Judge Threatened: ଜୀବନ୍ତ ରହିବାକୁ ହେଲେ ଟଙ୍କା ଦେବାକୁ ପଡ଼ିବ... ଜଣେ ଜଜଙ୍କୁ ୫୦୦ କୋଟି ଦାବି କରି ଧମକ

ଏହି ଧମକପୂର୍ଣ୍ଣ ପତ୍ର ଉତ୍ତରପ୍ରଦେଶର ପ୍ରୟାଗରାଜରୁ ସ୍ପିଡ୍ ପୋଷ୍ଟ ମାଧ୍ୟମରେ ପଠାଯାଇଥିଲା। ପତ୍ରରେ ଭୟଙ୍କର ଚେତାବନୀ ଦିଆଯାଇଛି।

ମଧ୍ୟପ୍ରଦେଶର ରୀବାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଜଜଙ୍କୁ ଡକାୟତମାନେ ୫୦୦ କୋଟି ଟଙ୍କା ଦେବାକୁ ଦାବି କରିଛନ୍ତି। ଯଦି ବଞ୍ଚି ରହିବାକୁ ଚାହୁଁଛ, ୫୦୦ କୋଟି ଟଙ୍କା ଦିଅ ବୋଲି ଜଜଙ୍କୁ ଏକ ପତ୍ର ଜରିଆରେ ଜଣାଇ ଦିଆଯାଇଛି ।

ଏହି ଅର୍ଥ ନ ଦେଲେ ଗମ୍ଭୀର ପରିଣାମ ଭୋଗିବାକୁ ପଡ଼ିବ ବୋଲି ମଧ୍ୟ ଚେତାବନୀ ଦିଆଯାଇଛି। ପୋଲିସ୍ ବର୍ତ୍ତମାନ ଏହି ପୂରା ଘଟଣାର ତଦନ୍ତ କରୁଛି। ପୋଲିସ୍ କହିବା ଅନୁଯାୟୀ, ଧମକପୂର୍ଣ୍ଣ ପତ୍ରଟି ରୀବାର ତ୍ୟୋନ୍ଥର ଅଦାଲତରେ ପ୍ରଥମ ସିଭିଲ ଜଜ ମୋହିନୀ ଭଦୌରିଆଙ୍କୁ ପଠାଯାଇଛି। ପତ୍ର ପଠାଇଥିବା ବ୍ୟକ୍ତି ନିଜକୁ କୁଖ୍ୟାତ ଡକାୟତ ସରଗନା ହନୁମାନ ଗିରୋହର ସଦସ୍ୟ ବୋଲି ଦାବି କରିଛି।ଏହି ଧମକପୂର୍ଣ୍ଣ ପତ୍ର ଉତ୍ତରପ୍ରଦେଶର ପ୍ରୟାଗରାଜରୁ ସ୍ପିଡ୍ ପୋଷ୍ଟ ମାଧ୍ୟମରେ ପଠାଯାଇଥିଲା। ପତ୍ରରେ ଭୟଙ୍କର ଚେତାବନୀ ଲେଖାଯାଇଛି। ଲେଖାଯାଇଛି ଯେ, ଜୀବନ୍ତ ରହିବାକୁ ହେଲେ ଟଙ୍କା ଦେବାକୁ ପଡ଼ିବ। ଏହା ସହିତ ଆଦେଶ ଦିଆଯାଇଛି ଯେ ଏହି ରାଶି ଉତ୍ତରପ୍ରଦେଶର ବଡ଼ଗଡ ଜଙ୍ଗଲରେ ପହଞ୍ଚାଇ ଦିଆଯାଉ, ନଚେତ୍ ଭୟଙ୍କର ପରିଣାମ ଭୋଗିବାକୁ ପଡ଼ିବ।

ଧମକପୂର୍ଣ୍ଣ ପତ୍ର ମିଳିବା ମାତ୍ରେ ଜଜ ଭଦୌରିଆ ତୁରନ୍ତ ପୋଲିସରେ ଅଭିଯୋଗ କରିଥିଲେ। ରୀବାର ପୋଲିସ ଅଧୀକ୍ଷକ ବିବେକ ସିଂହ ତୁରନ୍ତ ଏକ ସ୍ୱତନ୍ତ୍ର ତଦନ୍ତ ଦଳ ଗଠନ କରି ଟିମ୍‌କୁ ଉତ୍ତରପ୍ରଦେଶ ପଠାଇଥିଲେ। ଏସପି ସିଂହ କହିଛନ୍ତି ଯେ, ଜଜଙ୍କୁ ରେଜିଷ୍ଟର୍ଡ ଡାକ ମାଧ୍ୟମରେ ଧମକ ଏବଂ ୫୦୦ କୋଟି ଟଙ୍କା ଦାବି କରୁଥିବା ପତ୍ର ମିଳିଛି। ପତ୍ର ଆଧାରରେ ଏକ ଟିମ୍ ଗଠନ କରାଯାଇଛି । ଏହି ଟିମକୁ ଉତ୍ତରପ୍ରଦେଶ ପଠାଯାଇଛି। ଜଣେ ସନ୍ଦିଗ୍ଧର ପରିଚୟ ମିଳିସାରିଛି ଏବଂ ଖୁବ୍ ଶୀଘ୍ର ସଫଳତା ମିଳିବ ବୋଲି ଆଶା କରାଯାଉଛି।

ପୋଲିସ ସୂତ୍ର ଅନୁଯାୟୀ, ଏହି ପତ୍ର ପ୍ରୟାଗରାଜରୁ ପଠାଯାଇଥିଲା ଏବଂ ଏଥିରେ ହନୁମାନ ଗିରୋହର ନାମ ବ୍ୟବହାର କରାଯାଇଛି । ଏହି ଗିରୋହ ଏକଦା ମଧ୍ୟଭାରତରେ ଆତଙ୍କ ସୃଷ୍ଟି କରିଥିଲା। ଅଭିଯୁକ୍ତ ପ୍ରୟାଗରାଜ ଜିଲ୍ଲାର ଜଣେ ବାସିନ୍ଦା ବୋସି ଜଣାପଡିଛି । ତାକୁ ଧରିବା ପାଇଁ ପୋଲିସ ଟିମ୍ ଉତ୍ତରପ୍ରଦେଶ ଅଭିମୁଖେ ଗସ୍ତ କରିଛି । ଏହି ଘଟଣା ସୋହାଗୀ ଥାନା ଅଞ୍ଚଳର । ଏହି ସ୍ଥାନ ମଧ୍ୟପ୍ରଦେଶ ଓ ଉତ୍ତରପ୍ରଦେଶର ସୀମାରେ ଅବସ୍ଥିତ। ଏହି ଧମକପୂର୍ଣ୍ଣ ପତ୍ର କେବଳ ନ୍ୟାୟିକ ବ୍ୟବସ୍ଥାକୁ ନୁହେଁ, ଆଇନ-ଶୃଙ୍ଖଳା ସହ ଜଡ଼ିତ ସମସ୍ତ ମହଲରେ ଚିନ୍ତା ବଢ଼ାଇ ଦେଇଛି। ରୀବାରେ ନ୍ୟାୟାଧୀଶମାନଙ୍କ ଏବଂ ଅଦାଲତ ପରିସରର ସୁରକ୍ଷାକୁ କଡ଼ାକଡ଼ି କରାଯାଇଛି। ଏହି ମାମଲାରେ ଭାରତୀୟ ନ୍ୟାୟ ସଂହିତା (BNS) ଧାରା ୩୦୮(୪) ଅନୁଯାୟୀ କେଶ୍ ରୁଜୁ କରାଯାଇଛି।