ଇସ୍ତଫା ଦେଲେ ଭୁବନେଶ୍ୱର ଡିସିପି ଜଗମୋହନ ମୀନା, ଛାଡ଼ିବେ ପୋଲିସ ଚାକିରି!

ଭୁବନେଶ୍ୱର: ଓଡ଼ିଶା ପୋଲିସ ପ୍ରଶାସନରୁ ଏକ ବଡ଼ ଖବର ସାମ୍ନାକୁ ଆସିଛି। ଭୁବନେଶ୍ୱର ଡିସିପି ଜଗମୋହନ ମୀନା ନିଜ ପଦରୁ ଇସ୍ତଫା ଦେଇଛନ୍ତି। ବ୍ୟକ୍ତିଗତ କାରଣ ଦର୍ଶାଇ ସେ ପୋଲିସ ସେବା ଛାଡ଼ିବାକୁ ନିଷ୍ପତ୍ତି ନେଇଥିବା ଜଣାପଡ଼ିଛି।

ତେବେ ମିଳିଥିବା ସୂଚନା ଅନୁଯାୟୀ, ଶ୍ରୀ ମୀନା ପ୍ରାୟ ୨୫ ଦିନ ତଳୁ ହିଁ ନିଜର ଇସ୍ତଫା ପତ୍ର ସରକାରଙ୍କୁ ପଠାଇ ସାରିଛନ୍ତି। ତେବେ ଏ ପର୍ଯ୍ୟନ୍ତ ତାଙ୍କର ଇସ୍ତଫା ସରକାରଙ୍କ ଦ୍ୱାରା ଗ୍ରହଣ ହୋଇନଥିବା ସେ ସ୍ପଷ୍ଟ କରିଛନ୍ତି। ପୋଲିସ ଚାକିରି ଛାଡ଼ିବା ପରେ ସେ ଏକ ପ୍ରତିଷ୍ଠିତ ଘରୋଇ କମ୍ପାନୀରେ  ଉଚ୍ଚ ପଦବୀରେ ଯୋଗ ଦେବେ ବୋଲି ସୂଚନା ଦେଇଛନ୍ତି ।

ଜଗମୋହନ ମୀନା ହେଉଛନ୍ତି ୨୦୧୩ ବ୍ୟାଚର ଜଣେ ଦକ୍ଷ ଆଇପିଏସ୍  ଅଫିସର। ଓଡ଼ିଶାରେ ନିଜର କାର୍ଯ୍ୟକାଳ ମଧ୍ୟରେ ସେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ସମ୍ଭାଳିଛନ୍ତି। ସେ ପୂର୍ବରୁ ଗଞ୍ଜାମ ଏବଂ ଅନୁଗୁଳ ଜିଲ୍ଲାର ଏସପି  ଭାବେ ସଫଳତାର ସହ କାର୍ଯ୍ୟ କରିଛନ୍ତି। ଏହା ସହିତ ସେ କଟକର ଡିସିପି ଭାବେ ମଧ୍ୟ ଦାୟିତ୍ୱ ତୁଲାଇଥିଲେ। ଗତ ୨୦୨୫ ଫେବୃଆରୀ ୨୮ ତାରିଖରେ ସେ ଭୁବନେଶ୍ୱର ଡିସିପି ଭାବେ କାର୍ଯ୍ୟରେ ଯୋଗ ଦେଇଥିଲେ।

ଏଭଳି ଜଣେ ବରିଷ୍ଠ ଓ ଦକ୍ଷ ଅଧିକାରୀ ହଠାତ୍ ଚାକିରି ଛାଡ଼ିବା ନିଷ୍ପତ୍ତି ପୋଲିସ ମହଲରେ ଚର୍ଚ୍ଚାର ବିଷୟ ପାଲଟିଛି। ତାଙ୍କର ଇସ୍ତଫା ପତ୍ରକୁ ତେବେ ସରକାର କେବେ ଗ୍ରହଣ କରୁଛନ୍ତି ଏବଂ ତାଙ୍କ ସ୍ଥାନରେ କିଏ ଭୁବନେଶ୍ୱରର ନୂଆ ଡିସିପି ହେବେ, ତାହା ଉପରେ ଏବେ ସମସ୍ତଙ୍କ ନଜର ରହିଛି।