାଇବା ଘଟଣାକୁ ନେଇ କେନ୍ଦ୍ର ସରକାରଙ୍କ ସମନ ପରେ ମେଟାର ଗ୍ଲୋବାଲ ପ୍ରତିନିଧି ଦଳ ବୁଧବାର ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ସହ ଭେଟିଥିଲେ। ବୈଠକ ପରେ ସୂତ୍ରରୁ ମିଳିଥିବା ସୂଚନା ଅନୁସାରେ, ମେଟାର ମୁଖ୍ୟ ମାର୍କ ଜୁକରବର୍ଗ ଶିଶୁ ଯୌନ ନିର୍ଯାତନା ସମ୍ବନ୍ଧୀୟ ସାମଗ୍ରୀ, ଡିପ୍ଫେକ୍ କଣ୍ଟେଣ୍ଟ ଏବଂ ପ୍ଲାଟଫର୍ମର ପରିଚାଳନାଗତ ତ୍ରୁଟି ପାଇଁ କ୍ଷମା ପ୍ରାର୍ଥନା କରିଛନ୍ତି।

ସୂତ୍ର ଅନୁଯାୟୀ, ମେଟା ପ୍ରତିନିଧିମାନଙ୍କୁ ସ୍ପଷ୍ଟ କରାଯାଇଥିଲା ଯେ କମ୍ପାନୀ 'ଇଣ୍ଟରମିଡିଆରି' (Intermediary) ପରିଭାଷା ଅଧୀନରେ ଆସୁନାହିଁ। କାରଣ ସୋସିଆଲ ମିଡିଆ ପ୍ଲାଟଫର୍ମ ନିଜେ ନିର୍ଦ୍ଧାରଣ କରେ କେଉଁ ଉପଭୋକ୍ତାଙ୍କ ପାଖକୁ କେଉଁ କଣ୍ଟେଣ୍ଟ ପହଞ୍ଚିବ। ତେଣୁ ସୂଚନା ପ୍ରଯୁକ୍ତି ଆଇନ (IT Act) ଅନୁଯାୟୀ ମିଳୁଥିବା 'ସେଫ୍ ହାର୍ବର' (Safe Harbour) ସୁରକ୍ଷା ଏହି କ୍ଷେତ୍ରରେ ପ୍ରଯୁଜ୍ୟ ନୁହେଁ।

ସୂତ୍ର ଆହୁରି କହିଛନ୍ତି ଯେ ମେଟା ପକ୍ଷରୁ ସ୍ୱୀକାର କରାଯାଇଛି ଯେ ନିର୍ଦ୍ଦିଷ୍ଟ ପ୍ରକାରର କଣ୍ଟେଣ୍ଟକୁ ଅଧିକ ପ୍ରଚାର (Boost) କରିବା ପାଇଁ ବହୁ ପରିମାଣର ଅର୍ଥ ନିଆଯାଇଥିଲା। କମ୍ପାନୀ ଏହା ମଧ୍ୟ ମାନିଛି ଯେ ବହୁ ପରିମାଣରେ ବେଆଇନ କଣ୍ଟେଣ୍ଟ ପ୍ରମୋଟ୍ ହୋଇଥିଲା। ଏହି ପ୍ରସଙ୍ଗରେ ମେଟା ଅଧିକାରୀମାନଙ୍କୁ ପୁଣିଥରେ ଡକାଯିବ ବୋଲି ସୂତ୍ର କହିଛନ୍ତି।

ଉପଭୋକ୍ତା ସଂଖ୍ୟା ଦୃଷ୍ଟିରୁ ଭାରତ ହେଉଛି ମେଟାର ସବୁଠାରୁ ବଡ଼ ବଜାର। ଦେଶରେ କୋଟି କୋଟି ଲୋକ ଫେସବୁକ୍, ଇନଷ୍ଟାଗ୍ରାମ ଓ ହ୍ୱାଟ୍ସଆପ୍ ବ୍ୟବହାର କରୁଛନ୍ତି।

ଏହାପୂର୍ବରୁ ସଂସଦୀୟ କମିଟି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭିଡିଓକୁ ସାମୟିକ ଭାବେ ହଟାଇବା ଘଟଣାରେ ମେଟା ସିଇଓଙ୍କୁ କ୍ଷମା ମାଗିବାକୁ କହିଥିଲା।

ଜୁଲାଇ ୨୩ରେ CJPର ବିରୋଧ ପ୍ରଦର୍ଶନ ଚାଲିଥିବା ବେଳେ ପ୍ରଧାନମନ୍ତ୍ରୀ ମୋଦୀ କ୍ୟାମେରା ସାମ୍ନାରେ ସିଧାସଳଖ କଥା ହୋଇଥିବା ଏକ ଭର୍ଟିକାଲ୍ ଭିଡିଓ ପୋଷ୍ଟ କରିଥିଲେ। ଏହି ଭିଡିଓକୁ ମେଟା ମାଲିକାନାରେ ଥିବା ଫେସବୁକ୍ ଓ ଇନଷ୍ଟାଗ୍ରାମକୁ କିଛି ସମୟ ପାଇଁ ହଟାଯାଇଥିଲା, ପରେ ପୁନର୍ବାର ରିଷ୍ଟୋର କରାଯାଇଥିଲା।

ଏହି ଘଟଣାକୁ ନେଇ ଆମେରିକାସ୍ଥିତ ମେଟା କମ୍ପାନୀ ଏହାକୁ ଏକ ପ୍ରାଯୁକ୍ତିକ ତ୍ରୁଟି (Technical Glitch) ବୋଲି କହି କ୍ଷମା ମାଗିଥିଲା। କିନ୍ତୁ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରାଳୟ (MeitY) ଏହି ସ୍ପଷ୍ଟୀକରଣକୁ 'ଅପର୍ଯ୍ୟାପ୍ତ' ବୋଲି ବର୍ଣ୍ଣନା କରିଥିଲା। ପରେ ମେଟା କହିଥିଲା ଯେ ଭିଡିଓଟି ଭୁଲବଶତଃ ହଟିଯାଇଥିଲା ଏବଂ ପରେ ତାହାକୁ ପୁନଃ ପ୍ଲାଟଫର୍ମରେ ଉପଲବ୍ଧ କରାଯାଇଛି।