CJPର ନୂଆ ରଣନୀତି! ପୋଲିସ ଚିହ୍ନଟ ପାଇଁ ଆଣୁଛି….
ନୂଆଦିଲ୍ଲୀ,୨୫।୭(ପି.ଟି.): ଗତ ଜୁଲାଇ ୨୦ ‘ଚଲୋ ସଂସଦ’ ରାଲି ସମୟରେ ଛାତ୍ରୀଛାତ୍ରଙ୍କ ଉପରେ ହୋଇଥିବା ପୋଲିସ କାର୍ଯ୍ୟାନୁଷ୍ଠାନରେ ସମ୍ପୃକ୍ତ ପୋଲିସ କର୍ମଚାରୀମାନଙ୍କୁ ଚିହ୍ନଟ କରିବା ପାଇଁ ‘କକ୍ରୋଚ୍ ଜନତା ପାର୍ଟି’ (ସିଜେପି) ଏକ ସ୍ବତନ୍ତ୍ର ୱେବ୍ସାଇଟ୍ ଆରମ୍ଭ କରିବାକୁ ଘୋଷଣା କରିଛି। ଏହି ୱେବ୍ସାଇଟ୍ ମାଧ୍ୟମରେ ଆନ୍ଦୋଳନକାରୀଙ୍କଠାରୁ ଫଟୋ ଓ ଭିଡିଓ ସଂଗ୍ରହ କରାଯାଇ ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ ଏଫ୍ଆଇଆର୍ ରୁଜୁ କରାଯିବ। ଦିଲ୍ଲୀ ପୋଲିସ ମାମଲା ରୁଜୁ ନ କଲେ ଅଦାଲତଙ୍କ ଦ୍ୱାରସ୍ଥ ହେବାକୁ ଦଳ ନିଷ୍ପତ୍ତି ନେଇଛି।
ଶୁକ୍ରବାର ଖବରଦାତା ସମ୍ମିଳନୀକୁ ସମ୍ବୋଧିତ କରି ସିଜେପି ମୁଖପାତ୍ର ସୌରଭ ଦାସ କହିଛନ୍ତି, ରାଲି ସମୟରେ ପୋଲିସ କର୍ମଚାରୀମାନେ ଛାତ୍ରୀଛାତ୍ରଙ୍କୁ ମାଡ଼ ମାରିବା ସହ ମହିଳା ପ୍ରଦର୍ଶନକାରୀଙ୍କ ପ୍ରତି ଅଶାଳୀନ ବ୍ୟବହାର କରିଛନ୍ତି। ଛାତ୍ରୀଛାତ୍ରଙ୍କୁ ଆକ୍ରମଣ କରିଥିବା ଏବଂ ନିର୍ଯାତନା ଦେଇଥିବା ପ୍ରତ୍ୟେକ ଅଧିକାରୀଙ୍କୁ ଚେତାବନୀ ଦିଆଯାଉଛି ଯେ, ଦଳ ଏହି ଘଟଣାରେ ନୀରବ ରହିବ ନାହିଁ। ସେ ଆହୁରି କହିଛନ୍ତି, ପ୍ରଦର୍ଶନକାରୀମାନେ ପୋଲିସ ଆକ୍ରମଣର ଭିଡିଓ ଏବଂ ଫଟୋ ନୂତନ ୱେବ୍ସାଇଟ୍ରେ ଅପ୍ଲୋଡ୍ କରନ୍ତୁ। ସିଜେପି ଟିମ୍ ଏହି ସମସ୍ତ ତଥ୍ୟ ଯାଞ୍ଚ କରି ପୋଲିସ ଅଧିକାରୀଙ୍କୁ ଚିହ୍ନଟ କରିବ। ଯଦି ଦିଲ୍ଲୀ ପୋଲିସ ଏଫଆଇଆର୍ ରୁଜୁ ନ କରେ, ତେବେ ସାରା ଭାରତର ଆଇନଜୀବୀଙ୍କ ସହାୟତାରେ କୋର୍ଟଙ୍କ ଦ୍ୱାରସ୍ଥ ହୋଇ ପୋଲିସ କର୍ମଚାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏହି କାର୍ଯ୍ୟାନୁଷ୍ଠାନ ସହ ତାଳ ମିଳାଇ ତୃଣମୂଳ କଂଗ୍ରେସର ପୂର୍ବତନ ରାଜ୍ୟ ସଭା ସଦସ୍ୟ ସାକେତ ଗୋଖଲେ ମଧ୍ୟ ଜୁଲାଇ ୨୦ ପୋଲିସ କାର୍ଯ୍ୟାନୁଷ୍ଠାନର ଫଟୋ, ଭିଡିଓ ଓ ଅନ୍ୟାନ୍ୟ ପ୍ରମାଣ ପଠାଇବାକୁ ଛାତ୍ରୀଛାତ୍ର ଏବଂ ପ୍ରଦର୍ଶନକାରୀଙ୍କୁ ଆହ୍ବାନ ଦେଇଛନ୍ତି। ଏହି ପ୍ରମାଣଗୁଡ଼ିକ ଯାଞ୍ଚ କରାଯାଇ ଅଭିଯୁକ୍ତ ପୋଲିସ କର୍ମଚାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
Dharitri – Odisha’s No.1 Odia Daily
ସ୍ପଷ୍ଟୀକରଣ: ଏହି ବିଷୟବସ୍ତୁଟି ସୂଚନାମୂଳକ ଉଦ୍ଦେଶ୍ୟରେ DHARITRI - ଧରିତ୍ରୀ ରୁ ସ୍ୱୟଂଚାଳିତ ଭାବରେ ସଂଗ୍ରହ କରାଯାଇଛି। ମୂଳ ଲେଖାଟି ପଢ଼ିବା ପାଇଁ, ଦୟାକରି ଏଠାରେ ଦେଖନ୍ତୁ।
