Asaram Bapu: ଆଶାରାମ ବାପୁଙ୍କୁ ବଡ଼ ଝଟକା, ଆଉ ରହି ପାରିବେନି ବାହାରେ

ଜେଲ୍‌ରେ ଥିବା ଆତ୍ମଘୋଷିତ ସନ୍ଥ ଆଶାରାମଙ୍କ ଅନ୍ତରୀଣ ଜାମିନ ଅବଧି ଅଗଷ୍ଟ ୨୯ରେ ଶେଷ ହେବ। ତାଙ୍କୁ ୩୦ ଅଗଷ୍ଟରେ ସେଣ୍ଟ୍ରାଲ୍ ଜେଲରେ ଆତ୍ମସମର୍ପଣ କରିବାକୁ ପଡିବ।

ରାଜସ୍ଥାନ ହାଇକୋର୍ଟରୁ ଆଶାରାମଙ୍କୁ ମିଳି ନାହିଁ କୌଣସି ଆଶ୍ୱସ୍ତି। ଅନ୍ତରୀଣ ଜାମିନ ବୃଦ୍ଧି ମାମଲାରେ ଯୋଧପୁର ହାଇକୋର୍ଟ ଆଶାରାମଙ୍କ ଅନ୍ତରୀଣ ଜାମିନ ବୃଦ୍ଧି କରିବାକୁ ମନା କରିଦେଇଛନ୍ତି। କୋର୍ଟଙ୍କ ଏହି ନିଷ୍ପତ୍ତି, ସ୍ପଷ୍ଟ କରୁଛି ଯେ ଆଶାରାମଙ୍କୁ ପୁଣି ଥରେ ଜେଲ ଯିବାକୁ ହେବ। ତାଙ୍କୁ ୩୦ ଅଗଷ୍ଟରେ ସେଣ୍ଟ୍ରାଲ୍ ଜେଲରେ ଆତ୍ମସମର୍ପଣ କରିବାକୁ ପଡିବ ବୋଲି ଅହମ୍ମଦାବାଦର ସିଭିଲ୍ ହସ୍ପିଟାଲ୍ ରିପୋର୍ଟରେ କୁହାଯାଇଛି। ଏହି ନିର୍ଦ୍ଦେଶ ଜଷ୍ଟିସ୍ ଦିନେଶ ମେହେଟା ଏବଂ ଜଷ୍ଟିସ୍ ବିନୀତ କୁମାର ମାଥୁରଙ୍କ ଡବଲ ବେଞ୍ଚରୁ ଆସିଛି।

ଜେଲ୍‌ରେ ଥିବା ଆତ୍ମଘୋଷିତ ସନ୍ଥ ଆଶାରାମଙ୍କ ଅନ୍ତରୀଣ ଜାମିନକୁ ଅଗଷ୍ଟ ୨୯ ପର୍ଯ୍ୟନ୍ତ ବୃଦ୍ଧି କରିଛନ୍ତି ହାଇକୋର୍ଟର ଯୋଧପୁର ବେଞ୍ଚ। ବର୍ତ୍ତମାନ ଆଶାରାମ ତାଙ୍କ ଗୁରୁକୂଳର ଜଣେ ନାବାଳିକା ଶିଷ୍ୟାଙ୍କୁ ଦୁଷ୍କର୍ମ କରିବା ଅଭିଯୋଗରେ ଆଜୀବନ କାରାଦଣ୍ଡ ଭୋଗୁଛନ୍ତି। ଆଶାରାମଙ୍କ ଜାମିନ ଅବଧି ଅଗଷ୍ଟ ୧୨ରେ ଶେଷ ହେବାର ଥିଲା। ତେବେ ହାଇକୋର୍ଟ ବେଞ୍ଚ ଆଶାରାମଙ୍କ ଡାକ୍ତରୀ ରିପୋର୍ଟ ଦେଖିବା ପରେ ଜାମିନ ଅବଧି ବୃଦ୍ଧି କରିବାକୁ ଅନୁମତି ଦେଇଥିଲେ।

ନିକଟରେ ଗୁଜରାଟ ହାଇକୋର୍ଟ ଏହି ମାମଲାରେ ଆଶାରାମଙ୍କ ଅନ୍ତରୀଣ ଜାମିନ ଅବଧିକୁ ଅଗଷ୍ଟ ୨୧ ପର୍ଯ୍ୟନ୍ତ ବୃଦ୍ଧି କରିଥିଲେ, ଯାହା ପରେ ଏହି ଆଶ୍ୱସ୍ତି ମିଳିଥିଲା। ସେତେବେଳେ, ଆଶାରାମଙ୍କୁ ଇନ୍ଦୋରର ଏକ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ତାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିବା କୁହାଯାଉଥିଲା। ଆଶାରାମଙ୍କ ଡାକ୍ତରୀ ରିପୋର୍ଟ ଦେଖିବା ପରେ, ହାଇକୋର୍ଟ ତାଙ୍କ ସ୍ୱାସ୍ଥ୍ୟର ପରୀକ୍ଷା ପାଇଁ ଅହମଦାବାଦର ଏକ ସରକାରୀ ହସ୍ପିଟାଲର ଡାକ୍ତରଙ୍କୁ ନେଇ ଏକ କମିଟି ଗଠନ କରିବାକୁ ନିର୍ଦ୍ଦେଶ ଦେଇଥିଲେ।

ସେତେବେଳେ କୋର୍ଟ କହିଥିଲେ ଯେ ଏହି କମିଟିରେ ଜଣେ ହୃଦ୍‌ରୋଗ ବିଶେଷଜ୍ଞ ଏବଂ ଜଣେ ସ୍ନାୟୁ ବିଶେଷଜ୍ଞଙ୍କୁ ସାମିଲ କରାଯିବା ଉଚିତ। ଏହା ସହ ଜାମିନ ଅବଧି ଶେଷ ହେବାର ଦୁଇ ଦିନ ପୂର୍ବରୁ ଅର୍ଥାତ୍ ଅଗଷ୍ଟ ୨୭ ସୁଦ୍ଧା ରିପୋର୍ଟ କୋର୍ଟରେ ଉପସ୍ଥାପନ କରିବାକୁ କୋର୍ଟ ନିର୍ଦ୍ଦେଶ ରହିଛି।