ଭୁବନେଶ୍ୱରରେ ବୁଲଡୋଜର ଆକ୍ସନ: ମାଟିରେ ମିଶିଲା ଲୁଟେରାଙ୍କ ଚୋରା ଗୋଦାମ

ଭୁବନେଶ୍ୱର: ରାଜଧାନୀରେ ଆଉ ଚଳିବନି ଅପରାଧୀଙ୍କ ଗୁଣ୍ଡାଗର୍ଦ୍ଦି କି ବେଆଇନ ସାମ୍ରାଜ୍ୟ। ସରକାରୀ ସମ୍ପତ୍ତି ଲୁଟ୍ କରି ବେଆଇନ କାରବାର ଚଳାଇବା ଏବେ ମହଙ୍ଗା ପଡ଼ିଛି। ଖାରବେଳ ନଗର ଥାନା ଅଧୀନ ମାଳିସାହି ଅଞ୍ଚଳରେ ଶେଷରେ ପ୍ରଶାସନର ବୁଲଡୋଜର ଗର୍ଜିଛି। ସ୍ମାର୍ଟ ସିଟିର ସରକାରୀ ସମ୍ପତ୍ତି ଲୁଟ୍ କରି ବେଆଇନ କବାଡ଼ି ଦୋକାନ ଚଲାଉଥିବା ଦୁର୍ବୃତ୍ତଙ୍କ ଆଡ୍ଡାସ୍ଥଳୀକୁ ସମ୍ପୂର୍ଣ୍ଣ ଭାବେ ମାଟିରେ ମିଶାଇ ଦେଇଛି ପୋଲିସ ଓ ସ୍ଥାନୀୟ ପ୍ରଶାସନ।

ରାଜଧାନୀର ଜନପଥରେ BMC ପକ୍ଷରୁ ଲଗାଯାଇଥିବା ଲକ୍ଷ ଲକ୍ଷ ଟଙ୍କାର ସ୍ମାର୍ଟ ସିଟି ଇଲେକ୍ଟ୍ରି ପୋଲ୍ ଏବଂ ଷ୍ଟ୍ରିଟ୍ ଲାଇଟ୍ ଚୋରି କରି ଏହି ଦୁର୍ବୃତ୍ତମାନେ ଦୀର୍ଘ ଦିନ ହେବ ପୋଲିସ ପାଇଁ ମୁଣ୍ଡବିନ୍ଧାର କାରଣ ସାଜିଥିଲେ। ଚୋରି ସାମଗ୍ରୀକୁ ରଖିବା ପାଇଁ ସେମାନେ ମାଳିସାହିରେ ଏକ ବେଆଇନ ଗୋଦାମ ଘର ତିଆରି କରିଥିଲେ। ଆଜି ସେହି ଗୋଦାମ ଘରକୁ ପୋଲିସ ସମ୍ପୂର୍ଣ୍ଣ ଭାବେ ଭାଙ୍ଗି ଚୁରମାର କରିଦେଇଛି।

ମିଳିଥିବା ସୂଚନା ମୁତାବକ, ଏହି ବେଆଇନ ଚୋରି ଏବଂ କବାଡ଼ି କାରବାର ପଛରେ ସେକ୍ ଯାଇବୁର ଏବଂ ସେକ୍ ହମିଦ ନାମକ ଦୁଇ ଜଣ ଅଭିଯୁକ୍ତ ରହିଛନ୍ତି। ସେକ୍ ଯାଇବୁର ସ୍ମାର୍ଟ ସିଟି ପୋଲ୍ ଖୋଲି ବିକ୍ରି କରିବା ଅଭିଯୋଗରେ ତାକୁ ପୂର୍ବରୁ ହିଁ ଗିରଫ କରାଯାଇଛି। ଏବଂ ଅପରାଧର ଅନ୍ୟତମ ମୁଖ୍ୟ ସୂତ୍ରଧର ସେକ୍ ହମିଦ ଏବେ ମଧ୍ୟ ଫେରାର୍ ଅଛି। ପୋଲିସ ତାକୁ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।