Data Leak: ମୋବାଇଲ୍ ରିପେୟାର ପୂର୍ବରୁ ଏହି ଗୋଟିଏ ସେଟିଂ କରନ୍ତୁ, ଫଟୋ ଏବଂ ଚାଟ୍ ରହିବ ସୁରକ୍ଷିତ

ଆପଣଙ୍କ ଫୋନ୍ ରିପେୟାର ସମୟରେ ଡାଟା ଲିକ୍ ହୋଇଯାଇଛି କି ? ଏହି ଅସୁବିଧାରୁ ବଞ୍ଚିବେ କେମିତି ? ଫୋନକୁ ସର୍ଭିସ ସେଣ୍ଟରକୁ ଦେବା ପୂର୍ବରୁ ଆପଣ ଏହି ଗୋଟିଏ ସତର୍କତା ଅବଲମ୍ବନ କରି ପାରିବେ।

ଗତ ସପ୍ତାହରେ ସୋସିଆଲ ମିଡିଆରେ ଏକ ପୋଷ୍ଟ ବହୁତ ଭାଇରାଲ ହୋଇଥିଲା। କୋଲକାତାର ଜଣେ ମହିଳା ତାଙ୍କ ଫୋନକୁ ରିପେୟାର ପାଇଁ ଦେଇଥିଲେ। ସର୍ଭିସ ସେଣ୍ଟରରୁ ତାଙ୍କ ଫୋନର ବ୍ୟକ୍ତିଗତ ଡାଟା ଚୋରି ହୋଇଥିଲା ଏବଂ ବ୍ଲାକମେଲିଂର ଏକ ପର୍ଯ୍ୟାୟ ଆରମ୍ଭ ହୋଇଥିଲା। ପୀଡ଼ିତା ମହିଳା ହଇରାଣ ହେବା ପରେ ତାଙ୍କ ମୋବାଇଲ୍ ନମ୍ବର ବାଧ୍ୟ ହୋଇ ବଦଳାଇ ଦେଇଥିଲେ । ଅଭିଯୋଗ ପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି, କିନ୍ତୁ ଏହା କୌଣସି ପ୍ରଥମ ଘଟଣା ନୁହେଁ।

ସର୍ଭିସ ସେଣ୍ଟର ଠାରୁ ଆରମ୍ଭ କରି ରିପେୟାର ଦୋକାନ ପର୍ଯ୍ୟନ୍ତ ଡାଟା ଚୋରି ହେବା ବହୁତ ସାଧାରଣ ଘଟଣା ହୋଇଗଲାଣି । । ଅନେକ ସମୟରେ କମ୍ପାନୀଗୁଡ଼ିକର ଅଫିସିଆଲ ସର୍ଭିସ ସେଣ୍ଟର ମଧ୍ୟ ଏପରି କରୁଥିବା ଜଣାପଡିଛି ।

ଯଦି ଆପଣଙ୍କ ଫୋନ୍ ଚାଲୁଛି କିନ୍ତୁ କାମ କରୁନାହିଁ। ଅର୍ଥାତ୍ ସ୍କ୍ରିନ୍ ଅନ୍ ଅଛି କିନ୍ତୁ ଅନ୍ୟ କୌଣସି ପାର୍ଟ କାମ କରୁନାହିଁ, ଯେପରି ଚାର୍ଜିଂ କିମ୍ବା କ୍ୟାମେରା, ତେବେ କାମ ଟିକେ ସହଜ। ଆଜିକାଲି ସ୍ମାର୍ଟଫୋନଗୁଡ଼ିକ ରିପେୟାର ମୋଡ କିମ୍ବା ମେଣ୍ଟେନାନ୍ସ ମୋଡ ସହିତ ଆସୁଛି। ସେଟିଂସକୁ ଯାଇ ଏହାକୁ ଅନ୍ କରି ଦିଅନ୍ତୁ। ଏହାକୁ ଅନ୍ କରିବା ମାତ୍ରେ ଆପଣଙ୍କ ସ୍ମାର୍ଟଫୋନର ସମସ୍ତ ଫିଚର ବନ୍ଦ ହୋଇଯିବ। ଗ୍ୟାଲେରୀରୁ ଆରମ୍ଭ କରି କଣ୍ଟାକ୍ଟ ଏବଂ ହ୍ୱାଟ୍ସଆପର ଆକ୍ସେସ ମଧ୍ୟ ବନ୍ଦ ହୋଇଯିବ। ଏସଏମଏସ ଏବଂ ଅନ୍ୟାନ୍ୟ ବ୍ୟକ୍ତିଗତ ସୂଚନା ମଧ୍ୟ ଦେଖାଯିବ ନାହିଁ। ଫୋନର କେବଳ ସେହି ଅଂଶ ଚାଲୁ ରହିବ ଯାହା ସର୍ଭିସ ସେଣ୍ଟରକୁ ଆବଶ୍ୟକ। ଏହି ଫିଚରର ବିଶେଷତ୍ୱ ହେଉଛି ଯେ ଏହା ଆପଣଙ୍କ ତିଆରି କରିଥିବା ପାସୱାର୍ଡ ଦ୍ୱାରା ଅନ୍ ହେବ ଏବଂ ପୁନର୍ବାର ଆପଣଙ୍କ ପାସୱାର୍ଡ ଦ୍ୱାରା ଅଫ୍ ହେବ । ଯଦି ଏହି ଫିଚର ଆପଣଙ୍କ ଫୋନରେ ଅଛି, ତେବେ ଏହାର ବ୍ୟବହାର ନିଶ୍ଚିତ କରନ୍ତୁ।

