Anavasara Darshan: ମହାପ୍ରଭୁ ଅଲାରନାଥଙ୍କ ପୀଠରେ ଟ୍ରାଫିକ୍ କଟକଣା, ୩୦ରୁ ୧୩ ଯାଏଁ ଭାରୀ ଯାନ ଚଳାଚଳ ମନା
ପୁରୀ,୨୮/୦୬: ଦେବସ୍ନାନ ପୂଣ୍ଣିର୍ମା ପରବର୍ତ୍ତୀ ମହାପ୍ରଭୁ ଅଲାରନାଥଙ୍କ ଯାତ୍ରା ଅବସରରେ ଭାରୀ ଯାନ ଚଳାଚଳ ଉପରେ କଟକଣା ଲଗାଇଛି ପ୍ରଶାସନ ଏଥିସହିତ ଶୃଙ୍ଖଳିତ ଦର୍ଶନ ନିମନ୍ତେ ପୁଲିସ୍ ମୁତୟନ, ଅଣସର ଦର୍ଶନ ୧୫ ଦିନ ନିରବଚ୍ଛିନ୍ନ ବିଦ୍ୟୁତ୍ ସେବା, ତିନୋଟି ସ୍ଥାନରେ ପାର୍କିଂ ସହ ସିସିଟିଭି କ୍ୟାମେରା, ପୀଠରେ ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ବାହ୍ୟ ଭୋଗ ନିମନ୍ତେ ଶ୍ରୀଗଣେଶଙ୍କ ନିକଟରେ ଭୋଗ ମଣ୍ଡପ, ସ୍ୱାସ୍ଥ୍ୟ ବିଭାଗ ପକ୍ଷରୁ ଚିକିତ୍ସା କେନ୍ଦ୍ର ସହ ଡାକ୍ତର ରହିବା ବ୍ୟବସ୍ଥା, ଅଗ୍ନିଶମ ବିଭାଗ ପକ୍ଷରୁ ସତର୍କତା ବ୍ୟବସ୍ଥା, ଗ୍ରାମ୍ୟ ପାନୀୟ ଜଳ ଯୋଗାଣ ତରଫରୁ ପାନୀୟ ଜଳର ସୁବନ୍ଦୋବସ୍ତ ଏବଂ ଅସ୍ଥାୟୀ ପାଇଖାନା ନିର୍ମାଣର ସମୀକ୍ଷା କରି ସମସ୍ତ ବିଭାଗୀୟ ଅଧିକାରୀଙ୍କୁ ସତର୍କ ରହିବା ପାଇଁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ।
ଦେବସ୍ନାନ ପୂର୍ଣ୍ଣିମା ପ୍ରସ୍ତୁତି ବୈଠକରେ ଗୃହୀତ ନିଷ୍ପତ୍ତି ଅନୁଯାୟୀ, ଚଳିତ ବର୍ଷ ମହାପ୍ରଭୁ ଅଲାରନାଥଙ୍କ ଯାତ୍ରା ଅବସରରେ ଜିଲ୍ଲାପାଳ ତଥା ଜିଲ୍ଲା ମାଜିଷ୍ଟ୍ରେଟ ଦିବ୍ୟ ଜ୍ୟୋତି ପରିଡା ଦ୍ରବ୍ୟ ବହନକାରୀ ବଡ଼ ଯାନ ଚଳାଚଳ ଉପରେ ଅସ୍ଥାୟୀ ପ୍ରତିବନ୍ଧକ ଜାରି କରିଛନ୍ତି । ଏହି ପ୍ରତିବନ୍ଧକ ୩୦ ଜୁନ ୨୦୨୬ ଠାରୁ ୧୩ ଜୁଲାଇ ୨୦୨୬ ପର୍ଯ୍ୟନ୍ତ ପ୍ରତିଦିନ ସକାଳ ୬ଟାରୁ ରାତି ୧୦ଟା ପର୍ଯ୍ୟନ୍ତ ବଳବତ୍ତର ରହିବ ।
ପ୍ରତିବନ୍ଧିତ ରୁଟ୍ଗୁଡ଼ିକ ହେଉଛି ମଙ୍ଗଳା ଘାଟ ଠାରୁ ସାତପଡ଼ା ଏବଂ ଖଜୁରିଆ ଠାରୁ ବ୍ରହ୍ମଗିରି ମାର୍କେଟ ଛକ । ଏହି ନିର୍ଦ୍ଦେଶନାମା ମୋଟର ଯାନ ଆଇନ-୧୯୮୮ର ଧାରା ୧୧୫ ଏବଂ ଓଡ଼ିଶା ମୋଟର ଯାନ ନିୟମାବଳୀ-୧୯୯୩ର ନିୟମ ୧୭୩ ଅନୁଯାୟୀ ଜାରି କରାଯାଇଛି । ଜନସାଧାରଣ ଏବଂ ସମସ୍ତ ଭାରୀ ଯାନ ଚାଳକଙ୍କୁ ଉକ୍ତ ସମୟରେ ବିକଳ୍ପ ମାର୍ଗ ବ୍ୟବହାର କରି ପ୍ରଶାସନକୁ ସହଯୋଗ କରିବା ପାଇଁ ଆଞ୍ଚଳିକ ପରିବହନ କାର୍ଯ୍ୟାଳୟ ପକ୍ଷରୁ ଅନୁରୋଧ କରାଯାଇଛି ।