ଯଦି ଆପଣଙ୍କ ଫୋନ୍ ବନ୍ଦ ଅଛି, ଅର୍ଥାତ୍ ସ୍କ୍ରିନ୍ ଅନ୍ ହେଉନାହିଁ, ତେବେ କ’ଣ କରିବେ? ଏହାର ସବୁଠାରୁ ଉତ୍ତମ ଉପାୟ ହେଉଛି ଫୋନକୁ ଫର୍ମାଟ କରି ଦେବା। ଅଧିକରୁ ଅଧିକ ସେହି ଦିନର ଡାଟା ହିଁ ଉଡ଼ିଯିବ, କାରଣ ବାକି ସବୁ ତ ଆପଣଙ୍କ ପାଖରେ ବ୍ୟାକଅପରେ ମିଳିଯିବ । ହଁ, ଯେଉଁମାନେ ଫୋନର ବ୍ୟାକଅପ ଅନ୍ ରଖନ୍ତି ନାହିଁ, ସେମାନଙ୍କ ପାଇଁ କ୍ଷତି ଅଧିକ ହେବ। କିନ୍ତୁ ଡାଟା ତ ଚୋରି ହେବ ନାହିଁ। ବନ୍ଦ ଫୋନକୁ ରିସେଟ କରିବା ପାଇଁ ଆପଣଙ୍କ ଗୁଗଲ ଆକାଉଣ୍ଟକୁ ଯାଆନ୍ତୁ। ସେଠାରେ ଆପଣଙ୍କୁ ଡିଭାଇସ ଦେଖାଯିବ। ଏହାକୁ ଫର୍ମାଟ କରି ଦିଅନ୍ତୁ। ଏହି ପ୍ରକ୍ରିୟା ଆଇଫୋନ ବ୍ୟବହାରକାରୀମାନେ ଆଇକ୍ଲାଉଡ ଆକାଉଣ୍ଟ ଦ୍ୱାରା କରିପାରିବେ। ଫର୍ମାଟ କରିବା ଦ୍ୱାରା ଡାଟା ଉଡ଼ିଯାଇ ପାରେ, କିନ୍ତୁ ଫୋନରୁ ସୂଚନା ଚୋରି ହେବାର ଭୟ ରହିବ ନାହିଁ।

ଯଦି ଫୋନ ପୁରାପୁରି ବନ୍ଦ ହୋଇଯାଇଛି, ତେବେ କ’ଣ କରିବେ? ଦେଶୀ ଉପାୟ ଅଛି, କିନ୍ତୁ ଏହା କାର୍ଯ୍ୟକାରୀ। ଏପରି କୌଣସି ସର୍ଭିସ ସେଣ୍ଟରକୁ ଯାଆନ୍ତୁ ଯେଉଁଠାରେ କାମ ଆପଣଙ୍କ ଆଖି ଆଗରେ ଏବଂ ହାତେହାତେ ହୋଇଯିବ । ହୁଏତ ଏଥିପାଇଁ ଟିକେ ଅଧିକ ଟଙ୍କା ଦେବାକୁ ପଡ଼ିପାରେ, କିନ୍ତୁ ସବୁ କାମ ଆପଣଙ୍କ ଆଖି ଆଗରେ ହେବ ଏବଂ କିଛି ଲୁଚିବାର ସୁଯୋଗ ମିଳିବ ନାହିଁ।ଏତିକି କରି ଦିଅନ୍ତୁ। ଅସୁବିଧା କମ ହେବ। ହଁ, ଫୋନର ବ୍ୟାକଅପ ଅନ୍ କରିବାକୁ ଭୁଲନ୍ତୁ ନାହିଁ।